Home Politica Hopi ciudadano na Aruba no tin awa ni coriente na cas!

Hopi ciudadano na Aruba no tin awa ni coriente na cas!

3
0
SHARE
- Advertisement -

Lider di PDR conmovi y preocupa:
E parlamentario lo haci un encuesta confidencial
ORANJESTAD (AAN) – Parlamentario y lider di fraccion di PDR, mr. Andin Bikker, a mustra conmovi, pero tambe hopi preocupa debi cu un cantidad grandi di ciudadano, na e momentonan aki, no tin awa ni coriente den nan cas, pasobra nan no por a paga of nan a yega na e cen pero falta e 50 florin di re-conexion. Parlamentario Bikker a haya sa di e situacion pa motibo cu el a bishita diferente cas, unda el a constata situacionnan financiero basta delicado, locual e ta haya hopi tristo y lamentable.


“ E situacion aki no ta di un of dos luna, pero di mas tempo. Tin personanan cu ta fiando awa y coriente pa varios luna caba, bibando den situacionnan sumamente deplorable. “ Loke mi kier haci ta un encuesta confidencial, cu tur e personanan cu ta den e situacion aki. Ayera, por ehemplo, mi a bishita un cas di un famia cu no sa na unda pa nan bay, na ken pa acudi.

Nan ta hopi desinforma y mi ta kere cu lo ta bon pa nos haci un encuesta pa canaliza, por ehemplo, cu Sociale Zaken si e personanan aki a bay cerca nan caba, y otro instancianan caritativo, cu tambe ta duna ayudo, pero mas cu tur cos cu WEB”, mr. Bikker a señala.

El a agrega cu pa loke ta trata coriente, kizas den dia e famia no mester di dje pa cierto aspectonan, pero awa si ta algo fundamental pa higiene, etc., y e ta un derecho humano y basico, cu den cierto hurisprudencia a wordo confirma cu no ta sin mas bo por yega kita e conexion di awa for di un hogar.

“ Ami kier informa e personanan cu ta den e situacion aki por yama libremente na mi telefon, cu ta 730-0000 of yama na Parlamento, of laga un nota aki den Parlamento den un envelop cera cu e informacion, y asina nos por tene un encuesta pa nos por haya sa specificamente y follow up riba e casonan aki, pasobra mi ta haya esaki hopi lamentable, y ta duel mi curazon masha hopi mes, di cuanto caso mi ta constatando ultimamente, di personanan gewoon sin coriente y mas cu tur cos sin awa.

“ E situacion ta hopi deplorable, y mi no ta kere cu den un pais manera Aruba cu nos ta pensando riba tur sorto di proyecto gigantesco y ambicioso, tin hendenan cu ta pasando aworaki den un situacion asina dificil cu nan no sa di cual skina ta bin e proximo baño cu nan ta bay tuma. Esaki mi ta haya ta hopi lamentable, y mi no ta kere cu nos mester laga e cos aki pasa”, mr. Andin Bikker a subraya.

Bikker a pone acento riba e hecho cu e sumanan cu hopi di nan ta debe WEB ta relativamente chikito, compara cu loke nan tin cu paga pa e servicio wordo conecta back, cu ta 50 florin, y cu ta stroba nan, pasobra nan por tin e suma pa paga e consumo pero e 50 florin ey nan no tin.

Parlamentario mr. Bikker a lanza un critica na WEB Aruba NV cu nan ta cobra 50 florin pa re-conecta, cu hopi biaha ta mas cu 10% di e suma cu e consumidor a acumula na su debe.
“ Pa cuminza, WEB mester kita e suma aki cu nan ta cobra pa re-conexion, pasobra esey caba ta un obstaculo”, Parlamentario mr. Bikker a remarca.

E lider di PDR a bisa cu nan ta bay atende cu esaki y pidi un reunion mas pronto posible di e comision cu e ta presidi, cu ta encarga cu companianan estatal, pa papia cu WEB riba e suma aki di re-conexion di meter di awa, cu na su concepto mester a wordo kita, pero ayera!

- Advertisement -

DUNA COMENTARIO

Please enter your comment!
Please enter your name here