Nel Oduber a firma concesion un siman prome cu bandona Gobierno

Nel ata e prueba!
Campañado di MEP a haya permiso pa competi cu Setar sin cu e mester di garantia di banco
ORANJESTAD (AAN): Despues di resultado di eleccion y den cual partido MEP a bay atras di 11 pa 8 asiento, Nel Oduber a dicidi di firma un carta den cual e ta otorga un permiso pa opera un compania cu tin kabel bou awa pa comunicacion di telefon y data internacional. E mesun permiso aki varios otro comerciante local y companianan di telecomunicacion a yega di pidi Gobierno pero nunca a logra. Sinembargo, faltando 8 dia pa e sali for di su oficina, Nel Oduber a bira firma e carta aki na un fiel campañado di dje.

Obviamente mester tin motibonan serio cu e campañado, di cual su mesun ruman awe ta man drechi di un Minister di AVP, no kier a uza su mesun nomber sino a opta pa uza esun di su amiga.
Den e carta firma dia 21 di october 2009, Nel Oduber ta otorga su amigo un concesion pa core kabel y opera un red di “landing station” den cual por haci yamada internacional of tin comunicacion di data (internet). Mientras cu tur otro compania di telecomunicacion mester atende cu un sin fin di rekisitonan pa por yega na un concesion asina, pa e amigo aki a suavisa e proceso.

Imagina cu e unico rekisitonan cu ta pidi di un compania cu lo por explota un compania multi miyonario cu lo por tin repercusionnan serio pa Setar, mester djis informa director di DTZ di su intencionnan, busca e otro permisonan necesario di otro departamentonan di gobierno y percura pa mayoria di e accionnan di e compania keda den man di hendenan local.

Pret ta cu e mesun Minister aki a manda un carta caba dia 7 di october den cual e ta pidi su amigo di campaña pa e pone un carta di garantia di banco pa e por haya dicho carta. Pero como cu e persona envolvi no por a logra yega na dicho carta di garantia pa motibonan conoci, e ex Prome Minister a dicidi di hala su mesun rekisito aden.

Kico ta e motibo cu Nel Oduber a opta pa saca un “toezegging” na su amigo di campaña dia 21 di october ora cu el a baha dia 29 di october 2009 como Prome Minister no ta conoci ainda. Tin diferente rumor cu ta insisti riba motibonan cu lo por a causa cu Oduber ta opta pa haci algo semehante asina.

Den pasiyonan di Bestuurskantoor ta worde bisa cu e acto aki lo por tin consecuencia penal pa Nel Oduber pasobra esaki sigur no ta un asunto cu e por regla den un Gobierno demisionario. E ta pone cualkier hende puntra su mes si lo tin mas motibo pa e haci un acto asina contra su pais.
Ta e mesun Nel Oduber cu pa 8 aña largo e bringa Digicel dia aden y dia afo, a yama nan pa tur sorto di cos y stroba nan operacion, awe ta haci un acto cruel asina contra Setar.

Digicel a paga 7 miyon Florin pa por a drenta e mercado local y ta cumpli cu su impuestonan cabalmente y casi ta emplea hendenan local so. Kico ta pasa den mente di e lider di MEP pa bira saca un promesa pa entrega un concesion na un persona cu ni sikiera por produci un carta di garantia di banco, te ainda ta un cuestion cu tempo lo demostra.

Den e empleadonan di Setar, e asunto aki no a cay den mucho bon tera. E ta demostra cu e puyitonan a cuminsa sali y poco poco pueblo ta cerando conoci mas di cerca cu e grupo di “Friends & Family” cu a sa di goza hopi di nan relacionnan “estrecho” cu e gobierno anterior.
Awor pueblo y specialmente e trahadonan di Setar mes por mira kendenan ta esunnan cu di berdad tin patrimonio di pueblo na pecho.

Ta cu ki cara e yiu homber di Nel Oduber cu a haya un bon puesto den Setar lo por mira su coleganan awe mainta ora cu e sa cu su mesun tata a haci un intento casi “ilegal” pa kibra Setar for di otro door di habri e mercado di yamadanan internacional sin un estudio drechi y sin cu e compania nobo mester cumpli cu rekisitonan normal pa garantisa calidad y seriedad.

Ta ser papia cu ya caba e “beneficiario” di e fabor politico aki ta buscando benta pa e concesion cu ni sikiera el a haya oficial ainda y cu tin duda serio cu e Gobierno aki lo otorga tambe. E asunto aki sin duda lo mester worde investiga door di e team di Hulanda cu ta na Aruba y eventualmente “Busje komt zo” lo tin su trabao pa haci aki tambe!