Loke ta pasando cu nos hobennan ta gewoon falta di control di mayornan!

Hefe di KZP Inspector Eric Lake:
ORANJESTAD (AAN) — DIARIO a acerca Inspector Eric Lake, Hefe di KZP, relaciona cu e asistencia policial cu ta rekeri den diferente bario y famianan, entre otro na Cero Patrishi, Canoastraat, algun school unda hoben ta drenta cu arma, pelea entre gang, cu ta parce ta birando for di man. Señor Lake a menciona cu e situacion di pelea entre gang a cuminza lanta cabes atrobe, ultimamente, y diamars a drenta dos keho, y ta mustra cu e situacion a bin back unda hobennan ta aplica violencia pa asuntonan cu nan no por resolve como “cabayeronan”. Señor Lake ta keda para den su punto di bista cu hopi di e cosnan aki ta sosode pa motibo cu no tin control riba e hobennan aki, di parti di nan mayornan.
E ta mira tur fin di siman hopi hoben, den oranan laat riba caya, y e tin entendi cu nan ta consumi alcohol, tin humamento di marihuana, nan ta frecuenta night club, y e ta kere cu mester controla e situacion aki, pasobra no por tin mucha menor di edad cu ta haci esaki, of sinta pafo den auto hunto cu “brother” cu e baul yen di bebida alcoholico.

“ Mi ta kere cu e cosnan aki ta gewoon control di mayornan cu ta faltando awendia. Nan no ta controla nan yiunan, nan no ta wak si nan ta na cas, y nan ta laga nan sali sin mas y nan ta keda laat riba caya”, Inspector Lake a subraya.

El a agrega cu ora e hobennan ta keda laat riba caya, tin biaha nan ta topa cu amigonan cu tur e consecuencianan cu esaki por trece cune. E casonan aki ta worde maneha mescos cu cualkier otro asunto cu yega na KZP.

“ Ora e denuncia ta yega, nos ta pone riba papel locual e victima ta bin conta nos, nos ta manda e keho cu nos ta ricibi na Ministerio Publico, y e ora ey OM ta duna nos ordo pa nos sigui haci investigacion. Nos ta busca tur hende cu por conta nos ta kico a pasa y tur esnan cu a comete un hecho castigable, no ta importa cuanto nan ta, lo worde deteni y di eynan nos ta sigui nan”, Inspector Lake a señala.