Un interpretacion politico di historia

Ta dificil evita cay den un ambiente di asombro ora bo ta ser confronta cu cosnan expresa como hechonan historico, pero cu no ta nada otro cu fragmentonan di politica partidista. Booshi a caba di duna un demostracion di e concepto aki, pasobra entre e diferente factornan historico cu e ta menciona corectamente, e ta introduci algun cos irelevante na e tema cu e ta expone.
Pa cuminza, MEP no a busca ningun sorto di Status Aparte; su cabay di bataya tabata e Independencia total di Aruba. E lucha no tabata pa los di Antillas, sino di Hulanda y Antillas pareu. Betico no a manda emisarionan Sur America y Cuba pa busca apoyo pa un eventual salida di Antillas, sino pa un ruptura total cu Hulanda.

Y ta Hulanda, mi ta supone pa aplaca e situacion y duna Betico algo pa bin back cune, a concede Aruba e status cu e tin awor, y cu por cierto no a cuminza cu Betico, pero cu a mira su realizacion cune. Betico ta, de facto, esun cu a obtene e Status Aparte cu nos a haya. Pero, e no a obtene su so tampoco, aunke ta el a lidera e bataya pa logre.

Na final, ora cu el a mira cu e por a causa un miho impresion pa logra loke Pueblo di Aruba tabata anhela, el a cera paz cu e otro partidonan politico di Aruba, el a convence e sindicatonan y comercio pa uni nan mes na e delegacion cu tabata bayendo Hulanda pa delibera riba e asunto, y asina presenta cu un solo frente solido pa convence Hulanda cu no tabata trata di e deseo di un solo persona o partido, sino di henter e Pueblo.

Otro asunto cu mester di aclaracion ta cu AVP no ta un partido racista, manera a ser sugeri! E no a bay di acuerdo pa sali di Antillas pa motibonan di raza o color, sino pa logra retene e totalidad di e entradanan di Aruba pa e ser aplica aki mes na e caha publico di e isla cu tabata tin necesidad di dje. Mester corda cu mientras nos tabata forma parti di Antillas, e mayor parti di tur e recaudacionnan di Gobierno tabata bay Corsow pa nan dispone di nan aya via e Gobierno Central di turno.

E deseo di AVP, te unda cu mi por interprete, no tabata pa sali di Antillas pa motibonan racista, sino pa logra conserva na Aruba tur loke e isla tabata produci y cu te e momentonan ey tabata bula bay Corsow pa nan dicidi aya con ta aplike.

Mi ta corda ainda e ultimo carta di Betico cu nos a publica den DIARIO, den cual el a bisa claramente, sin ningun posibilidad di malinterpretacion, cu e prome paso, esta Status Aparte, a ser logra, y cu awor mester bay lucha pa e di dos paso, o sea esun final, cu ta e logro di e Independencia di Aruba.

Betico nunca a titubea ora di delinea su plannan pa e futuro di Aruba. E no a sconde tras di Status Aparte pa pretende cu ta esey MEP tabata buscando, sino cu el a keda fiel te final na su interpretacion di loke e lucha di su partido tabata, o sea logra e Independencia di Aruba.
Betico tabata un politico integro (te unda cu bo por aplica integridad na un politico!), y no a sucumbi pa e tentacionnan di poder.

E tabata e Consehero General di su Gobierno, y no un Diputado o Ministro. E no tabata interesa pa nan yame “su Excelencia” (titulo bastante superfuluo si bo considera e calidad di e Ministronan anterior), y tabata conforme cu esun di “lider”, manera nos tur cu tabata kere den dje tabata yame cu respet y cu cariño.

Su obra ta papia pa su mes. El a logra unda hopi prome cune a faya, pero a keda e mes Betico di semper. Nada di infulanan di grandeza, ni postinnan di macaco. E tabata genuino; un bon amigo y un gran político.

Lastima cu hopi hoben no a yega di conoce pesonalmente, sin cu esey ta nan culpa of esun di dje, pasobra unda destino ta manda, e deseonan di e ser humano ta mes inutil cu su aspiracionnan.