Loke a pasa den sala di Parlamento den fin di siman ta altamente elogiable, no pasobra e mocion a pasa cu un mayoria absoluto di voto, sino pasobra pa prome biaha dos persona di oposicion a pone Aruba den prome lugar y partido den e di dos lugar, manera mester ta! Marisol y Mervin por a vota contra e proposicion pa keda consono cu e decision general di nan partido, pero exhibiendo caracter y disciplina personal, y e razon pakico nan ta den politica, o sea pa percura pa Pueblo keda bon sirbi, nan a bay contra e coriente negativo di MEP. Ni maske cuanto zundra a bay den nan direccion, nan a vota pa iguala e Ministronan y Parlamentarionan cu e resto di e Pueblo trahador cu mester yega 60 aña pa cobra pensioen. Awor, danki na e voto ey di apoyo di parti di Marisol y Mervin, Aruba a dal un stap padilanti den e modernizacion di politica.
Kico esaki kier meen pa MEP no ta dificil adivina, ya cu e cascarabianan no ta bay laga nan na paz, y probablemente ta bay pidi nan cabez. Si esey sosode, e lo ta otro golpi mas pa MEP, pasobra ta net nan dos por yuda saca cara pa e partido den proximo eleccion. Evelyn, kende a campaña ferozmente contra e proposicion a dicidi di bandona sala na momento di votacion, demostrando asina cu su declaracionnan no tabata sincero, pasobra si nan tabata, e mester a keda y vota contra e proposicion. Ey, mi ta haya cu el a comete e eror di su vida, pasobra di awor padilanti tur hende ta bay keda mire cu asombro, y ta bay ta dificil pa nan kere den cualke medida cu e ta bay defende o critica. Den politica, ora bo crea un imagen pa bo mes asina visiblemente negativo, e votadornan no ta bay lubide ora eleccion yega.
Mi mester felicita tanto Marisol como Mervin pa nan curashi di para pa nan principionan, hasta frente criticanan severo di paden. Den mi opinion, henter e fraccion di MEP mester a vota na fabor, pasobra e tabata un cuestion cu a capta e atencion total di Pueblo y a pone vigila e proceso cu hopi interes. Ta pasionnan y apetitonan ciego, sordo y insaciable ta pone a amor pa patria riba lipnan y ta elimine di curazonnan, manera cu e resto di MEP a haci cu nan votonan contra un medida extremadamente popular y corecto. Ta cua splicacion nan por duna Pueblo di nan actitud, excepto esun cu nan tabata kier a mantene privilegionan no disponible pa resto di poblacion. Amor pa placa y poder, y e ganganan cu nan ta ofrece, a bira e factor determinante di un voto cu ta bay sali MEP hopi caro.
Ta obvio cu e dos damanan di MEP no a subordina nan mes friamente na e interesnan monetario di e resto di nan coleganan di partido, y a dicidi di vota na fabor di crea igualdad di edad pa pensioen entre e mandatarionan y e resto di poblacion. Cu e medida ta bay costa tanto e Ministronan como e Parlamentarionan hopi placa tabata bisto pa tur hende, menos Evelyn, kende a kere cu e por a convence otronan di cu perdiendo varios miyon bo ta bay padilanti den bo ingresonan. Con un persona por ekiboca su mes asina hopi ta keda incomprendible pa mi. Especialmente ora e persona ta doño di un inteligencia halto y bon estudionan. Kico por a hacie penetra den e mondinan di lo insolito mi no por ni sikiera adivina, corda precisa.
Awor ta cuestion di para keto y mira kico e repercusionnan ta bay ta dentro di e partido, y te con leu nan lo kier hiba e confrontacion cu Marisol y Mervin. Mi no ta compronde pakico pa nan ta asina dificil reconoce cu ta nan a tuma e decision ekiboca, no e dos damanan. Y si pa venganza nan lo kier aremete contra nan, tur loke nan ta bay logra ta montona mas eror riba esun cardinal cometi caba den fin di siman.
Mi mas cincero CONGRATULATIONS Parlamentaria Marisol Tromp i Parlamentaria Mervin Ras. Boso desicion di a Vota pa ARUBA ta mustra boso estudio i educacion como parti di Gobernacion di Pais Aruba. My hat off to you guys. Boso sa con pa actua den un situacion tan importante pa e Pais. Corda bon, Aruba the Beautiful, long live the Island of ARUBA. Sargento: Pascual Marcial Ras. US Army Retired. Washington D.C USA
Awe Sr. Franklin Frans omo di Marisol a haya razon, e la yega di bisa : ” mi ta stima mi subrina masha hopi, pero e ta riba e lista robes ” Di tur machista cu Booshi ta, cuater muher a pase un cu handschoen blanco bisti y un Master Mind cu a Schaakmaat nan. Te ainda Booshi ni sa foi unda e Jab a bin. Schaakmaat.
Na prome lugar, pabien na AVP pa e mocion presenta (over e edad di pension di parlamentarionan y ministernan) den Parlamento y cu a wordo aproba. Desde e punto di bista politico: ta un tremendo hugada di schaken, un schaakmat tegen MEP den e tablero político.
Y ta logis cu e dos damanan, Marisol y Mervin, nan no ta asina idiot di vota na contra, vooral Marisol cu ta un dama slim, habil y cu tin un ambicion politico. Un pabien tambe na nan, no tanto pa e amor cu supuestamente nan a demostra cu nan tin pa Aruba votando na favor di e mocion, si no pa e ingenio cu nan tin y nan ta haci uso di nan.
Pabien Aruba cu e clase politico racional y cu ta defende e bienestar di su pueblo.