Tur e sospechosonan a indica cu nan no tabata sa cu e placa cambia na Dollar, ta placa di droga

Publication: Friday, 15 October 2010. Categoria: Judicial

JudicialORANJESTAD(AAN): Diahuebs na corte a tuma lugar un caso den cual Benito A.v.d.B, Muskesh H.S, Oscar E.C y Gilbert P.S a wordo acusa di labamento di placa. E acusacion ta encera cu entre 1 di Mei 2005 y 11 di Mei 2006, como tambe entre 12 di Mei 2006 te cu 24 di September 2007, e personanan aki tabata ricibi y cambia placa, di cual nan mester a sa cu e ta procedente di traficacion di droga of di otro crimen.
Esaki ta un caso cu ta parti di e famoso caso di “Domino”, cu a wordo trata basta tempo pasa. E acusacion a wordo separa den dos periodo, pasobra cierto leynan di labamento di placa a cambia.
Segun e acusacion, O.C lo a cambia mas di 326.599 florin na banco na dollar pa un di e sospechosonan principal di e caso Domino esta Luis Mansur, kende awor ta sintando su castigo na KIA.

G.S a wordo acusa cu e tabata e persona na banco, unda cu e 326 mil florin a wordo cambia.
M.S ta un Hindu cu ta doño di algun negoshi y el a wordo acusa cu e tabata tuma miles di florin for di un di e sospechosonan principal den e caso Domino cu ta Rafa Mercado Ochoa y cambia esaki den dollar.

B.B tabata un ambtenaar di Douane y e tambe tabata cambia florin pa dollar pa Rafa Ochoa.
Abogado Duijneveld representando B.B a mustra huez riba e hecho cu el a pidi pa algun testigo wordo scucha den corte y nan no a wordo invita pa bin.

Fiscal a indica cu e peticion a drenta mucho laat y Duijneveld ta haya cu si el a entrega e peticion na ora. Huez a bisa cu e peticion a wordo entrega un tiki laat, pero e ta bay wak si e lo por uza un otro manera legal, pa permiti toch pa e testigonan wordo scucha.

El a bisa cu e kier cuminza cu tratamento di e caso, durante di cual e lo dicidi si lo scucha e testigonan despues of no. Abogado Duijneveld a bisa huez cu el a palabra caba cu su cliente cu tanten huez no permiti pa tende e testigonan, su cliente lo hasi uso di su derecho di keda keto, mientras cu Duijneveld mes lo sinta scucha e caso, pa despues bay corte superior cu e caso.
E abogado a bisa cu aparentemente e regla di entrega peticion na ora ta mas importante cu haya sa e berdad den e caso aki.

Huez a cuminza na trata e parti di e caso cu tin di haber cu G.S y O.C., for di e dossier cu yama “Santanero”. Ta asina cu investigacion a mustra cu O.C tabata cambia miles di florin di Luis Mansur na banco pa haya dollar.

E sospecho tabata cu ta placa procedente di droga. O. tabata cambia e placa aki na banco cerca G.S. G. a admiti cu e tabata cambia e placa no totalmente segun reglanan di banco. E tabata cambia e placa na dollar usando un formula di cambio, unda cu e tabata keda cu un parti chikito di e placa.

Pa cada 10.000 dollar duna na Mansur, G. tabata keda cu 300 florin. G.S mescos cu O.C a bisa cu nan no tabata sa cu e placa tabata procedente di traficacion di droga. O. a indica na polis cu e tabata tin añanan ta traha pa famia di L.M y cu nan ta amigo.

El a bisa cu e no tabata wordo paga pa cambia e placa pa Mansur. Segun O., tabata un fabor di amigo e tabata hasi. Huez a mustra riba e hecho cu G.S a yega di puntra O. si e placa ta di droga y G. a bisa huez cu na dado momento el a cuminza sospecha cu quizas algo no ta cuadra, pasobra e lo a wak un noticia den cual a wordo bisa cu droga haya riba un boto lo tabata di Mansur.

Huez a bise cu ta straño si cu el a duda, pero asina mes el a sigui cambia florin na dollar pa Mansur. G. a bisa cu e tabata tin casi 30 aña trahando na banco y asina mes su salario no tabata gran cos.

Door cu e tabata tin hopi debe, el a dicidi di sigui hasi loke e tabata hasi. Huez a mustra tambe riba e hecho cu den un combersacion graba di tap entre O.C y G.S, O.C lo a bisa G. S cu e lo cambia e placa den dos biaha, pa esaki no hala atencion.

Pa loke ta e parti di Benito B., observacion di polis a indica cu na Wel Wel entre otro, Rafa Ochoa tabata tabata trece miles di florin pa B.B. Huez a hasi diferente pregunta na B.B, pero e no a contesta, bisando cu e ta hasi uso di su derecho di keda keto.

Huez a indica cu ora polis a listra cas di B.B, nan a topa cu 101.000 florin y 18.000 dollar, paketa den rolnan chikito. Na dado momento huez a puntra Duijneveld si e tin pregunta pa su cliente y el a bisa cu si su cliente no por tin un proceso husto den corte, e no ta hasi ningun pregunta.
E abogado a pidi griffier specificamente pa anota loke el a bisa.

Pa loke ta e parti di M.H.S den e caso aki, ta asina cu e tabata cambia florin pa dollar den su negoshi, pa Rafa Mercado Ochoa. E tambe a bisa cu e no tabata sa cu e placa tabata procedente di asuntonan di droga.

Segun M.S, e negoshi di dje ta un negoshi unda practicamente solamente turista ta cumpra.
Door di esey semper e tin dollar, pero e tin cu paga su empleadonan na florin. Mirando esaki, semper e ta interesa pa hende trece florin pe, pa asina e por paga e salarionan y cierto otro gastonan.

Ochoa tabata duna 1 florin 80 pa cada dollar, mientras cu M.S na banco lo a haya solamente 1.77.
Pa Ochoa tabata faborable pa e cambia su florinnan den e negoshi di M.S, pasobra si e lo a bay cumpra dollar na banco, e mester paga casi 1.83.

Esaki segun M.S, kende a keda para ariba cu e no tabata sospecha cu Ochoa lo tabata envolvi den asuntonan di droga, pasobra semper e tabata bao di e impresion, cu Ochoa tabata un comerciante exitoso.
El a bisa den corte cu el a cambia alrededor di 150.000 dollar pa Ochoa. Fiscal a exigi pa tur sospechoso un castigo condicional di 5 luna. Huez a dicidi di pospone tratamento di e parti di e caso di Benito v.d.B pa un tempo indefini, pa scucha Mercado Ochoa como testigo.

Pa loke ta Muskesh H.S., huez a declare liber di tur acusacion. Pa loke ta Gilbert S. y Oscar C., huez a declara nan liber di intencionalmente laba placa. Sinembargo el a haya si cu nan a yuda laba placa y cu nan mester tabata mas cauteloso. Pesey el a duna nan un castigo condicional di 3 luna.

Leave a Reply