Den algun dia na Hulanda Prome Minister Eman a reuni cu mayoria di Gabinete Rutte
E trabao haci tabata di importancia, balor y intensidad grandi
Tambe a reuni cu lidernan di e fraccionnan di mas importante den tweede kamer
ORANJESTAD (AAN): Algun dia atras Prome Minister Mike Eman a sali pa rumbo pa Hulanda hunto cu un delegacion incluyendo Minister di Finanzas Mike de Meza. Ariba nan itinerario tabata tin dianan duro y hopi ocupa nan dilanti, pero na final di e bishita importante aki por bisa cu e frutanan lo ta hopi y di balor grandi pa nos pais. Prome Minister tabata tin un gran cantidad di reunionnan importante, incluyendo reunionnan cu mayoria di e ministernan di gabinete nobo Hulandes, lidernan di fraccionnan di mas importante, Comision Permanente pa Asuntonan di Reino, institutonan manera TNO, representantenan comercial y ainda a crea tempo pa topa cu un grupo di studiantenan Arubiano studiando na Hulanda.
REUNION CU MINISTERNAN DI GABINETE RUTTE-VERHAGEN
Prome Minister Eman y su delegacion a reuni cu entre otro Prome Minister Hulandes, Sr. Mark Rutte, Minister di Economia, Agricultura, Innovacion y Vice-Prome Minister, Sr. Maxime Verhagen, Minister di Defensa di Reino, Hans Hillen, Minister di Asuntonan Interno y di Relacionnan den Reino Sr. Piet Hein Donner y Minister di Infrastructura y Medio Ambiente Señora Melanie Schultz van Haegen y Minister di Asuntonan Exterior Sr. Uri Rosenthal. Y tur esaki den un tempo record di 4 dia.
E reunionnan tabata extenso, profundo y hopi productivo. Por a sinti cu na Hulanda e nomber di Aruba creando hopi respet pa e manera efectivo di traha di e Gabinete Mike Eman.
Entre otro, Aruba a haya elogio, sosten y aprobacion pa logronan manera Dialogo Social, esfuersonan pa implementa energia alternativo na Aruba, reestablece bon relacionnan den Reino, progreso den sector turistico y desaroyonan palpable den recuperacion di nos economia manera reapertura di Valero, regreso di KLM y Carnival Cruises y proyectonan clave pa revitalisa infrastructura, bario y centronan economico di Aruba.
REUNIONNAN CU REPRESENTANTENAN DI TWEEDE KAMER
For di banda di fraccionnan di Tweede Kamer tabata tin hopi interes tambe pa e desaroyonan na Aruba. E comision permanente pa Asuntonan di Reino a haya un discurso for di Prome Minister Eman cu a duna un relato hopi extenso di desaroyonan na Aruba.
Despues di e discurso, Sr. Eman a contesta preguntanan for di e miembronan di comision y un biaha mas Dialogo Social a resalta como un di e topiconan mas importante cu a bin dilanti. Dialogo Social ta e proceso, incluyendo gremionan sindical, comercial y gobierno, cu hunto a yega na solucionnan pa problemanan financiero serio y structural di pais Aruba y cu antes a kere cu ta insolucionabel. Te hasta for di parti di miembro di Tweede Kamer van Bockhove tabata tin pregunta ariba e topiconan di e siguiente Dialogo Social.
Banda di e varios reunionnan cu lidernan di fraccion di Tweede Kamer, e delegacion dirigi pa Prome Minister a reuni cu organizacionnan manera TNO ariba desaroyonan ariba energia alternativo y e manera cu TNO lo por duna un aporte na e desaroyo na Aruba.
Banda di tur esaki tambe tabata tin un mision comercial cu a haya atencion di Prome Minister, Minister di Finanzas y e delegacion Arubiano. Mei mei di tur e reunionnan, Prome Minister Eman a haya hopi importante pa reuni cu studiantenan Arubiano na Hulanda cu ta algo cu e ta haci cada biaha cu e ta den exterior.
BISHITA INTENSIVO
Loke a resalta for di e encuentronan di trabao di e delegacion ta e intensividad y seriedad cu Prome Minister Mike Eman ta duna na e trabaonan importante aki na Hulanda. Loke ta hopi importante tambe pa remarca ta e acceso cu Sr. Eman tin na e minister y representantenan di parlamento Hulandes cu ta algo masha beneficioso pa nos pais.
Un bon relacion y acceso na e top di e Hulanda ta pone Aruba den un posicion sumamente beneficioso. Hopi a bin ta comenta ariba e etica di trabao masha admirabel di Prome Minister Eman y su gabinete en general. E beneficionan pa nos isla ta evidente caba, pero manera cos ta mustra, frutanan di trabaonan duro y serio tin hopi mas bentaha na caminda.
