Home General Asu Kier A Cobra Sac 25 Mil Florin Pa Calypso/Roadmarch

Asu Kier A Cobra Sac 25 Mil Florin Pa Calypso/Roadmarch

1
0
SHARE
- Advertisement -

front_02Segun presidente di SAC,

y entertainment center kier a cobra sac 80.000 pa tumba

 *di e 80.000, 25 mil lo mester ta pa coriente

ORANJESTAD(AAN): Ultimo añanan tabata tin un discusion pa loke ta unda Road March/Calypso contest ta bay tuma lugar, entre otro door di e estado di Joe Laveist Sport Park y door di e suma cu ASU lo kier a cobra SAC pa organiza e evento eyden.

Te cu 1 aña a organiza e contest riba veld di Lago Heights.

Mayoria hende na Aruba y SAC tambe ta di acuerdo cu e mihor lugar pa organiza Calypso y Roadmarch contest ta na Joe Laveist.

KPA tambe ta haya cu pa motibonan di seguridad e ta un bon sitio.

Durante un reunion cu SAC a tene cu tur e instancianan cu tin di haber cu e eventonan di Carnaval pa 2011, presidente di SAC esta Tecla Kelly a splica cu riba caya y den prensa tin hopi speculacion riba e suma cu ASU lo kier cobra SAC.

El a bisa cu SAC no tin nada di sconde, pues el a bisa cu ASU ta cobrando SAC 25 mil florin pa SAC organiza e Calypso/Roadmarch contest den Joe Laveist Sport Park.

Sra Kelly a bisa durante e reunion cu SAC ta negociando ainda cu ASU tocante e suma, pasobra segun sra Kelly promotornan di afo mes mester a paga ASU solamente 7 pa 8000 florin ora cu nan a tene conciertonan eyden, pues e no ta wak e motibo dicon ta exigi asina hopi placa di SAC.

Pa loke ta entertainment center unda cu Tumba Contest y algun otro actividad mester tuma lugar, esaki ta peor ainda.

Ora cu presidente di SAC a menciona cuanto Entertainment Center na prome instancia kier a cobra SAC, hendenan den e reunion literalmente a keda cu boca habri y a keda puntra si berdad ta tanto entertainment center a exigi.

Segun sra Kelly, na prome instancia entertainment center kier a cobra SAC 50 mil florin pa huur e lugar, 25000 florin pa coriente y un suma di 5000 florin como borg.

Pues en total ta papia di 80.000 florin.

Sra Kelly a bisa cu hopi hende ta pensa cu SAC tin hopi placa, pero ora bo tende cu en total SAC lo mester tin por lo menos 105.000 florin, bo ta realiza kico ta kico.

Afortunadamente pa SAC, segun su presidente Entertainment Center recientemente a baha e suma te na 19.000 florin.

Mirando e placa cu e dos lugarnan aki ta pidi tur aña di SAC, sra Kelly a bisa cu SAC pa 16 aña caba ta purbando di haya un tereno pa construi un stadion unda cu hopi actividad di Carnaval incluyendo Calypso y Tumba, por tuma lugar.

Asina hopi di e placa gana, por wordo inverti bek den carnaval y den e gruponan di carnaval.

- Advertisement -

DUNA COMENTARIO

Please enter your comment!
Please enter your name here