Diario Online

Preclearance di Imigracion Americano!

Publication: Tuesday, 30 November 2010. Categoria: Editorial

Ta cu cierto decepcion mi a tuma nota di e noticia cu Imigracion y Aduana Americano presente riba nos isla ya no ta bay asisti e vuelonan di mainta mas, pa razonnan economico y falta di presupuesto adecuado pa cubri overtime. Mi no sa si e noticia ta veridico, y cu e motibonan ta esnan indica, pero diferente persona a informami di e decision lamentable ey. Imigracion y Aduana Americano na vliegveld ta forma parti caba di nos structura di viahe, y e tarea cu e ta cumpli den e facilitacion di e bishitantenan pa Merca, ta di un balor incalculable. Mi ta corda tempo cu e no tabata existi, y nos mester a bay para na rij na Miami durante mas di un hora, pa logra admision na e gran pais Americano. Con cosnan por a yega asina leu mi no sa, pero nos mester haci un esfuerzo pa cambia e decision ey y asegura nos mes di e presencia y e servicio cu e ta brinda no solamente esnan di Aruba, sino tambe tur e turisanan Americano cu ta bin pasa tempo cerca nos.
Te unda cu mi sa, nos ta un di e dos único paisnan unda e servicio ey ta disponible den e area di Caribe. Na Bahamas mi tin entendi cu e ta existi y ta funcionando basta tempo caba. Na Canada tambe tin e servicio ey, cu ta un facilitacion enorme pa e viaheornan cu kier bay bishita famianan na Merca, o pasa vacacion o bay di compra ayanan. E presencia di Imigracion y Aduana Americano na aeropuerto ta pa nos un orguyo, ya cu e ta demostra un confianza grandi den nos isla. Un ekipo completo di hendenan cu experiencia den e ramo ta atende tur e viaheronan bayendo Merca na un manera rápido y eficiente.

Mi no ta mira con nos por djis cruza braza y laga e servicio aki ser kita di e vuelonan di mainta. Aki Gobierno tin e tarea di investiga e asunto pa mira con por soluciona e problema satisfactoriamente. Si ta pa motibo di presupuesto pa paga overtime, un sugerencia ta pa un combinacion di Gobierno cu sector priva ocupa su mes cu e diferencia cu falta pa cubri e pagonan di overtime, si esey ta e motibo. Mi ta sigur cu gustosamente hopi instancia cu conoce e balor di e servicio, lo ta dispuesto di aporta di nan parti pa solventa e dificultad.

Otro posibilidad ta pa e vuelonan di mainta tempran sali un poco mas lat, o sea despues cu Imigracion y Aduana Americano cuminza traha, digamos di 10’or di mainta padilanti. E no ta un imposicion ni e deseo di causa aerolineanan problema, sino di conserva e atencion extensivo na tur vuelo, mainta y atardi. E ta cumbini tur hende.

Si tuma nota cu awendia ta masha hopi famia Arubiano ta viaha pa Merca pa bishita familiarnan, o pasa vacacion, o atende cu docter, o simplemente cumpra nan articulonan di custumbra, e facilidad cu Imigracion y Aduana Americano ta brinda no tin substituto!

Tin, ademas, un riesgo den e decision di no atende e vuelonan di mainta mas. Una vez e ser cumpli, kico por garantiza cu e no por bira extensivo na tur vuelo cu ta sali di Aruba pa Merca? E no ta probable, pero e posibilidad ey tambe ta existi, y nos mester tuma e pasonan adecuado pa evita e bira realidad.

Mi ta sigur cu tur hende, mescos cu mi, ta desea pa e servicio continua sin interupcion, tanto mainta como durante resto di dia. Por ta cu ya e aerolineanan afecta lo ta pensando di reschedule nan vuelonan cu ta cay bao di e decision ey di Imigracion y Aduana Americano, pero nunca ta di mas lanza un voz extra di alerta.