Negligencia por causa cu un mucha por bira victima di abuso sexual
Segun Minister di Husticia,
ORANJESTAD(AAN): Minister Arthur Dowers Dialuna a papia tocante e caso di e mucha cu tabata perdi y cu a wordo haya bek. Durante su conferencia di prensa, e Minister a bisa cu e mucha muher a pasa den un situacion sumamente dificil y cu el a tende varios comentario riba e caso aki. El a splica cu autoridadnan incluyendo polis a hasi lo maximo pa yega na un final di e caso.
E Minister a bisa cu e investigacion ta sigui y cu pesey e no por duna ningun detaye di e caso.
El a splica cu no mester descarta e posibilidad cu den e dia y simannan cu ta bay bin, personanan lo wordo deteni.
Ta hopi importante pa manda un señal na tur esnan cu ta hasi uso di debilidad di hende, unda cu en vez di saca un man y yuda e persona aki, nan ta comete abuso sexual riba dje. E mandatario a bisa cu tur medio legal ta bay wordo uza pa trece e criminalnan den e caso aki pa corte, pa nan wordo persigui.
El a splica cu tin hendenan cu no ta compronde cu tin regla y leynan cu ta stipula kico por y kico no por, pa loke ta trata mishi cu muchanan menor di edad.
E señal aki mester wordo duna y e Minister a bisa cu si ta necesario e lo publica e simannan cu ta bin, tur e leynan cu ta bisa ki ora bo por y ki ora bo no por tene relacion cu un persona di edad hoben.
“Hende mester compronde cu na momento cu nos haya indicacion cu esaki ta tumando lugar, lo duna instruccion na Ministerio Publico porta mas cu den pasado, pa bay tras di e hendenan cu ta hasi e tipo di cosnan aki y persigui nan”.
Esaki segun Minister Dowers, kende a bisa cu e ta sinti cu tin personanan cu kier hasi uso di hendenan inocente den comunidad y despues cu esaki sosode, tur e culpa ta cay riba e departamentonan di servicio di Gobierno, lubidando cu cada un di nos tin un responsabilidad den comunidad, pa cumpli cu e norma y reglanan cu tin stipula den nos comunidad.
Hende mester realiza cu hopi biaha ora muchanan hopi hoben bira victima di un persona abusador, e muchanan ta keda core e riesgo hopi grandi pa resto di nan bida. “Mi ta sinti cu e momento a yega pa nos bay un tiki mas duro contra esnan cu ta comete abuso riba mucha”.
Esaki segun Dowers kende a bisa tambe cu no ta solamente abuso sexual, sino tambe negligencia di mucha mester wordo combati. E negligencia por pone cu e mucha por bira victima di un persona cu ta comete abuso sexual
