ORANJESTAD (AAN): Booshi Wever como lider di fraccion di MEP, ta pidi pa pueblo celebra e dia nacional aki, manera Betico tabata kier pa nos celebra nos dianan nacional. Manera un pueblo uni, apesar di diferencianan.
Diamars, 25 januari nos ta recorda fecha natalicio di Gilberto Francois “Betico Croes”. Betico Croes ta worde considera e libertador di nos pais, pasobra el a logra libera nos di e cadena di opresion bow di Antiyas/Curacao, cu tabata stroba Aruba desaroya, y for di cual hopi inhusticia tabata worde cometi contra Aruba.
Betico tabata e prome politico Arubiano cu a logra reconosemento internacional di e derecho di autodeterminacion di nos pais. Hopi a purba prome cune, hopi a papia prome cune, pero Betico ta e prome cu a logra e reconosemento aki. Y pesey e ta worde considera e Libertador di Aruba, un titulo oficial.
Bao liderazgo di Betico nos a logra nos Status Aparte y asina nos a gana tambe respet y reconosemento mundial. Betico y MEP a logra esaki debi cu Betico a logra uni un pueblo. Betico a logra deshaci di e politica di rasismo di partido AVP, y e politica di segragacion di PPA. Betico a concientisa nos pueblo, y a bin cu simbolonan di union y libertad cu nos pueblo a identifica su mes den dje. Na 1976 Betico a propone pa Aruba haya su propio himno, bandera y escudo; lamentablemente tanto AVP como PPA a vota CONTRA nos himno, MEP ta e unico cu a vota na fabor di esaki.
LUCHA PA STATUS APARTE: Betico Croes a distingui su mes pa e derecho di autodeterminación di e pueblo Arubiano. Na 1976 Aruba a conoce su propio bandera y himno, danki na insistencia di Betico Croes. Betico y MEP tabata lucha pa un status separa pa Aruba dentro di Reino Hulandes, los di Antiyas Hulandes. Riba 25 di maart 1977 el a organiza un referendum, caminda 82% a participa, y den cual 57% tabata pro independencia, den cualquier forma. Esaki después a bira e Status Aparte.
Riba 31 di december 1985, apenas algún ora prome cu Aruba a drenta su Status Aparte, Betico Croes a keda seriamente herida den un accidente di auto, cu te awe a keda un misterio. Casi 11 luna después, riba 26 november 1986, el a fayese.
Betico Croes ta worde considera e libertador di Aruba. Betico Croes a bisa “Si mi cai na caminda, gara e bandera y sigui cu e lucha”. Tambe el a bisa “Si un dia nan mishi cu nos Status Aparte, esey kiermeen guera”!
STATUS APARTE OF STATUS NORMAL? Ta worde bisa, entre otro door di Minister di Asuntonan di Reino sr. Donner, cu awor cu Curacao y Sint Maarten tambe tin Status Aparte Aruba nos na Aruba no tin un Status Aparte realmente mas. Esaki no ta corecto. Tin un diferencia fundamental entre e Status Aparte di Aruba y esun di e demas islanan. Aruba mester a paga 200 miyon Florin na Hulanda pa por a sali for di constelación antiyano y haya nos status aparte. Mientras cu Curacao y Sint Maarten a haya dispensación di mas di 2 biyon Florin. Esaki a pone cu Curacao y Sint Maarten ta bow di supervision di Hulanda, y Aruba no. Pues, esnan cu ta kere cu e Status Aparte ta di compara ta totalmente equiboca.
CELEBRACION NA CEDE DI MEP: Nan ta cuminsa nos celebración diamars 25 januari cu ponemento di krans den santana di STA CRUZ pa 8.30 a.m., sigui pa un Santo Sacrificio di Misa, recordando e fecha natalicio di Betico Croes.
Despues bo ta keda cordialmente invita pa un koffiemorgen na Cede, bow encargo di Comsion di Damas, Forza Femenino Grace. E celebración na Cede lo sigui después cu Tipico macuarima, y lo termina cu Grupo di Betico di 3or pa 4or.
“Pa medio di esaki mi ta extende un invitación na henter nos pueblo pa celebra cu nos”, Booshi Wever a termina
