Home General Shulaika Lee ta gana su caso y mag di haya su trabao...

Shulaika Lee ta gana su caso y mag di haya su trabao y auto bek

0
0
SHARE
- Advertisement -

abogadoduijneveldSegun Duijneveld, si e auto tin sticker riba dje, lo bay corte bek
ORANJESTAD(AAN): Diaranzon huez a duna su veredicto den e caso cu yiu di Dotchi Lee esta Shulaika Lee a entama contra Fundacion Lotto Pa Deporte(FLPD). Ta asina cu FLPD na dado momento a dicidi di kita sra Lee for di trabao, ora cu el a nenga di entrega e auto di compania cu e tin. Lee ta maneha trabaonan rond di parke Jaburibari y ta cay bao di FLPD. E tin un auto di compania y ora cu Lotto a pidie pa entrega e auto aki pa nan pone stickernan di e campaña di Lotto riba dje, el a nenga di hasi esaki. El a acerca abogado Edwin Duijneveld, pasobra e tabata haya cu su privacidad lo ta na peliger, si e pone stickernan di Lotto riba e auto.
E tabata considera esaki tambe como un manera di Lotto di ‘pest’ e. Despues cu e asunto di entregamento di e auto a bay robez, Lotto a dicidi di kita Lee di trabao, pasobra e fundacion ta haya cu el a nenga peticionnan di su dunador di trabao, incluyendo entrega di e auto di compania.

Pues Lee a dicidi di entama un caso pa e por haya su trabao y su auto bek. E caso a wordo trata algun siman pasa y Diaranzon mainta huez a duna su veredicto. Huez den su veredicto a bisa cu e no ta haya cu e hecho cu Lee a nenga di entrega e auto, ta suficiente pa kita di trabao inmediatamente manera Lotto a hasi.

Tampoco huez a haya cu ta comproba cu Lee kier a horta e auto door di no entrega esaki.
Na dado momento Lotto a bisa cu ora nan a bay pa busca e auto di Lee cerca su abogado, hende a bisa cu nan a wak e ranca Sali core bay cu e auto y nan a considera esaki como un manera iresponsable di trata e auto, cu ta propiedad di Lotto.

Sinembargo huez a bisa cu no tin prueba cu el a core e auto na un manera iresponsable.
Huez a bay asina leu di bisa cu si acaso di berdad Lee no tabata tin e autoridad y derecho di nenga entrega bek di e auto, asina mes Lotto no tabata tin derecho of motibo suficiente pa kita Lee di trabao de inmediato.

Abogado di Lee a cuestiona e hecho cu el a busca un abogado ora cu nan a pidie pa entrega e auto, pero huez a bisa cu Lee tabata tin tur derecho di busca un abogado.

Pues huez a dicta cu e decision di kita Lee di trabao dia 5 di November ta wordo declara nulo.
Pues Lee kende kier sigui traha, tin derecho di cobra su salario y e tin cu haya su trabao bek.
Unico cos cu huez a nenga, ta pa duna Lee e derecho di cobra cierto comisionnan cu el a perde durante e tempo cu e caso ta andando.

Huez a nenga esaki pasobra e ta haya cu e aspecto aki no a wordo elabora riba dje suficientemente.

E veredicto di huez ta ordena Lotto tambe pa duna Lee un auto di compania atrobe y Lotto mester paga e gastonan di e caso, cu ta un total di 1766 florin.

DIARIO den un entrevista a puntra Duijneveld kende a representa Lee, kico Lee ta bay hasi si nan entrege e auto, pero cu stickernan riba dje. E abogado a bisa cu si esey ta e caso, lo nan bolbe bay corte.

- Advertisement -

DUNA COMENTARIO

Please enter your comment!
Please enter your name here