Home General Cualkier empleado di husticia cu test di droga positivo lo perde mesora...

Cualkier empleado di husticia cu test di droga positivo lo perde mesora su trabao!

0
0
SHARE
- Advertisement -

Gobierno trahando riba Landsverordening pa tin base legal:
ORANJESTAD (AAN) — Sindicato di Polis (SPA) ta pro pa su miembronan pasa e test di droga, y esaki ta un tema cu Minister di Husticia a papi’e cu SPA ya pa basta tempo caba. Asina e mandatario a laga sa den conferencia di prensa, dialuna cu a pasa. E mandatario a señala cu e minister di husticia anterior kier a haci esaki, pero pa e por tuma lugar mester tin un base legal. Esaki via un Decreto cu e minister y Gobernador ta firma, y Parlamento tambe mester ta di acuerdo cu e Landsverordening.
E dignatario a señala cu esaki ta importante pasobra si no tin un base legal e derechonan fundamental di hende. Pesey e tratado internacional ta bisa cu si un gobierno kier pasa un ley asina, mester hacie via ley.

Minister Dowers a señala cu gobierno ta trahando riba esey, na e momentonan aki, y ora e ta cla e hacimento di test ta cuminza. E titular a bisa cu tin hopi trayecto, pero pa Husticia, na momento cu ta traha den Cuerpo Policial, KIA of Ministerio Publico, ora di constata cu e ta uza droga, e unico consecuencia pe, ta cu e ta perde su trabao!

El a agrega cu di parti di su colega cu tin e cartera di Finanzas, den cual Douane ta cay, mescos ta conta.

Minister Dowers a subraya cu si den otro camindanan ta wordo constata cu tin empleado ta usa droga, nan ta considere como malesa, anto cu nan ta bay duna nan tratamento, terapia di resocializacion, etc., pero pa departamentonan di husticia esey no ta posible.

Esaki ta nifica cu si na momento di haci e testnan pa personal cu ta cay bao Departamento di Husticia, esnan cu sali positivo mesora ta perde nan trabao. Pero esaki por solamente basa riba ley y gobierno kier haci tur cos manera mester ta.

E dignatario a agrega cu un aspecto importante pa realiza ta cu test di droga tin sentido, unicamente si e ta wordo haci na un forma sistematico y sin aviso previo.

El a remarca cu logicamente e problema no ta cerca esnan cu no ta usa droga, pero cerca esnan cu ta consumi droga. Na momento cu un hende no ta usa droga e no ta worry cu un test, pero un cu ta use, e ta bay nenga di pasa e test. Y no por force si no tin un base legal. Na di dos lugar, segun pregunta di e mandatario, na momento di constata cu e persona ta usa -kico por ta e siguiente paso, si no tin un base legal?-

Asina el a splica cu e aspecto di mas principal ta, prome cu introduci e test di droga pa sector publico, tin e base legal. Den e cuadro civil ta otro pasobra esaki por forma parti di un contrato di trabao, unda tin e condicion pa e trahador no usa droga, y si e no ta cumpli cu esey e mester abandona su trabao, pero esey no ta e caso di gobierno y pesey nan ta bay traha riba e Landsverordening.

Minister Arthur Dowers a señala cu ta conoci cu tin ambtenaarnan ta usa droga, y cu tin di nan cu a bay pa tratamento, y tin di nan cu a bin back.

No obstante, el a reitera cu pa esnan di Husticia si ta wordo constata cu un polis, un cuidador di preso, etc., ta usa droga e consecuencia ta bay ta cu nan ta perde nan trabao pasobra no por otro, y no tin un segundo chens pa nan, pasobra nan ta esnan yama pa preveni y combati entrada y uso di droga, y no por ta asina cu nan mes ta coopera cu e trayecto. E ley aki por tuma su tempo, kizas algun luna pa drenta na vigor, Minister Dowers a señala.

- Advertisement -

DUNA COMENTARIO

Please enter your comment!
Please enter your name here