Home Evenemento Actividad Di Organizacion Parkinson Aruba: Ban Topa OPA

Actividad Di Organizacion Parkinson Aruba: Ban Topa OPA

13
0
SHARE
- Advertisement -

Cu amor pa prohimo

ORANJESTAD (CUA) – Diadomingo dia 24 di October a tuma lugar e gran actividad anual titula “Ban Topa cu Opa” di Organizacion Parkinson Aruba (OPA) pa 10’or di mainta na Manchebo Beach Hotel.  E aña aki e fundacion a celebra 15 aña di existencia.

   A hiba palabra presidente, señora Rita Lopez Henriquez. El a duna palabra di bon bini na tur presente, entre nan señor Frank Velasquez, fisioterapista di OPA. 

 

   Señora Lopez-Henriquez a pidi despensa pa e ciruhano doctor Gregory Laclé cu no por tabata presente pa motibo di otro compromiso. Tur aña doctor Laclé y fisioterapista Velasquez ta acudi na e actividad pa informa y combersa cu e pacientnan.

    Manera semper Señor Velasquez ta demostra e ehercicionan cu por haci pa tene e musculonan flexible. Tambe Velasquez ta siña e pacientnan con pa traha, na un manera simpel, nan mesun instrumento pa revalida.

   E tremendo almuerzo a bay acompaña cu musica di un banda cu a pone un ambiente crioyo unda mayoria di e pacientnan a lanta marca paso. Durante di esaki, e directiva  a pasa saluda y  combersa cu tur miembro y nan famia. Ademas tur miembro a ricibi un regalo y e boletin informativo di OPA.

 

Meta

   Sra Berlinski a funda OPA na 1995. E tempo ey e tabata encarga caba cu  diferente fundacion na Aruba, ora cu un pacient di Parkinson a acerc’e cu e peticion pa lanta  un fundacion  pa pacientnan di Parkinson.

     Awe, e hunta di directiva di fundacion OPA ta consisti di siete persona: presidente Rita Lopez- Henriquez, Grace Beaujon, Greta Posner-Figaroa, Gloria Carlo, Aura Kolman-Bikker, Freda Maduro y Anna Pieters.

     E fundacion tin como meta  pa informa y guia pacientnan y nan famia cu recien a haya e diagnostico di Parkinson. E meta tambe ta pa intercambia experiencia y  brinda e pacientnan un mihor calidad di bida.

    Ademas di un actividad dos biaha pa aña, OPA ta haci bishita di cas pa duna tips y yuda unda cu por. Freda Maduro ta encarga cu Tai Chi pa e pacientnan tur diasabra mainta. Tai Chi ta e mihor manera pa tene e musculonan flexible.

    OPA tin 46 miembro registra, mientras cu Aruba tin como 200 pacient di Parkinson. Tin basta  pacient  na Aruba cu no ta acepta e malesa of cu ta sconde e malesa.

    Den OPA tin cuatro pacient cu a implanta exitosamente e asina yama “brain pacemaker” na Colombia (Deep Brain Stimulation).

    E calidad di bida ta un tiki mihor pa e cuatro pacientnan aki, pasobra e temblamento a kita completamente, aunke e otro sintomanan si tey ainda.

 

Kico ta Parkinson?

    E malesa di Parkinson ta ataca hende grandi entre 50 y 60 aña. E sintomanan ta: temblamento di man y pia, movecionnan poco poco, musculonan stijf, problema pa guli y problema di constipacion. Tin biaha Parkinson tambe por bin acompaña cu depresion.

   Ora cu e celnan den e sistema di nervio den e cerebro no ta produci suficiente “Dopamina” e malesa Parkinson ta manifesta su mes. “Dopamina” ta un substancia (neuro-transmisor) den nos cerebro cu ta manda señalnan di un cel pa otro. Esey ta pone cu e curpa no ta flexibel mas.

    Tin medicamento pa suprimi Parkinson pa un tempo, pero e ta un malesa progresivo cu no tin cura p’e. Ora e pacient ta den un fase avanza di e malesa, AZV ta cubri “Deep Brain Stimulations” (DBS) na Colombia. DBS ta un operacion unda ta implanta un “pacemaker” den e cerebro pa stimula e produccion di “Dopamina. E temblamento ta kita completamente, pero e resto di e sintomanan ta keda existi.

     Pa mas informacion por tuma contacto cu e presidente di OPA, señora Rita Lopez-Henriquez na atir-lh@hotmail.com of señora Grace Beaujon na telefoon 582.20.17

 Colaborador: Soraya Peterson

- Advertisement -

DUNA COMENTARIO

Please enter your comment!
Please enter your name here