Expresando sentimento di famia Oduber
Insinuando cu ta debi na un di nan MEP a perde eleccion
ORANJESTAD(AAN): Cu e emocionnan den seno di partido MEP ta halto ta un hecho y ta parce cu e exponentenan di e partido no por wanta nan problemanan interno na cas tampoco.
Separa di e propio Glenda Oduber cu a bay vocifera su opinion riba Facebook, awor ta e yiunan cu a opta pa lansa un atake formal contra e dos miembronan di Parlamento di MEP cu a vota na fabor di e cambionan den e ley di pensioen.
Tanto Glenson Oduber como e yiu mas chikito Nelson Oduber Jr. no por a sconde nan decepcion pa e forma con, den nan bista, e Parlamentarionan di MEP a bay contra interes di partido.
Riba Facebook nan a uza palabranan fuerte den cual ta tilda e dos nan aki di lo ta complice di e derota cu MEP a haya na september 2009 den eleccion. Glenson Oduber por ehempel a skirbi cu “A duel nos cu nos a traha asina duro pa Partido MEP pa pone Parlamentarionan eynan cu 8 asiento. Apesar cu tin hende cu door di nan maneho y nan actitud a perhudica nos hopi y yuda contribui cu e derota di MEP”.
No ta mucho sigur pa ken e lo ta tirando e palabra ey, sea ta pa Mervin Wyatt of ta pa Marisol Lopez. Pero un rato despues su ruman chikito, Nelson Oduber Jr. (Chito) si a dicidi cu e ta bay un paso mas leu.
Probablemente siguiendo e informacionnan cu el a tende na cas cerca su tata, el a skirbi “Now that’s what I call Human Retardation..I hope you realize this is the end of your political career. With less than 800 votes pff go home and lill miss beauty oh she can retire after making money with governments properties rarararararararraaaa”.
Cu e acusacion serio aki, e yiu homber di e lider maximo di e partido ta insinua cu Marisol Lopez a enrikece su mes cu propiedadnan di Gobierno.
Pa tipo di acusacionnan asina mes den pasado Marisol Lopez a reta algun medionan di comunicacion, pues no ta conoci si e lo haci mescos awor cu e acusacion ta sali for di paden mes, esta for di e mesun yiu di e lider di MEP. Ayera nochi mes a tuma luga un reunion di partido cu caracter di urgencia den cual lo mester a debati riba con mester interpreta e voto di Marisol Lopez y Mervin Wyatt.
Claro cu den partido mes tin un hala cu ta sinti cu esaki ta simplemente democracia, mientras cu tin un otro hala den partido (specialmente e achterban) cu ta convenci cu mester core cu nan tur dos pasobra nan a bay contra herarkia di partido.
Con e asunto aki lo sigui desaroya su mes no ta conoci, pero ayera nochi por a tende di menasanan serio cu lo mester a sali den direccion di e dos miembronan di Parlamento cu tin autoridadnan preocupa.
Parce cu desde diasabra caba Marisol Lopez a biaha y ta permaneciendo for di nos isla, pues no ta aki pa defende su curpa aunke cu el a yama na radio ayera merdia na unda el a ripiti su posicion den forma cla.
Pero e problemanan interno awor ta mucho mas grandi cu prome, y no ta mucho mas e votacion pa baha e beneficionan di pensioen, pero ta e forma con partido a reacciona contra e dos nan y di otro banda e forma con partido ta haya cu nan a faya na e votadonan di MEP.
Criticonan ta mira di otro banda cu e problema cu tin awe den MEP no tin nada di haber cu e ley di pensioen mes, sino ta un problema cu tin for di basta tempo caba entre Evelyn Wever y Marisol Lopez.
E hecho cu e yiu di Nel Oduber ta acusando e di dos politico cu mas voto den MEP cu ta pa via e partido a perde ya ta mustra e problemanan interno cu tin for di despues di eleccion caba.
Kisas liderazgo di e partido lo a “gamble” cu Evelyn Wever den representacion di famia Croes lo a haya mas voto cu Marisol Lopez pero esey no a sosode.
Probablemente nan a pensa cu facilmente lo nombra Evelyn Wever despues como lider di e partido pero awor cu Marisol Lopez a haya mucho mas voto y cu e no ta siguiendo “ordo di ariba”, e situacion bira masha fastioso pa e poder cu famia Croes y Oduber lo kier tin den e partido cu Betico Croes a funda.
Mientrastanto tin masha presion den e partido pasobra ta bisto cu Eddie Briesen y kisas Booshi Wever tambe lo baha prome cu fin di aña pa nan si gosa di e pensioen “gordo” cu e sistema bieu ta permiti.
Esey ta habri caminda pa Dr. Maikel Kelly y Chris Romero drenta Parlamento, pero Carl Giel ta poniendo presion via-via pa e tambe haya su entrada den e organo mas halto di nos pais, no obstante cu algun luna pasa Gobierno a kit’e “op staande voeten” bou acusacion serio di lo a comete fayonan serio den su funcion como director interino na Departamento di Labor.
Lo ta masha interesante pa sigui e desaroyonan politico di cerca den e dianan di fiesta aki, pasobra mientras cu e Gobierno nobo ta logrando meta tras di meta, oposicion ta debilitando dia pa dia mas pa motibo di problemanan interno y pa acepta cu erornan grandi a wordo cometi cu a causa cu pueblo a manda henter e Gabinete cas!
