Jeffrey Matos a splica:
Generacion nobo di 60 plus hopi interesa den e parti tecnologico!
ORANJESTAD (AAN): DIARIO a tene un entrevista cu Jeffrey Matos, Coordinador di Centro Kibrahacha relaciona cu nan proximo actividad pa recauda fondo.
El a bisa cu Diadomingo awor Centro Kibrahacha tin un fund racing grandi. Nan ta organice tur aña pero e biaha aki nan ta hacie mas grandi esaki den cuadro di 25 aña di nan fundacion.
Segun Matos e actividad lo tuma lugar entre 10’or di mainta y 5’or di atardi. Lo tin siete banda musical. Lo cuminza cu Nelson Sprok. Ta bay tin tres grupo di gaita manera Fortaleza, Sabroso, Paranda Ta Nos. Ta bay tin Papito y su lekker band, mientras cu atardi nan lo clausura cu Rincon Boys.
Durante henter dia lo tin diferente actividad manera , obra di man, minimarket, benta di mata ademas di un bar y un cuminda bon surti, a señala.
Fundacion Centro Kibrahacha kier celebra nan 25 aña hunto cu pueblo di Aruba, a recalca.
Ta bon pa menciona cu den oranan di mainta lo tin un zumba marathon caminda tur hende por inscribi na Centro Kibrahacha. Tambe lo tin un torneo di bolas y presencia di e grupo di Harley Davidson, a bisa.
E aña aki e meta di e fundracing ta pa cumpra un bus nobo pa transporta e miembronan y tambe verf e edificio, a laga sa.
A bin cu actividadnan nobo pa e generacion di 60 plus y pa sigui sostene e fundacion mester haci fundracing.
Actualmente nan tin dos bus cu ta core den diferente bario pa busca nan miembronan. Un bus ta costa 70 mil florin y pa verf e edificio ta mas o menos 30 mil florin.
Fuera di esey, a bisa, nan a logra otro metanan cu ta cambia tur e bentananan di e edificio como tambe nan actividadnan a wordo renova (internet café, entre otro).
Como fundacion nan tin cierto metanan cu nan kier logra y sigur mester di fondonan pa logra esakinan. Esaki nan ta logre atravez di e sosten di comunidad y sigur di comercio y Gobierno.
Centro Kibrahacha tin 200 miembro actualmente. E interes cu nan a pone ta pa traha riba e generacion nobo di 60 plus. Nos grandinan ta hopi interesa den e tecnologia moderno, a agrega.
Segun Jeffrey Matos, aña pasa nan a cuminza cu dos computer y despues nan mester a amplie cu cuatro computer mas. Awor e cantidad tambe ta bay sigui den aumento y mester yega sigur na un cantidad di 12 pa 15 computer pa asina por cumpli cu e demanda cerca nan miembronan cu hopi di nan ta bay e centro pa e actividadnan nobo cu nan a cuminza organiza.
E fundacion tin un subsidio di gobierno, a indica, y di Arubus pa transporte di e hendenan den e barionan mas leu.
Fundracing???