Home Politica Partido MEP spanta cu e ley di pensioen rapport fowler plus

Partido MEP spanta cu e ley di pensioen rapport fowler plus

0
0
SHARE
- Advertisement -

Nada no ta keda secreto
ORANJESTAD (AAN): Durante añanan pueblo a perde hopi confianza den politiconan cu ta priminti pero ora toca turno cu nan mester cumpli, esaki no ta sosode.
Nel Oduber mes a expresa un biaha cu campaña ta un cos y goberna ta otro y dicho aki a haci cu e credibilidad di politiconan aki na Aruba a bay casi por completo atras den nos comunidad.
Pero September di 2009 pueblo di Aruba a dicidi pa un cambio y a vota masalmente pa esaki tambe cu e speranza cu lo cambia di un gobierno negativo y vengativo pa uno positivo, hoben y cu hopi gana di traha pa nos pais.


Esaki sigur cerca esnan di fraccion di MEP tabata un golpi hopi duro y ora cu nos analisa henter e situacion aki bo lo pensa cu MEP lo bay rehuvenece nan partido por completo, mescos cu AVP a haci desde 2001.

Pero esaki no tabata e caso pasobra personanan manera Nilo Swaen, Eddy Briesen y Booshi Wever a dicidi di tuma nan asiento den parlamento mientras cu Nel Oduber si a nenga su asiento den parlamento trahando asina lugar pa Xiomara Ruiz Maduro drenta den parlamento.

Pero loke cu nan niun no por a biba pensa ta cu Gabinete Mike Eman a saca for di e lachi di cashi e rapport Fowler cu gobierno anterior a sconde pa ocho aña largo, pa no hisa e edad di pensioen di un parlamentario como tambe di un minister na e mesun edad cu esun di e clase trahado cu si tin cu traha of warda te cu e edad di 60 aña pa ricibi nan respectivo pensioen.

Cu e anuncio di parti di Gabinete Mike Eman encuanto e cambio di e ley di pensioen, esaki a cay manera un baño di awa frieu atrobe riba fraccion di MEP como cu tin algun di nan cu ta sea ex-miembronan di parlamento of minister cu mester bay warda awor te cu 60 aña pa nan por reclama nan pensioen.

Pero tin algun di nan cu a expresa y a laga sa caba cu lo bay sali for di parlamento y bandona politica pa cobra nan pensioen paso cu e ley manera cu e ta awor aki ainda, ya nan a adkiri e derecho pa cobra nan pensioen di minister.

Esaki parce cu a trece un discusion interno pasobra lo no kier pa laga algun hoben drenta parlamento pasobra parce cu pa esnan sinta den parlamento awor aki e candidatonan cu ta sigui pa drenta un so ta cualifica y e otro dos nan ta considera lastrado di garoshi y ta pidi pa e trio aki no bay ainda.

Ta pesey cu fraccion di MEP a keda tur e tempo aki den silencio hermetico y awor parlamentario Eveline Wever Croes a sali declara cu no unicamente lo ta papiando di un aumento di edad di pensioen pero cu lo mester tin un supuesto aumento di pensioen pa parlamentario como tambe pa ministernan den cierto suma di placa y cu esaki ta un lollipop cu gobierno kier duna parlamento pa pasa e ley di pensioen.

E cortina di huma aki cu fraccion di MEP kier usa ta pa vota contra di e ley di pensioen, pa di e manera aki esnan cu tabata minister keda den parlamento y no bandona politica.
Loke cu ta mas tristo ainda ta cu awor cu ta toca turno na gobierno di Aruba y parlamentarionan entrega placa back na pueblo cu fraccion di MEP ta nenga di haci esaki y ta demostra cu MEP tey pa benificio propio como tambe pa friends & family.

Hopi di esnan cu a kere den e partido di MEP ta lamenta esaki y ta completamente decepciona cu e partido, maske cu segun e propio sostenedornan di e partido menciona a laga sa cu si MEP vota contra di e ley aki, cu pa proximo eleccion e voto nan di MEP lo ta asina facil pa conta pasobra esaki nan lo no ta mucho.

Pues no ta keda nada otro di sinta warda e dia yega cu e ley aki di pensioen worde trata den parlamento y pa nos wak si MEP lo vota contra of si na momento di votacion cu nan lo bandona sala di parlamento pa no vota.

Di e manera aki lo por saca un conclusion, esta cu fraccion di MEP no tey pa sirbi bienestar di pueblo si no pa sirbi bienestar y interes propio.

- Advertisement -

DUNA COMENTARIO

Please enter your comment!
Please enter your name here