E weso di cachete cu diente, ta bay worde compara cu posibel otro casonan di desaparicion na Aruba
Segun Abogado General Taco Stein,
*E otro weso haya cerca di Westin, no ta weso humano
ORANJESTAAD(AAN): Despues cu Diamars Ministerio Publico a anuncia cu e weso di cachete cu diente no ta di Natalee Holloway, DIARIO a entrevista Abogado General (AG) di Ministerio Publico Taco Stein, pa haya sa mas rond di e investigacion riba e material haya na canto di laman.
DIARIO a puntra mr. Stein kico ta bay worde haci cu e weso, awor cu a constata cu no ta di Natalee Holloway.
E A.G a splica cu el a pidi Cuerpo Policial pa check tur e posibel casonan di desaparicion di Aruba, pa asina por compara e weso di cachete cu diente, cu datonan di e personanan cu lo a desaparece na Aruba.
Stein a bisa DIARIO si cu e proceso ta tiki complica, mirando cu na Aruba nos no conoce hopi caso di desaparicion.
El a bisa tambe cu mirando e hecho cu durante bastante siman nos tabata tin tempo basta malo, e pregunta ta keda, for di unda e weso aki a bin.
DIARIO a puntra Stein si e testnan haci na NFI na Hulanda, por determina di cuanto tempo pasa e weso ta y el a bisa cu no.
Segun e A.G., ta practicamente imposibel pa determina di ki tempo e weso ta, pero loke ta sigur ta cu e ta di bastante tempo pasa.
Te hasta tabata tin crecimento di coral riba e weso, pues ta practicamente sigur cu e ta di por lo menos 1 aña bay ariba.
DIARIO a puntra Stein si a haci test riba e otro weso haya cerca di laman pa un turista y el a bisa cu un patologo a mustra cu e weso no ta un weso humano.
DIARIO a puntra e abogado general tocante e hecho cu na television Mericano nan a bisa cu nan ta haya straño cu cuerpo policial no a cera e area unda e weso cu diente a worde haya, pa asina investiga e area.
Segun Stein, e weso a worde haya Diabierna y mesora Diasabra autoridadnan a cera e area y nan a busca pa posibel mas weso eybanda.
Polisnan te hasta a bay duik y asina a investiga bao di awa tambe, pa wak si por a haya mas material. Nada a worde haya den e area. A puntra Stein tambe kico e lo a nifica, si tabata weso di Natalee.
El a splica cu si lo a haya un confirmacion cu tabata weso di e mucha muher Mericano, lo tabata hopi bon pa su famia cu ta buscando ‘closure’. Sinembargo pa e caso mes, e weso riba su mes no lo por a duna suficiente pista pa yega na conclusionnan riba con e mucha muher a muri.
Unico cos cu lo tabata sigur ta cu e ta morto. DIARIO a puntra Stein con mama di Natalee a worde informa y el a splica cu O.M a tuma contacto cu abogado Mericano di sra Beth Twitty, esta John Kelly y asina a informe di e resultado di e testnan di NFI.
DIARIO a puntra Stein tambe di e rumornan cu a circula cu e weso awor lo worde manda pa Curaçao y el a bisa cu esey no ta berdad.
Curaçao mescos cu Aruba no tin e tecnologia y aparatonan pa haci e tipo di testnan cu ta rekeri.
Stein a bisa cu loke si el a bisa ta cu mirando cu Curaçao no ta leu di Aruba, lo por check e posibilidadnan cu quizas e weso por coresponde na un persona perdi di Curaçao, si no haya un ‘match’ cu personanan perdi di Aruba.
DIARIO a puntra Stein si ta confirma cu e weso ta di un mucha muher hoben y el a bisa cu no.
El a bisa cu loke a worde constata ta cu e weso ta pertenece na un adulto hoben, pero no por worde bisa cu seguridad cu ta un mucha muher.
El a splica cu den nos region tin diferente tipo di rasa di hende ta biba, cu diferente tipo di skelet y esey ta hacie dificil pa bisa sigur si e weso ta di un homber of muher
