Home Cultura Aruba Su Unico Website Pa Arte A Cumpli 2 Aña.

Aruba Su Unico Website Pa Arte A Cumpli 2 Aña.

3
0
SHARE
- Advertisement -

Aruba Arts Community/Creative Island

ORANJESTAD (AAN): Na December 2009, e NGO Aruba International Arts Foundation, a crea e website ‘Aruba Arts Community / Creative Island’ pa establese un plataforma online pa tur disiplina di arte na Aruba. Esaki tabata un iniciativa local di e artista y maestro di arte Arubiano Stan Kuiperi.

   Aruba Intl. Arts Foundation (AIAF) ta conosi pa su proyectonan profesional y internacional den arte y educacion di arte, manera den pasado e Aruba International Dance Festival cu for di añanan ’80 te añanan ’90 a trece e festival di baile internacional y profesional mas impactante den Caribe riba esenario na Aruba.

Tambe AIAF ta realisa e World Arts Olympics na Aruba, cu ta duna muchanan di school di Aruba oportunidad pa participa den e World Children’s Festival mas grandi mundial na Washington DC, hunto cu muchanan di 200 pais rond mundo. Ademas e fundacion/NGO AIAF ta realisa varios proyecto mas chikito local pa desaroyo cultural na Aruba.

   Plataforma necesario pa arte:  E website Aruba Arts Community/Creative Island (AAC) a ser crea basa riba un necesidad grandi na Aruba den e mundo di Arte, esta un medio di comunicacion y informacion local optimal pa e mundo di arte.

   Ta un hecho cu na Aruba no tabatin ningun organizacion ni medio pa duna y haya informacion specifico y general tocante arte y cultura. No tabata existi unlugar na Aruba caminda e mundo di arte y cultura por a topa den e forma aki. Pa medio di e website, awor tur hende cu ta inscribi como miembro por sigui tur ultimo desaroyo riba e tereno di arte y comparti informacion cu otro. AAC ta un comunidad specifico, pues mester join pa por haci uso di e informacion, y tin control responsabel riba seriedad y calidad di contenido.

  Na december AAC a cumpli dos aña di existencia. E periodo di dos aña tabata necesario pa proba cu e website tin un rason di existencia solido pa por continua.

Tin mas o menos 220 miembro y creciendo cada siman, y esaki ta haci AAC e organizacion di arte mas grandi na Aruba, sin cu nunca a haci promocion publico of propaganda. Miembronan ta di Aruba y di diferente otro pais, y ta consisti di e.o. artista, musico, escritor, amante di arte, studiante y maestro di arte, coleccionista, fundacion y organizacionnan cultural, etc

  Promocion pa arte y cultura: AAC t’ey pa tur disiplina di arte, pues pa Arte Visual, Baile, Musica, Teatro, Literatura, Film, etc. etc.

  Cada miembro por crea su propio pagina personal pa pone e.o. portret, cuadro, texto,  videonan y tur sorto di expresionnan artistico. Otronan por mira esakinan bishitando paginanan di otro, y tambe duna comentario riba e trabao expone riba e pagina. Esaki ta un promocion enorme, mas ainda si pensa cu por link up cu p.e. FaceBook y un publico hopi mas grandi. Miembronan activo ta bira ‘featured members’ segun nan acividadnan.

E idea di esaki ta cu un artista of un amante di arte lo por dialoga cu otronan tocante su trabao, trabao di otronan, actualidadnan local of internacional den arte, etc. Pues AAC kier ta un alternativa pa cuminsa stimula dialogo positivo y intercambio abierto y directo den e area cultural/artistico di Aruba.

  Hopi ‘features’ interesante: Otro ‘featurenan’ di Aruba Arts Community/Creative Island ta inclui:

– Quote’s tocante arte di personahenan conosi den historia di arte.

– Banda di e paginanan personal, cada miembro por tuma contacto cu y ‘friend’ otro miembronan. Tambe un miembro por crea su propio grupo den un area specifico di por ehempel musica, literatura of teatro.

– Calendario Cultural/Bulletin Board: Tur actividad cultural/artistico di nivel cu ta tuma luga na Aruba por ser mira riba e calendario, pues tur actualidad, mensahenan etc. importante ta visibel.

– Miembronan por upload nan propio ‘events’, sea exposicion, articulo, presentacion, benta, etc, den e parti aki.

– AAC tin un total di 1,110 portret di arte di miembronan, y un cantidad grandi di video tocante arte y cultura.

– Den e seccion di ‘Blogs’ y ‘Forums’, tin blognan regular y tambe miembronan por cuminsa nan propio blog personal tocante nan arte. Algun ehempel ta ‘Arte Local den Prensa’ y ‘Arte Internacional’, pues eventonan mas importante for di prensa local y internet gobal. Den ‘Forums’ tin temanan pa discusion general, (p.e. ‘Cultura den 2010 – Kico bo opinion ta?’) pa stimula dialogo nacional habri tocante cultura y arte

– ‘Links’: AAC ta ofrece links pa hopi organizacion, artistanan, etc., algo practico pa esnan cu ta busca informacion local y internacional.

– Update regular: Regularmente tur miembro ta haya mensahenan ‘broadcast’ tocante lo ultimo riba AAC y pa keda stimula mas actividad y aporte di parti di miembronan.

   Siguiente pasonan pa AAC:  Aruba Arts Community ta un website pa tur hende, pues tanto pa esnan cu ta activo den arte y cultura of pa esnan cu ta amante of observador di arte y cultura.

Loke AAC kier logra siguientemente ta pa sigui crece riba un base regular. Tambe un meta importante ta keda pa stimula e interaccion y dialogo entre e artistanan y demas miembronan. Ta conosi cu localmente comunicacion habri y directo entre persona y gruponan falta hopi pa desaroya, y AAC ta ofrece y stimula cambio den esaki.

Den futuro tambe lo mester haya sosten financiero y ayudo voluntario pa cubri gastonan, tempo di operacion, y extension di e website.

  E website ta facil pa usa y e ta gratis. Gastonan ta ser carga pa e fundacion AIAF, y tur e trabao y tempo pa mantene y update e website ta ser haci voluntariamente y pro deo pa miembronan di AIAF.  Tur idioma ta ser usa, aunke debi na miembrecia di varios pais y linknan riba hopi websites internacional, ta usa hopi ingles.

- Advertisement -

DUNA COMENTARIO

Please enter your comment!
Please enter your name here