Home Editorial CRIMINALIDAD!

CRIMINALIDAD!

5
2
SHARE
- Advertisement -

jossy_mansur_pic            Ya criminalidad na Aruba a yega un nivel intolerable. Tiroteonan ta ocuriendo cu un frecuencia increible, y e daño cu nan ta causa, no solamente na e victimanan, sino tambe na nos isla, ta indescriptible. Bo no ta sintibo sigur mas riba un isla cu tabata un modelo di trankilidad y tolerancia apenas algun aña pasa. Entre asaltonan, atakenan y ladronicia, e paz di nos ciudadanonan a ser afecta di tal forma cu nan ta biba bao e sombra di temor.  Sali anochi riba caya ya no ta un riesgo so, e ta tambe un imprudencia. Bay un centro nocturno pa pasa un rato agradable a para bira un aventura den un jungla pobla pa agresornan sin consenshi. Kico cu ta por sosode sin spera, y si suerte ta di bo banda bo por sali ileso di cualke incidente. Si no, anto bo a caba di conoce bo mala suerte.

            Mi no sa ta unda mester cuminza pa frena e ola di criminalidad cu ta azotando nos isla, y cu especialmente den e epoca di fin di aña, conoce un auge grandi. Ta logico cu e malandronan no ta respeta Ley. Nan ta pasa riba dje na nan antoho, pasobra nan sa cu si nan ser apresa mes y ser hiba dilanti di Huez, lo mas probable ta cu nan ta ser poni den libertad sin castigo, o ta haya uno insignificante. Ultimamente nos a mira sentencianan asina ridiculo cu nan no bal ni sikiera un comentario. Ta te e nivel ey di inconsenshi cosnan a yega den e pasiyonan di Husticia.

            Mas polis riba caya? Claro cu e ta yuda, pero e no ta elimina e problema. Castigonan mas pisa? E lo ta un contribucion real pa frena e ola di robonan y otro tipo di crimennan cu ta tumando lugar na Aruba. Den e ultimo dianan di aña, mi ta lamenta di tin di aborda un tema cu ta crea preocupacion den Pueblo, pero mi mester hacie pa purba sacudi e consenshi di e Fiscalnan, Hueznan y otro autoridadnan encarga cu e situacion. Nos no por sigui riba e rumbo aki, pasobra e lo conduci nos na e ruina total di e trankilidad cu semper tabata un orguyo pa nos tur cu ta biba aki, y un propaganda atractivo pa esnan cu ta sinti e deseo di bishita nos isla y a yega di hacie caba den pasado cu gran satisfaccion.

            Un cos ta sigur: nos mester contraresta e subida radical di criminalidad na Aruba. Mustra dede riba e actual Ministro di Husticia y e Comisario di Polis como responsablenan ta parcemi improcedente pasobra ningun di nan dos a contribui den e forma mas minimo den e auge di criminalidad cu ta azotando nos isla. Cu nan tin den nan mannan e instrumentonan legal pa haci mas cu otronan den comunidad ta cierto, pero di otro banda nan tambe ta mara na Leynan anticua y completamente inutil den hopi caso.

            Kico ta warda pa cambia e Ley di defensa propio mi no sa, pero ey bo ta haya un bon comienzo. E idea no ta pa crea un ‘wild west’ na Aruba, cu tur hende arma te nan dientenan na nan casnan, sino pa lanza un campaña di informacion (y educacion) cu ta yega tambe na e oidonan di e malandronan y e por baha e violacion di casnan pa causa daño den un porciento basta halto. Personalmente mi no tin nada contra pa un ciudadano tin den su poder e instrumento cu por yude scapa su bida o esun di cualke familiar. Si ta den e rumbo ey nos mester bay, “que así sea!” Pasobra nos no por entrega nos isla tampoco na e bandidonan cu a invadi nos cayanan. Si e autoridadnan no por, o no ta dispuesto di tuma e pasonan corectivo, anto ta e ciudadania mes lo mester hacie pa nan mes.        

- Advertisement -

2 COMMENTS

  1. Jossy bo tin rason,mester bini cambio.Maske cuanto papia.Tur leynan ta basa riba leynan hulandes.Waak na hulanda nan tini mes problema.Si Aruba lo bira wild wild west ta sigur.E statement di pariba di brug i pabow di brug mes ta bisabo.Cos no ta bai bon.I cos lo no bai drecha si Aruba no cleanup the house awor.

DUNA COMENTARIO

Please enter your comment!
Please enter your name here