Home General Artista Arubiano “Bobby Farrell” A Muri Na Rusia

Artista Arubiano “Bobby Farrell” A Muri Na Rusia

19
2
SHARE
- Advertisement -

s-BOBBY-FARRELL-DEAD-largeORANJESTAD (AAN)—Ayera manta algo despues di 8 or mi a haya yamada for di Hulanda. “Juby, The Dancer gone!!” Mi a puntra mes ora: “you mean Bobby?” y e contesta tabata : “yes Roberto ……, in Rusia!”

E ora ey mi a wordo informa cu Roberto “Bobby” Alfonso Farrell a muri durante su gira na Rusia den e ciudad St. Petersburg.

Mi pensamento a bay bek pa e teenager cu tabata gusta balia den bar di boy den Bernhardstraat cu despues a bira Rising Dragon.

Prome cu Michael Jackson a bira fama pa su pasonan Bobby tabata tin esakinan y hasta tabata wordo comenta na Europa cu Michael Jackson a coge pasonan di baile di Bobby pa usa den su bailenan. Prome cu Bobby e unico cantante cu tabata tin su propio pasonan special tabata Elvis Presley cu su pasonan di Rock and Roll.

Bobby a bandona Aruba cu 15 aña di edad na 1965 pa bay nabega. El a bin termina na Noruega y di eynan el a biaha pa Hulanda unda el a keda biba prome cu el a muda pa Alemania y despues bolbe pa sigui biba na Hulanda.

E tabata un discjockey na Alemania y eynan a wordo descubri pa forma parti di e grupo Boney M cu a cuminza na 1974 bao direccion di Frank Farian.

Su productor a declara cu Bobby casi no a contribui casi nada vocalmente den e grupo y cu e mes, Frank Farian, tabata canta e partinan di Bobby pa grabacionnan den studio. E mucha muher di e grupo, Liz Mitchell a declara tambe cu ta e y Farian a canta e cancionnan exito y cu Bobby a duna presentacion en bibo den algun di e encarnacionnan di Boney M. Ta na principio di e decada aki esaki a wordo revela.

Por a mira Bobby Farrell como bailarin den e video clip di Roger Sanchez di 5 aña pasa. E tabata tin talento natural pa baile.

E talento aki ta locual a dune fama como bailarin mientras cu tabata conoci cu canto no tabata su parti fuerte.

Mes ora despues di a tende di morto di Bobby, mi a cuminza busca tur informacion posibel pa agrega na e “poco’ cu mi sa, pa asina informa nos lectornan.

E hoben di parti caribense di Hulanda, e hoben bailarin naci na Aruba 6 di october 1949 a haya fama mundial despues cu “Daddy Cool”, y Sunny” na 1976, despues cu “In the rivers of Babylon”, tambe cu “Ma Baker” cu tabata un tributo na Josephine Baker.

Bobby a demostra despues cu Boney M a kibra, cu e por canta y a desaroya su canto y cera boca di hopi hende.

Su conocimento ( como arubiano) di idioma tambe tabata un parti fuerte di dje den su presentacionnan. E tabata popular pa su fusion di musica disco cu calypso. Conoci tabata tambe  “Brown girl in the Ring” y e cancion navideño “Mary’s Boychild”

Bobby Farrell a wordo haya morto riba cama di hotel na St. Petersburg. Causa di su morto no ta conoci.

E tabata riba gira cu su grupo na Rusia.

Algo cu hopi hende no sa di dje na Aruba ta cu Boney M cu Bobby Farrell ta e prome grupo musical di occidente cu a wordo invita pa un lider sovietico na duna presentacion na Union Sovietica.

Tabata e lider sovietico Leonid Brezhnev cu a manda un avion militar special pa busca Boney M na London pa presenta na Moscu, unda nan a canta pa un Plaza Cora repleto di hende.

E grupo original di Boney M cu Bobby y 3 vocalista femenino a kibra na 1986 bolbe uni 2 aña despues y na 1989 el a kibra definitivamente.

Bobby a bay biba na Hulanda a sigui su so, y despues tambe cu un grupo vocal di varios dama di color, pero manteniendo su estilo di bisti colorido y elegante.

Esaki desde 1992. Cuatro aña pasa tambe el a presenta cu The Toppers den un concierto den stadion Arena di Amsterdam

Su giranan tabata bao di nomber di Bobby Farrell’s Boney M.

Diaranzon anochi, segun informacion di su agente John Seine y cu a sali publica despues, Bobby a laga sa despues di show cu e no ta sinti bon. .

E lo tabatin problema di respiracion ,pero ta conoci tambe cu Farrell pa basta aña tabata tin su problemanan di salud tambe, bay y bin, principalmente ultimo 10 aña.

Bobby Farrell tabata casa cu un ex modelo di fotografia y e pareha tin dos yiu.

Nan a divorcia na 1994 despues di aresto di Bobby cu el a wordo acusa di a basha gasoline riba su señora y menasa di cende na candela.  Un amiga e señora a logra evita esaki na ora. Bobby y su esposa tabata tin problema encuanto derechonan di propiedad di e nomber Boney M.

Bobby a ricibi un castigo condicional y e mes aña nan a divorcia.

Bobby no tey mas, pero su nomber lo sigui wordo menciona ya cu e ta wordo considera como un leyenda musical na Europa y varios pais.

Cu “The Dancer” sosega na paz.

                                                         Juby Naar.

- Advertisement -

2 COMMENTS

  1. Juby,
    Thanks for the excellent coverage reported on Boney M. Could not find any other report to top yours. San Nicolas lost a most talented artist.
    May he find eternal rest.

DUNA COMENTARIO

Please enter your comment!
Please enter your name here