Mensahe di fin di aña di Minister Presidente mr Mike Eman
ORANJESTAD (AAN): Manera costumber, esaki ta e mensahe di fin di aña di Prome Ministro, mr. Mike Eman:
“Nos ta na final di un aña cu tabata masha importante mes den progreso di nos pais.
Trahando hunto, deliberando hunto riba futuro di nos pais, nos a cuminza pone tur hende mira den mesun direccion, di kico nos tin cu haci pa nos logra un mihor Aruba pa un y tur.
E union cu tanto tabata falta den nos pais, poco poco ta desapareciendo ya cu mas y mas nos tin cu realiza cu si nos kier logra exitonan grandi, logra prosperidad den cada cas di famia, nos tin cu haci un esfuerzo hunto pa logra e exitonan aki den añanan cu ta bin.
Mi ta sumamente satisfecho y sumamente inspira pa loke mi a pasa den den ultimo lunanan, caminda mi a constata un sentimento di convivencia unico cu pa hopi tempo mi no a sinti den nos pueblo.
Un di e exito grandi cu nos a logra como pais den 2010, tabata sin duda algun e dialogo social caminda como un sociedad uni, nos a sinta hunto y stipula e rumbo cu nos pais tin cu bay pa nos logra e felicidad social cu nos tur ta aspira den un pais prospero.
Nos lo por tin diferencia di opinion riba e forma con nos ta bay logra e felicidad y progreso aki pero hamas y nunca nos mester bira un opositor pa felicidad di nos pueblo y progreso di nos pais.
Mi ta pidi Dios nos Tata pa drama su bencion riba nos pueblo, riba nos pais, y percura pa den tur cas reina felicidad, prosperidad y trankilidad y cu tur hende por goza di un bon salud pa asina nos traha hunto pa nos progresa.
Na henter pueblo di Aruba, un feliz final di 2010 y cu e aña nobo trece dicha y felicidad pa boso tur.”
