Permiso di construccion a keda otorga…
Megastore lo keda cla durante di cuater kwartaal di 2011
ORANJESTAD (AAN): Ayeratardi Kooyman a efectua e ceremonia di ‘groundbreaking’ como inicio oficial di actividadnan di construccion cu lo bay tuma luga na tereno di Primavera. Den luna di october DOW a entrega tur permiso pa construccion di e Mega Store, mesora a cuminsa cu e trayecto di construccion.
CONSTRUCCION DI MEGASTORE:
A busca pa basta tempo un sitio adecua pa e Mega Store na Aruba. E tereno lo mester tabata grandi suficiente, central y facil accesibel.
E tereno na Primavera ta cumpli pa gran parti cu nos deseonan. “Nos ta masha contento cu DOW a otorga nos e permiso di construccion, di e forma aki e contratista Bohama por cuminsa mesora”. Kooyman ta spera di por habri e Mega Store den e di cuater kwartaal di 2011. Na momento cu esey sosode, esun ubica na Dakota lo cera.
Kooyman ta activo na Aruba for di 1965 bou di e nomber di ‘De Antilliaanse Handelmaatschappij’. Na 2004 e nomber a cambia pa Kooyman pa di e forma ey e compania opera den henter Caribe bou di un solo nomber.
“Durante di e ultimo añanan nos a bin ta conoce un crecemento enorme den clientela. Pa motibo di e crecemento ey, hopi biaha nos ta worde limita den varios aspecto. Nos ta desea di keda brinda e variacion na nos clientenan cu semper nan a custuma, pero na mes momento nos kier crea mas espacio y amplia e surtido tambe, awor aki pa falta di espacio nos ta worde limita, esey ta motibo suficiente pa awor si construi un Mega Store pa Aruba”, esaki di acuerdo cu Herbert van der Woude, CEO di Kooyman.
‘ESUN DI MAS GRANDI NA ARUBA’:
E establecimento nobo por worde yama cu tur trankilidad un Mega Store. E grandura di e tereno ta 33.000 m2. Esaki por worde compara cu 7 veld di futbol. E edificio mes lo ta 17.000 m2 y lo tin aproximadamente 172 luga di parkeer.
Nobo pa Aruba lo ta e Drive Thru completamente bou di dak, estilo ‘indoor’ cu lo forma parti di e Mega Store. “Nos a introduci e concepto aki na 2002 pa Curaçao y el a resulta un exito completo. E ta un manera eficiente di cumpra material di construccion. Un otro bentaha grandi ta cu awor tur material di construccion lo worde warda ‘paden’ y esaki naturalmente ta na beneficio di e calidad, cu semper nos di Kooyman a brinda”.
BON PA ECONOMIA:
Construccion di e Mega Store sigur tin su efectonan positivo riba economia Arubano. E ta bon pa creaccion di cupo di trabao pa motibo cu Kooyman lo fortifica su team creando mas cupo di trabao pa di e forma ey keda brinda e bon servicio di semper.
Banda di esey e introduccion di e Drive Thru ta contribui na eficiencia den mundo di construccion, pa motibo cu e contratista local ta keda cla mucho mas lihe cu e compra di material cu ta nifica cu e por amplia su productividad laboral. Productividad di e contratista ta di vital importancia pa e por mantene su ‘tempo di entrega’ na su cliente y keda den e budgèt stipula pa su proyecto.
E hecho cu Kooyman a dicidi di haci e inversion aki na Aruba, ta nifica cu e empresa tin confianza pleno den futuro di e isla, y via di e construccion/ inversion di e Mega Store ta contribui na e desaroyo positivo di economia Arubano.
TOCANTE KOOYMAN:
Kooyman Aruba N.V ta forma parti di Kooyman Group for di 1965, e ta importador di material di construccion y ‘hardware’ cu 7 establecimento reparti den 4 mercado; Aruba, Boneiru, Corsou y St. Maarten. En total Kooyman Group tin aproximadamente 400 empleado di cual filialnan di Dakota y Cura Cabay tin 70. Riba fotonan adhunto por haya un impresion di e ceremonia di ‘groundbreaking’ cu a tuma luga recientemente.
