Home Editorial Un Gobierno cu hopi autoridad moral!

Un Gobierno cu hopi autoridad moral!

11
3
SHARE
- Advertisement -

jossy_mansur_picPolitica na Aruba no ta separable den su esencia di esun di otro paisnan. Aunke nos ta limita den number di hende compara cu otro nacionnan, nos tin di tur manera e deber y obligacion di participa den e conduccion di nos isla na momento cu Gobierno presenta nos cu e posibilidad ey. De lo contrario, otronan ta tuma decisionnan pa Pueblo cu kizas no ta na su fabor, pero cu cual e mester biba pasobra e no a coopera ora e momento a yega pa participa hunto cu Gobierno den e gestion exigente di maneha e asuntonan publico di Aruba.
Den e ecuacion aki, autoridad moral ta, definitivamente, un factor determinante pa un lider politico o un Gobierno, pasobra ta solamente si e tine y Pueblo ta convenci cu ta asina, e por inspira y stimula comunidad pa kere den un vision y hunto cu Gobierno enfrenta e retonan pa realiza e vision ey. Den pasado, o sea cu e gobierno anterior, tres factor a afecta hopi e credibilidad di politica mes, y hunto cune, e politiconan na Aruba.


Factor number 1: ABUSO Y AROGANCIA di Poder. Nos a mira cu asombro con añanan di persecucion politico a tuma lugar, hunto cu metemento den Husticia, negligencia di Institutonan Constitucional manera Gobernador, Staten, Rekenkamer, Raad van Advies y un posicion omnipotente combina cu arogancia frente tur e socionan social di comunidad.

Nos por bise libremente (pasobra esey e tabata de facto): MEP a goberna cu portanan sera pa Pueblo! Factor numer 2: GAÑA PUEBLO. Haci promesanan durante campaña pa djey goberna sin un minimo di interes pa cumpli cu compromisonan, promesanan y expectativanan crea. Nos tur ta corda e famoso frase hipocrita: “eleccion ta un cos, Gobernacion ta otro cos.” Tambe:

“Gobernacion ta un triki”. No unicamente no cumpli, pero haci net lo contrario, priminti alivio pa djey carga Pueblo cu medidanan inhusto y for di sla, esey tabata un di nan normanan principal.
Factor number 3: USA PODER GUBERNAMENTAL PA ENRIKECIMENTO PROPIO. Añanan largo di ‘friends and family’ a haci hopi daño na credibilidad den politica en general. Hopi miyon di Florin a ser gasta den nombamentonan y promocionnan di rumannan di e gobernantenan, ademas di huurmento di edificionan di famianan, djey hopi otro miyon di Florin na oficina di abogado di famia, entre tanto otro asunto altamente censurable!

CAMBIO! Pero, Pueblo a spierta y a impone un cambio. Cune a drenta Aruba un estilo nobo di goberna, no contra Pueblo cu medidanan insostenible, sino cu Pueblo como socio den un asina yama ‘Dialogo Social’. Gobierno a pone su mes accesible pa scucha di e boca di e propio Pueblo cua ta su kehonan y kico e ta spera di su Gobierno nobo.

 Aunke e resultado di eleccion tabata asina abrumador, cu por a considere un mandato pa e programa di gobernacion di e Partido, ya dos dia despues di eleccion, Formador Mike Eman a cuminza sinta cu tur gremio na Aruba. Un luna largo di mainta te anochi el a scucha consehonan, kehonan y deseonan di mas di 50 organizacion, Instituto y Departamento di Aruba. E tabata un proceso di scucha durante formacion hamas conoci den e historia politico di Aruba.

Despues a bin un proceso di Dialogo Social. Lunanan largo a sinta cu gremionan sindical y comercial pa fiha conhuntamente cu Gobierno, e pasonan importante cu mester tuma pa e futuro di Aruba. Dialogo y cooperacion a substitui imposicion! A duna respet y dignidad na e pensamentonan di otro.

E Gobierno di Mike Eman a haci su mes accesible na Pueblo. Nunca antes Aruba a conoce un Prome Ministro cu tur siman ta tuma su dia liber pa dedica su mes na scucha Pueblo su deseonan, su problemanan y necesidadnan, di mainta ta anochi. Esaki ta un Gobierno cu ta bay den barionan pa duna cuenta di su Gobernacion y habri porta sin temor pa critica y conseho.

