Presidente directiva sr. William Philips ta splica:
“Aruba a caba di firma proclamacion Dia Mundial di Diabetes”
ORANJESTAD (AAN) — DIARIO a ricibi bishita di señor William Philips, Presidente nobo di Fundacion Diabetico Arubano. For di inicio di e aña aki, sr. Philips a tuma e posicion aki, despues cu dr. Alberto Ridderstap a retira.
E luna di November aki a wordo proclama pa FDA como e luna blou. Sr. Philips a duna nos informacion kico esaki ta nifica.
“ Esaki ta debi cu durante henter e luna aki, nos tin actividadnan. E prome tabata un tayer di trabao pa profesionalnan cu ta traha diariamente cu pacientnan cu ta diabetico. Pa esey nos a invita un Psicologo di Merca cu tin hopi experiencia riba e tema di sesionnan di motivacion.
“ Esaki kiermen cu ora nan ta den comunicacion cu e pacient nan ta haya tools y tips con pa relaciona na un otro manera cu e pacient, yude y motive mehor pa e cumpli cu su tratamento.
“ Esey tabata dos dia y el a resulta hopi exitoso. Tur e profesionalnan a bin hunto, y un relacion special a nace entre nan tur, cu ta bay tin mas cooperacion mutuo, y cu nan ta papia un mensahe pa cu e pacient”, sr. Philips a señala.
Ademas, e directiva tabata tin conversacion cu e minister, na ken nan a haci un peticion pa tambe Aruba firma e proclamacion di Nacionnan Uni, na unda dia 14 di November ta wordo proclama como Dia Mundial di Diabetes.
“ Siman pasa el a wordo firma y nos ta masha contento cu esey. Esey kiermen cu Aruba a uni cu e otro paisnan di mundo, mas cu 200, cu a firma e proclamacion aki.
“ Den e proclamacion ta wordo stipula cu:
- Ta wordo reconoce cu diabetes ta debilita e salud di hende
- Cu e malesa aki ta creciendo rapido na mundo. Tin mas cu 300 miyon di hende na mundo cu ta sufri di diabetes.
- Cu e malesa no solamente ta fastioso pa e pacient, pero tambe pa bida social (cas, trabao, etc.).
- E meta di e proclamacion ta pa tanto comunidad como gobierno bira mas conciente riba e malesa di diabetes y locual ta conduci na dje.
“ Fuera di esey nos a organiza tres anochi di charla, un a sosode caba na Santa Cruz, ayera a tene otro na San Nicolas, y otro siman Diahuebs tin e ultimo na edificio di YMCA na Dakota, cuminzando pa 7’or di anochi te cu 8.30’or. Un docter di cas hunto cu un dietista y un persona hopi conoci na Aruba cu ta diabetico, lo tey cu lo conta con el a cuminza y con e ta biba cu su diabetes”, sr. Philips a menciona.
