Home General Huez a dicta na fabor di directora y director interino di SIAD

Huez a dicta na fabor di directora y director interino di SIAD

13
0
SHARE
- Advertisement -

JudicialORANJESTAD(AAN): Diaranzon Huez a duna su veredicto den e caso cu Directora di Servicio di Impuesto y Aduana (SIAD) Ritza Lopez Hernandez y Director interino Cesar Angela a entama contra Minister di Finanzas, Comunicacion, Utilidadnan y Energia Mike de Meza.
Nan a entama e caso aki, pa motibo cu e Minister a baha nan for di nan puesto y a instala un management team riba 16 di November 2010 na nan lugar, pa por lo menos 1 aña.
Riba 18 di November Angela y Hernandez a haya un carta den cual nan ta wordo notifica cu nan lo tin un puesto como consehero di e management team.
Tambe nan a wordo informa cu durante e periodo cu e management team ta activo, nan no ta wordo permiti di drenta e edificio. Ta solamente ora e management team haya necesario, nan lo wordo permiti di drenta.

Angela y Hernandez pues a lanta e caso pa pidi huez pa elimina e decision di Minister.
Un di e motibonan pa e decision di Minister tabata e resultado di un quick scan di SIAD na October.

Segun abogadonan di Hernandez y Angela, e prohibicion pa nan drenta e edificio ta solamente permiti si ora cu un investigacion ta bay tuma lugar, unda cu pa bienestar di e investigacion e miedo tey cu e ambtenaarnan por laga cierto documentonan desaparece, of si nan presencia por stroba e investigacion.

E abogadonan a splica huez cu den e caso aki esey no ta e caso. Ademas di esaki nan a trece dilanti cu si duna un prohibicion di drenta e edificio na ambtenaarnan halto, esaki por ta solamente durante un periodo di 4 siman.

Mirando e prohibicion aki, e situacion aki mester wordo considera como un suspencion di e ambtenaarnan, cual e Minister no tin e autoridad di hasi, segun e abogadonan. Ta solamente e Gobernador tin e autoridad pa suspende e ambtenaarnan aki.

E abogado representando e Minister a pidi huez pa declara e peticion di e ambtenaarnan como no admisible, pasobra e Minister no ta wak ki motibo e ambtenaarnan tin cu lo ta urgente, mirando cu ambos ambtenaar ta keda cu nan salario y nan ta mantene nan posicion huridico.

E abogado a trece dilanti tambe cu ta for di hopi tempo caba tabata tin hopi reclamo riba funcionamento di SIAD. Ademas di esaki e Minister tabata di opinion cu Angela y Hernandez a purba stroba e negociacionnan entre Pais Aruba y Valero.

Tambe lo tabata tin un discrepancia cuestionable di 11.7 miyon florin, entre cierto cifranan na SIAD. E abogado di Minister a trece dilanti tambe cu e confianza no ta existi mas cu e Directora y e Director interino lo por drecha e situacion den SIAD debidamente.

Huez a determina cu e decision di Minister di pone Angela y Hernandez como consehero no a bay corectamente. E instalacion di e management team no ta problema segun huez, pero e ora ey Angela y Hernandez mester a haya otro trabaonan den SIAD.

Mirando cu nan a wordo ofreci pa bira consehero pa nan keda sin hasi nada y nan no ta wordo permiti di drenta e edificio, esaki mester wordo considera como un decision controversial, cu ta bay contra e intencion di articulo 52 di LMA.

Pa loke ta e prohibicion di drenta e edificio, huez ta haya cu e periodo por ta entre 4 y 6 siman, pero mirando cu den e caso aki a wordo indica cu sigur e prohibicion lo dura hopi mas cu 6 siman, esaki mester wordo considera como un tipo di suspension contra Angela y Hernandez.

E Huez a indica cu un ambtenaar por wordo suspendi si tin un caso penal contra dje, ora tin e intencion di kita e persona di trabao of ora cu nan notifica e ambtenaar cu nan ta bay suspende.
Mirando cu por papia akinan di un tipo di suspension, ta Gobernador tin e autoridad di hasi esaki y no Minister.

Pa loke ta e quick scan rapport di KPMG, huez a indica cu abogado di e Minister a uza solamente cierto partinan di e rapport contra e dos ambtenaarnan. Tambe huez a bisa cu ta culpa e dos personanan aki pa e fayonan den Servicio di Impuesto, siendo cu e rapport di KPMG ta bisa cu e problemanan tin di haber cu capacidad di e empleadonan, falta di experticio den SIAD y falta di medionan financiero.

Esaki segun huez ta problemanan cu e directora y director interino no tin of tin tiki influencia riba dje. Pa loke ta e discrepancia di 11.7 miyon florin y e supuesto intencion di e ambtenaarnan pa stroba negociacionnan entre Valero y Gobierno, huez a bisa cu esaki lo mester wordo investiga den un caso di ‘bodemprocedure’.

E huez a bisa sinembargo cu e ta haya cu tin un chens relativamente grandi cu e acusacionnan ey lo no por wordo confirma den e bodemprocedure. Huez a dicta cu e ta suspende e decision di Minister de Meza di baha Angela y Hernandez di nan funcion. Tambe e ta kita pues e prohibicion pa nan drenta e edificio.

- Advertisement -

DUNA COMENTARIO

Please enter your comment!
Please enter your name here