E introduccion di Town Hall Meeting ta otro cos grandi pa fortifica e democracia cu tin na Aruba. Un acceso cu ta yega den tur bario caminda hasta e Prome Ministro ta pone dianan di cita cu Pueblo den Hulpbestuurkantoor di San Nicolas, Savaneta, Santa Cruz, Paradera y Noord. Un transformacion di un Gobierno cu tabata sera, pa uno habri cu ta ofrece un grado importante di convivencia cu comunidad.

Nos Gobiernonan poco biaha a corda di duna cuenta na Pueblo di nan gestionnan administrativo. Cu e yegada di Mike Eman na poder, e situacion ey a cambia drasticamente. Ya Pueblo no ta den un dilema mas, e sa concretamente cu e Gobieno anterior a traha pa su mes y pa su grupito di privilegiadonan, creando rikezanan fabuloso pa nan riba custia di Pueblo, y cu esun di awor ta empeña den crea e mayor bon pa e mayor cantidad di hende.

Presentando na Pueblo su vision di loke e futuro di Aruba mester ta, y convocando e diferente sectornan influyente di comunidad pa comparti nan pensamentonan cu Gobierno y yuda den e formulacion di decisionnan, Mike Eman a propone na su mes di crea e estilo di gobernacion mas compatible cu e democracia bibo cu nos tin na Aruba. Honor, al fin y al cabo, ta pa esun cu merece!

- Advertisement -

3 COMMENTS

  1. Dios no por ser BURLA, loke e homber planta esei mes eta cosechá!!!

    Aruba por wordu halsá, ma pa medio di hende rekto, pero pa medio hende malvado Aruba ta keda trastorna pasobra e homber perverso su kaminda ta torci y straño mas e homber di ECHO nan limpi ta recht; e politiconan cu boca engañoso ta politiconan malvado cu ta daña nan PROHIMO nan cu fruta di nan konducta pasobra perversidad tin den nan curazón, nan ta sembra dicordia den nan Pueblo, pa probecho personal, pero nan calamidad a bin direpente y subidamente nan a ser quebranta y no tin remidi pa nan pasobra soberbia abin hunto cu deshonra pasobra e malbadonan hacidonan di obra nan falso no a cana den ITEGRIDAD.

    Husticia di hende RECTO ta ENGRANDECE y LIBERA un NASHON, pero perversonan ta praktika INHUSTICIA y ta distrui Nashon y nan mes. Tin caminda cu ta parse pa e malbadonan bon pero na final morto ta spera nan. Politiconan hacido di BOFON a dividi e Pueblo Arubano pa probecho material y nada nan no por saca for di e mundo aki pasobra nada nan a trece den e mundo aki, sunut nan a bin y sunut nan ta bai y otro lo goza di nan BOTIN, nan por salba di e juicio di carni y sanger, asina jama investigashon cientifico, pero di Juicio di E Gran Trono Blanco nan lo no salba, pasobra esei ta mas segur cu e dia di mañan. Sembradonan di HUSTICIA tin nan GALARDON segur!

    MEP,…por sigi adora IMAGEN libertador morto mescos cu nan, pero Jesús a bisa: E ta e kaminda, y e berdad, y e bida; ni un hende no ta bin serka e Tata, sino pa medio diE. Juan 14:6

    http://www.arubainjustice.com
    http://www.koninginnlwatismensenrechten.com

  2. Mr. Mansur mi ta gozabo si, mester a agrega un pida chikito na e titulo aki y pone, ” Compara cu e politica di gobierno di Nel “.

  3. Cada cuando mi ta drenta den pagina via internet pa sa kiko ta pasando na Aruba. Mi pregunta ta pakiko ningin representante oficial di Aruba no ta aparece den Medio pa splica e ultimo susesonan den e caso di Natalee Holloway. Na merca CNN y tur medionan ta laga nos pasa manera incubridornan di asesinato. Medionan di communicashon aki no ta mustrando un lus justo di nos isla, i ta parce cu ningun hende na Aruba ta tumba e tempo of curashi pa mustra cara y duna un entrevista of communicado tocante e caso.
    Mescos cu Americanonan ta defende nan hende, laga nos tambe mustra cara i defende nos imagen. Aruba semper tawata un luga sigur, bunita y cu hendenan di noble curazon. Ken ta durf di mustra su cara i defende e imagen di Aruba, Nos imagen di hende decente y respeta manera nos himno a sinja nos?

    Eula Van Der Biezen
    Houston, TX

DUNA COMENTARIO

Please enter your comment!
Please enter your name here