Home Hudicial 3 aña di castigo pa intento di asesinato

3 aña di castigo pa intento di asesinato

9
0
SHARE
- Advertisement -

JudicialRiba homber cu falta parti di un pia
ORANJESTAD(AAN): Diabierna Jensen J.S a presenta dilanti di huez, debi na e hecho cu el a wordo acusa di a dal un persona mas biaha cu kruk na diferente parti di su curpa. Tambe el a wordo acusa di a corta e persona aki cu un parti kibra di un ‘wasbak’. Esaki a sosode riba 21 di April 2010. Huez a repasa rapport di polis di e caso, den cual tin para cu polis mester a bay Victory Outreach cu ta un centro di rehabilitacion pa hende cu tin problema, pa un posibel caso di hincamento. Ora cu polis a yega nan a topa un persona cu sla na su curpa y un pia ta sangra bastante.
E persona aki tabata falta parti di un di su pianan, debi na un accidente di auto di algun aña pasa.
Huez a repasa declaracion di e acusado cu el a duna na polis. J.S a bisa polis cu e tabata kedando na e centro y na dado momento ora cu e tabata den baño, el a tende un persona bati riba e porta y e persona a habri e porta tambe.

Tabata un persona cu ta cana cu kruk, pasobra e tabata falta parti di un di su pianan. J. a splica cu ya caba e tabata sinti un tension, pasobra tabata tin algun persona ta tente den e lugar. J a bisa cu un discusion a cuminza pasobra e persona no kier a warda pa e keda cla den baño.

El a bisa cu el a ripara cu e persona tabata tin su man tras di lomba y a pensa cu porta e por tabata tin un arma cune. Segun J., den e lugar nan a conte storianan di hende peligroso den e lugar y nan lo a bise pa e no confia ningun hende.

Pues ora el a sinti su mes menaza, el a cuminza un lucha cu e persona riba kruk y e persona a cay abo. Segun J., e persona a keda dal e cu e kruk y el a dal e persona un mokete. El a bisa tambe cu e persona a manda un comchi di glas riba dje.

J. a bisa tambe cu e kruk di e persona a kibra e wasbak y door di esey J. a coi un pida di esaki y cu e parti skerpi aki el a corta e persona na su pia. El a bisa cu esey no tabata su intencion si.
Huez a puntre dicon el a core bay y el a bisa huez cu ta pasobra el a spanta, pasobra nunca antes el a yega di haya su mes den un problema asina unda cu sanger tabata basha etc.

El a bisa cu den su miedo te hasta el a lubida cu e homber ta handicap y a pensa cu quizas e homber lo bay core su tras. Huez a puntra J. tocante su bida na Hulanda y si el a yega di haya problemanan psiquiatrico y psicologico, pasobra na Aruba e no a coopera pa nan hasi un evaluacion psicologico riba dje.

El a bisa cu ora cu su mama tabata hopi malo, e tabata experiencia problemanan mental.Huez a trece dilanti tambe declaracion di e victima. Segun e victima, ora el a topa J. den baño, el a pidi J. pa e Sali pa e por drenta baño.

El a splica cu J. a bira hopi agresivo y a scupi den su cara. Nan a cuminza lucha cu otro y e victima a cay abao. Segun e victima, J. a kita un kruk for di dje y a cuminza batie cune. J. tambe lo a ranca e wasbak kibra y a coi un pidi di esaki y a corte na su bil di pia.

Segun declaracion di docter, e corta tabata 18 centimeter largo y 6 centimeter profundo.
Ta asina tambe cu ora cu el a wordo corta, el a perde asina hopi sanger cu e tabata tin mester di un transfusion di sanger.

Huez a mustra tambe riba e hecho dos testigo a declara con J. ta esun cu a causa e problema despues di cual el a maltrata y corta e victima. Huez a trece dilanti tambe cu J. tin un carchi di castigo cu ta mustra cu el a yega di haya diferente castigo relaciona cu maltrato.

J. a splica cu hopi di casonan ey no tabata hopi serio y tabata tin di haber cu su estado mental, ora cu su mama tabata malo.  Fiscal a bisa cu e ta haya cu e atake tabata uno cu por a tuma bida di e victima, mirando e cantidad di sanger cu el a perde y profundidad di e herida.

Segun fiscal, e musculo di pia di e victima mester a wordo opera pa dreche y na e sitio mester a mara e pia corta cu un faha, stop e sangramento. Fiscal a exigi un castigo di 4 aña. Abogado Sven Faarup defendiendo e acusado a bisa huez cu no por considera e caso aki un intento di homicidio manera fiscal a bisa.

Segun Faarup, si J. lo a purba corta garganta di e victima bo lo por a bisa cu el a purba kita bida di e persona, pero den e caso aki ta e pia a wordo corta. E abogado a bisa tambe cu e declaracionnan di e testigonan tabata tin algun inconsistencia.

Faarup a bisa tambe cu su cliente a sinti cu e mester a defende su mes, mirando cu tabata tin solamente 1 salida y e victima tabata para dilanti di e salida aki. Huez sinembargo si a haya suficientemente comproba cu J. a hasi un intento di kita bida di e persona.

Huez a bisa tambe cu J. por a core bay for di e sitio, specialmente despues cu e victima a cay riba vloer. Sinembargo e no a hasi esaki y el a keda dal e persona cu e kruk y el a corte tambe despues.
Huez a dicidi di duna Jensen J.S un castigo incondicional di 3 aña, kitando e 7 lunanan cu el a sinta caba den detencion preventivo.

- Advertisement -

DUNA COMENTARIO

Please enter your comment!
Please enter your name here