En conexion cu proximo celebracion 25 aña autonomia:
El a constata cu e ta den un estado deplorable!
ORANJESTAD (AAN) — Riba Plaza Betico Croes, DIARIO a topa y a entrevista Minister Presidente mr. Mike Eman, ken e bay tira un bista riba e situacion deplorable di e plaza, hunto cu su colega di Economia, Asunto Social y Cultura, señora Michelle Hooyboer- Winklaar. Ambos dignatario hunto cu un grupo tecnico a presenta na Plaza Betico Croes, pa inspecciona e situacion, y nan a constata cu specialmente e area unda expresionnan cultural ta tuma lugar ta den hopi mal estado. Otro aña, manera ta conoci, Aruba ta celebra su di 25 aniversario di Status Aparte, y gobierno kier pa tur e plazanan dedica na nos heroenan cu a hiba e isla den e trayecto di e lucha pa Aruba por ta un pais riba su mes, na e punto cu pronto nos pais por celebra su di 25 aña di Status Aparte, ta den bon condicion.
E dignatario a bisa cu esey lo ta sigur un momento di hopi orguyo, cu dia 31 di December proximo lo por celebra cu Aruba ta drenta den su 25 aña di autonomia, y gobierno kier celebra esaki en grandi, y pesey a lanta un comision pa traha exclusivamente riba esaki.
Prome Minister a agrega cu den e parti di maneho di e celebracion aki, atencion special lo worde duna na e plazanan unda nos ta recorda parti di e historia di Status Aparte, y e ta kere cu sin duda Betico Croes den e añanan 80, drentando e momento cardinal di logra e autonomia tabata un figura central, y Premier Eman ta kere cu un plaza dedica na dje, mester ta den un condicion bon y cu ta duna merito na e figura aki y na nos historia.
El a remarca cu manera e plaza ta awor no ta un refleho di loke gobierno kier pa Aruba proyecta durante e periodo di celebracion importante aki.
“ Nos kier pa mundo mira un Aruba cu ta orguyoso di loke nos a logra den 25 aña di Status Aparte, un Aruba cu tin optimismo y inspiracion cu a pone cu nos a yega unda nos ta, y habri caminda pa otro 25 añanan cu lo trece mas felicidad pa nos hendenan cu oportunidadnan nobo.
“ E celebracion aki ta duna nos oportunidad di uni hopi mas nos comunidad y recorda cu hopi inspiracion nos heroenan cu a trece nos aki, y cu ta duna nos e forza y guia tambe pa sigui hiba Aruba padilanti”, Prome Minister mr. Mike Eman a expresa.
