ORANJESTAD (AAN): Riba Dialuna 18 di Oktober 2010, ta recorda e di 20 aniversario di e fayecimiento di un di pionero-nan den radio difusion na Aruba, Sr, Hubert Erquilles Antonio Booy mihor conoci como Caruso, y tambe conoci como un di e pioneronan den transmission riba Frequencia Modula (F.M) na Aruba cu e apertura di su propio emisora na 1978 cu a worde bautiza cu e nomber di Radio Caruso Booy FM ‘E Baranca di Diamante, The Diamond Channel’ , anque actualmente no ta den aire, ta un emisora cu semper a keda graba den curazon di Pueblo di Aruba como un emisora masha stima cu a worde opera pa famia Booy pa hopi aña y ademas tabata un di e promer generacion di emisora-nan na Aruba riba e banda FM.
Dialuna a dedica un espacio pa recorda den felis memoria e fundador di e emisora cu ta Hubert ‘Caruso’ Booy su gran contribucion riba e terreno di radio difusion na Aruba.
Hubert Erquilles Antonio Booy, mihor conoci como Caruso, un personaje hopi conoci den radio-difusion di Aruba y Antillas (cual awendia Antillas ta conoci pa Curaçao, Bonaire, Saba, St. Estatius y St. Maarten) , y Caruso ta un di e pioneronan di e prome radio emisora-nan riba Frequencia Modula (FM) na Aruba.
Caruso a nace na Curaçao dia 7 di November 1934, y a labora pa hopi aña den radio difusion na Curaçao na entre otro: Radio Hoyer, despues cu Radio Antillana AM (conoci awendia como Radio 1270) a worde inaugura na Aruba, Caruso a muda y bin establece su mes na Aruba, y a traha pa hopi aña como station manager di Radio Antillana.
Caruso tabata tin un estilo unico di por presenta programanan musical, pa su forma alegre di presenta programa nan musical y propaganda, y naturalmente e parti humoristico cu tabata unico riba su mes.
Despues di a traha pa hopi aña como station manager na Radio Antillana riba e frequencia di 1270 AM, Caruso a dicidi di move cu e technolgia pa por realiza su soño cu semper e tabata anhela, cu ta su propio radio emisora, riba e banda di Frequencia Modula (FM)
Cu hopi esfuerzo y perseverancia Caruso hunto cu su señora esposa Sira, a logra realiza e meta, di logra tin un emisora riba banda FM riba 102.7 MHz.
Caruso a ricbi hopi sosten di diferente fabricante di equiponan di transmission manera entre otro Hillman Associates, Moseley Associates, Harris Corporation, Mc Martin y Sintronic, cual tur a yuda den un gran forma pa e emisora por tabata tin tur e equiponan di studio y transmission
Por menciona cu den e temporada aki tabata requeri hopi equipo pa por haci transmission riba FM, manera entre otro: reel to reel, turntable, cassette , y como tambe e formato FM Stereo tabata nobo riba mercado, tabata tin mester hopi equipo pa processa e transmission FM.
Despues cu a pasa e periodo di prueba, e radio-emisora a worde bautiza cu e nomber di su propio fundador Caruso, cual e radio emisora ta indentifica su mes como Radio Caruso Booy y cu e lema ‘E Baranca di Diamante’. cual transmission nan a cuminza 19 di December 1978 for di studio nan instala na Boulevard Center (awendia Reinassance Hotel) y planta transmisora instala na Tamarijn, despues e studio nan a muda pa residencia di Caruso na Generaal Majoor de Bruinewijk # 49 na Savaneta y e planta transmissora a muda pa e sero di Hooiberg.
Radio Caruso Booy a bira un emisora hopi stima den Pueblo di Aruba y na Antillas y como tambe na Estado Falcon, Venezuela, pa su programmacion hopi varia y alegre pa tur hende, y tambe semper tabata un placer di por a topa den e emisora Caruso mes of su señora esposa Sira y yiunan.
Manera Caruso a expresa durante un entrevista na un canal di television, ‘ Musica ta haci bo alegre, musica ta pone bo sinti bon y felis, y esaki tabata e meta di Radio Caruso Booy, pa por laga e oyente sinti contento scuchando radio.
Ademas por menciona cu e emisora a sirbi como un school radial, pa hopi aña na hopi persona, cu a siña na Radio Caruso Booy presentacion di programma-nan radial y opera equiponan di studio
Caruso mes tambe tabata activo den entre otro e club di prensa ‘Aruba Press Club’ bao di direccion di Sr. Jos van der Schoot (q.e.p.d.) y tabata activo den clubnan deportivo manera Essolito y varios otro organizacion den comunidad, tambe por menciona cu Radio Caruso Booy a duna un gran aporte na comunidad di Aruba cu diferente programma nan educativo, informativo, religioso,musical y specialmente Radio Caruso Booy a dedica su mes pa promove nos artistanan y musica cultural di Aruba
Despues cu Caruso a bin ta sufri un quebrante di salud fuerte entre aña 1989 cu 1990, Caruso a fayece 18 di Oktober 1990 na Curaçao.
E fayecimiento aki a commove henter Aruba y Antillas cu e perdida di un di e pionero nan den radio difusion na Aruba, Caruso su entierro a tuma lugar na Aruba.
Despues di e fayecimiento di Caruso, su señora esposa Sira, a tuma e maneho di e radio over pa por a sigui cu e deseo di Caruso, pa Radio Caruso Booy a keda semper un emisora alegre y varia pa henter Aruba.
Mi mes no a nota ku asina tantu tempu a pasa kaba. Sr. Booy tabata bon amigu di mi tata na Korsow. Mi tata e tempu ei tabata maneha varios negoshi, inkluyendo un agensia di viahe. Caruso, na varios okashon tabata bin buska ami i rumanan na skol ora ku mi mi tata no tabata por.