Home General Dos ora di accion di protesta, door di trahadornan di Corte!

Dos ora di accion di protesta, door di trahadornan di Corte!

0
0
SHARE
- Advertisement -

protesta1Un Huez a duna nan razon:
Incertidumbre riba nan posicion huridico!
ORANJESTAD (AAN) — Un accion di protesta di dos ora, e trahadornan di Corte a tene diabierna ultimo, relaciona cu un carta cu nan a ricibi for di Minister di Husticia. DIARIO a entrevista e Vicepresidente di SEPPA, sr. Edmundo Marlin, tocante e situacion cu a presenta. Marlin a duna di conoce cu esaki ta debi cu e trahadornan di Corte a manda un carta pa Minister di Husticia, den cual nan ta expone cierto puntonan di atencion, y a duna e dignatario te cu diahuebs di e siman aki, pa contesta nan, locual no a tuma lugar.


Pero si, nan a ricibi un carta for di e mandatario, di fecha 7 di December, den cual e ta indica cu e “tempo di pensa” ta cuminza entrante 1 di Januari 2011. Segun Marlin nan tin un problema cu esey, pasobra si no tin henter e pakete regla, entre otro pension y AZV, e trahador no por tuma un decision riba su mes pa wak kico ta e condicionnan pa drenta den Hof, of dicidi pa keda den gobierno.

El a reitera cu gobierno no tin nada regla y cu no por ta asina cu e minister ta bisa cu e tempo di pensa pa e trahadornan te cu entrante 1 Januari ta cuminza conta. Pa SEPPA esey no por, tanten cu nan no tin e pakete pa wak door di dje.

E momento di pensa ta cuminza ora e trahadornan haya e pakete y locual e sindicato ta pidi ta pa nan haya e pakete completo pasobra si no ta asina ta tempo cu nan ta perde, ya cu nan tin cu tuma nan decision riba nan mes si nan ta keda, of no, den servicio di Hof.

E sindicalista a subraya cu SEPPA kier pa gobierno reacciona riba e puntonan di interes di e trahadornan, y cu e fecha di 1 di Januari proximo no por bay door, mirando cu e reglamento pa personal, e statuto social, como tampoco e asuntonan di costo di cuido medico y AZV no keda regla, nan no por tuma un decision si ta drenta servicio di Hof.

Marlin a expresa cu un di e Hueznan a sali bin y el a duna e trahadornan razon y a bisa nan cu enberdad si no tin claridad e trahadornan no por tuma un decision.

Aworaki, Minister podise no ta na Aruba, pero nos pais tin un gobierno cu mester ta atento cu tur e procesonan cu ta tumando lugar cu e trahadornan aki, y esaki ta nifica cu mester tin un reemplazante pa Minister di Husticia, cu mester tabata tin e diligencia di contesta e carta na e trahadornan cu a duna gobierno un ultimatum te cu diahuebs 4’ or di atardi, pero nan no a contesta.

E sindicalista a subraya cu e trahadornan ta mustrando con serio e asunto aki ta, y nan tin cu mustra nan mal contento y duna e mandatario tempo pa contesta. Pero si e minister ta tuma esaki riba su mes y bisa cu e ta contesta na su debido tempo, e no por spera otro reaccion di e trahadornan.

Marlin a acentua cu dudanan e sindicato tin hopi. Y esaki no ta na e trahadornan di Corte na Aruba so, pero tambe esnan na Curacao, pasobra tampoco nan ta comprondiendo e posicion huridico cu nan ta bay haya y con esaki lo wordo regla.

Marin a señala cu esaki ta un aspecto hopi esencial pa e trahadornan, cu mester compronde cual ta nan posicion huridico ora nan no ta ambtenaar mas, sino cu nan ta empleadonan publico di Hof. Pero con esaki lo wordo regla? Bao un CAO?

Esakinan ta pone e empleadonan aki sinti nan mes den incertidumbre si nan ta drenta den algo cu nan no sa mañan kico por pasa, segun sr. Marlin, y tin cierto preguntanan con e proceso aki ta canando, y cu no tin claridad.

SEPPA su filosofia ta cu placa no ta tur cos, pero e seguridad laboral cu nan tin ta mas importante, y akinan e punto di discusion ta sinta.

- Advertisement -

DUNA COMENTARIO

Please enter your comment!
Please enter your name here