Home General Caso contra Levestone y Mathew yen di acusacion pisa

Caso contra Levestone y Mathew yen di acusacion pisa

5
0
SHARE
- Advertisement -

ORANJESTAD(AAN)– Ayera a tuma lugar den corte tratamento pro forma di e caso contra Michael Levestone y Alex Mathew, conoci como caso Foxy Lady. E acusacionnan tabata pisa saliendo for di buscamento di hendenan cu lo a wordo explota, for di Merca, Europa y na Aruba mes, te cu maltratonan y abusonan contra e trahadornan. Tabata tin entre otro menciona presunto explotacion di hende pa traha bao di varios tipo di menaza di violencia, engaño, maluso di condicionnan, transportacion forzoso pa lugar di bida pa nan duna servicio sexual y asina por sigui menciona. E caso contra e acusadonan a haya diferente birada y a dura varios ora te cu DIARIO mes a bay for di corte na momento cu lo tabata tin basta tempo mas pa e tratamento.
Den e parti di explotacion a bin dilanti tambe e presunto intencion di saca ventaha di explotacion di e personanan en cuestion door di diferente biaha pone e victimanan bao di presion pa traha y a tene nan documentonan di identificacion , menaza e victimanan, zundra y rebaha nan door di pone nan tene relacion sexual y haci otro actonan sexual cu nan na un manera bruto y contra nan boluntad, a haci grabacionnan sexual di nan.

A maltrata nan, stroba nan di mantene contacto cu nan famia y amistadnan, tambe laga nan pone tattoo obligatorio, no a paga nan manera palabra y a determina nan ora di trabao y sosiego, prohibiendo nan di sali no-acompaña y vigila extrictamente.

Pa esaki a usa tambe hasta aparaturanan, y a laga nan traha bao di reglanan estricto, usando guardaespalda, dunando e victimanan castigonan disciplinario y mantene un sistema di multa.
E acusadonan tambe a wordo acusa di un of otro manera a participa of lidera un organizacion cu tabata tin cometi crimennan como meta entre otro.

E caso a wordo trata Pro Forma. Normalmente un caso pro forma no sa tarda hopi, pero e caso aki a dura varios ora.

E caso a hala hope atencion, mirando tambe presencia di 3 abogado, 3 fiscal y un huez den sala di corte, cu a bin pa wak e caso pro forma aki.

Fiscal a cuminza na bisa cu e caso lo wordo posponi te cu dia prome di April, cu tambe ta bay ta un tratamento pro forma.

Riba e fecha ey ta bay traha un tipo di itinerario y structura, riba con e caso ta bay wordo trata.
Esaki mirando tambe e cantidad grandi di testigo den e caso aki.

Despues di 3 ora di tratamento di e caso, DIARIO a bay for di corte, pero segun informacion, e caso a dura algun ora mas y atrobe e sospechosonan a pidi pa e huez encarga cu e caso, wordo cambia.

E caso aki lo continua riba prome di April y si tin detayenan importante cu a bin acerca, DIARIO lo publica esakinan despues.

- Advertisement -

DUNA COMENTARIO

Please enter your comment!
Please enter your name here