Home General Pleitamento durante wega di futbol, a pone amigonan tira riba otro cu...

Pleitamento durante wega di futbol, a pone amigonan tira riba otro cu arma di candela y uno a haya bala cerca di curazon

1
0
SHARE
- Advertisement -

*Fiscal a exigi castigonan di 4 aña y 4 aña y tres luna
ORANJESTAD(AAN): Diahuebs na corte a tuma lugar un caso den cual Josephus A.J.R y Julio C.M a wordo acusa di a los tiro riba otro cu arma di candela, riba 3 di Juni 2010. E acusacion pa ambos a wordo considera un intento di homicidio. Banda di esaki nan a wordo acusa di posesion di arma di candela y J.M a wordo acusa di ladronicia den cas di hende. Pa loke ta e caso di tiramento, polis a ricibi un melding pa nan bao den Fiyo straat pa un caso di tiramento.
Tin testigo cu a bisa cu J.M a bin cu auto y a tira riba J.R. J.M sinembargo a bay hospital e anochi ey, pasobra el a haya un bala den su ribchinan cerca di su curazon.
Polis a hasi un test riba dje cu yama ‘schiethanden test’, pa asina determina si el a uza un arma di candela. Esaki a wordo manda Hulanda pa NFI y nan a constata cu el a uza un arma di candela.
El a declara na polis cu e tabata hungando futbol cu algun amigo den Centro di Bario Dakota y el a haya un pleitamento cu un amigo.

El a bisa cu na dado momento e amigo aki esta J.R, a menaze cu e lo mate. Segun J.M, den pasado el a yega di wordo hinca cu cuchio y pesey el a tuma e menaza na serio. El a bisa polis cu despues cu el a wordo menaza, el a core bay rancho y eynan el a puntra algun Colombiano cu e no conoce, si nan tabata sa unda e por a cumpra un arma di candela.

Nan a logra haya uno pe y el a cumpra esaki pa 500 florin. Huez a bisa e acusado cu e ta haya straño cu el a djis acerca personanan desconoci pa cumpra un arma di candela. J.M a splica cu na dado momento el a haya un yamada cu J.R lo ta buscando e.

El a bay na cas di un amigo y ora el a yega eynan, pa colmo el a wak J.R eynan. J.R a bise pa e bay for di eynan pa J.R no mate y J.M a contesta J.R cu e tambe tin arma. J.M a bisa cu e tabata den auto y el a cuminza core bay, ora cu el a sinta algo den su pecho.

El a ripara cu e tabata sangrando, pues cu el a wordo tira. J.M a splica polis cu ora el a wordo tira, el a slow down su auto, pasobra e glas di e bentana di patras cu a kibra a bay un tiki den su wowo.
El a tende varios tira y el a saca su arma di candela for di bentana y a los un tiro den laira y e ora ey a tiramento a stop.

El a bay for di eynan y busca su pareha pa esaki hibe hospital, unda el a wordo opera pa nan saca e bala. Segun rapport di polis, tin testigonan cu a bisa cu J.M a los varios tiro y polis a haya algun buraco di bala aki aya.

Polis a detene J.R, pero e schiethanden test no a indica cu el a uza un arma di candela. J.R sinembargo a bisa cu e no a tira riba J.M. Sinembargo den su prome declaracion cerca polis el a admiti cu el a tira.

Huez a puntre dicon el a declara cu el a tira y cambia su declaracion despues. El a bisa cu na prome instancia el a nenga cerca polis cu el a tira, pero door cu recherche a keda bise cu si e admiti cu el a tira den defensa propio, e lo por bay cas.

Fiscal a puntre si e te echt kere cu e lo por bay cas despues di admiti cu el a tira riba hende.
J.R a declara cu ora el a cuminza pleita cu J.M, ta J.M a menaze y cu na dado momento ora nan despues, J.M a saca e arma di candela riba dje.

El a splica cu no ta prome biaha cu J.M ta uza arma di candela. Huez a mustra riba e hecho cu tin testigo cu a bisa cu el a wak J.M los 5 tiro riba J.R y tin cu a bisa cu nan a wak J.R tira riba J.M.
Pa loke ta e caso di ladronicia, J.M a bisa cu el a bay na un cas hunto cu un tal Ronald cu e no conoce bon y el a kere cu ta cas di tata di Ronald.

Ora el a ripara cu ta horta R. tabata horta, el a Sali pafo y bay sinta den auto. Ora polis a hasi investigacion, nan a haya fingerprints di J.M riba un laptop den e cas. Pues pesey el a wordo acusa di a horta eynan.

Huez a trece dilanti tambe cu J.M den pasado a yega di cay cera pa ladronicia cu violencia y diferente otro caso di violencia. Fiscal a haya ambos persona culpable di a tira riba otro, pues intento di homicidio.

Tambe el a haya nan culpable di posesion di arma di candela y el a haya J.M culpable di a complice di ladronicia. El a exigi pa J.M un castigo di 4 aña y tres luna y pa J.R el a exigi 4 aña.
Abogado Chris Lejuez representando J.M a bisa huez cu su cliente ta para ariba cu el a tira na laira.

El a bisa cu polisnan a haya diferente bala na e sitio, pero nan no e haya e arma cu J.M a bisa cu el a tira den tal mondi. Pues nan no a hasi test pa mustra cu di berdad tur e balanan cu nan a haya, ta balanan cu a Sali for di arma di J.M.

Lejuez a mustra potretnan cu e mes a saca den e bario, cu ta confirma locual bisiñanan a bisa, pues cu mas biaha tin hende ta tira cu arma di candela den e bario. Lejuez a mustra huez por ehempel un borchi di trafico, den cual por a wak buraconan di bala di candela.

El a splica huez pues, cu e balanan cu polis a encontra na e sitio, no necesariamente mester tabata balanan di arma di candela di J.M. Pa loke ta e ladronicia, Lejuez a splica cu ora cu su cliente a ripara cu Ronald tabata hortando, el a dicidi di aleha su mes di esaki, pues e no por wordo acusa di a participa na esaki.

Abogado Peter Mohamed representando J.R a bisa cu e unico persona cu a bisa cu el a wak J.R tira riba e auto di J.M, tabata tanta di pareha di J.M. El a bisa cu su cliente ta para ariba cu e no a tira y e schiethanden test a mustra cu no por a wordo confirma cu J.R a uza un arma di candela.

Mohamed a splica tambe cu lo tabata practicamente imposibel pa J.R su bala dal den e parti di pecho di J.M, mirando unda e tabata para y con e bala a kibra e windshield di patras di e auto.
Segun e abogado, e chens ta grandi cu J.M mes a tira su mes cu su propio arma accidentalmente, ora cu e tabata los e tironan.

Pa loke ta e hecho cu Lejuez a bisa cu e balanan haya por ta balanan di casonan bieu, fiscal a mustra riba e hecho cu un di e balanan haya, a wordo haya den un palo y bo por a wak cu e tabata fresco. Huez a bisa cu e ta bay duna su veredicto dentro di tres siman, pues riba dia 9 di December.

- Advertisement -

DUNA COMENTARIO

Please enter your comment!
Please enter your name here