ORANJESTAD (AAN): Den fin di siman cu a pasa, a tuma lugar na Costa Rica e evento di Miss Teenager Universe.
E evento mas principal di hobennan bunita, a haya atencion mundial!
Beyezanan hubenil for di tur parti di Mundo tabata presente y a participa den e certamen aki, cu hasta a inclui un representante di Cuba e biaha aki.
Na final, e titulo principal a bay pa e candidata di Zuid Africa, Chante Jantjies.
Prome finalista a bira Eline de Pool di Curacao, sigui pa Roxana Dumitrescu di Romania, Lynette do Nascimento di Aruba, y Cleyris Velasques di Panama.
Dialuna atardi na Aruba, Lynette a worde ricibi pa su famia, amigonan, y miembronan di comision den VIP Room di Aeropuerto Internacional Reina Beatrix. Un monton di bouquet el a ricibi, y a haci varios entrevista. Lynette ta hopi satisfecho cu su rol ehecuta na Costa Rica, unda el a papia constantemente pa promove Aruba.
El a splica cu e tin mas proyecto na caminda den cual e lo participa, y e anuncio aki mes a pone e publico presente dune un aplauso grandi. Su recepcion tabata triunfal. Pabien Lynette.
