Home Politica DOW

DOW

0
0
SHARE
- Advertisement -

Analisis politico

ORANJESTAD(AAN)—Gobierno di Aruba a cuminza anuncia un cantidad grandi di plannan di construccion cu tin ariba mesa di cual un serie ta bay inicia den e dianan aki.

Realisacion di e plannan aki lo tin un efecto hopi positivo wardando ariba e crecemento di nos turismo atrobe mientras tanto e actividadnan di construccion lo duna un injection ariba nos economia. Loke si nos mester alerta nos gobernantenan ariba dje ta pa no pasa atrobe loke a pasa basta biaha caba ora gobierno laga DOW so ehecuta e plannan positivo di gobierno.

Den pasado un gobierno di AVP a sufri bao di e planiamento malisimo di entre otro e construccion di e caminda pa drenta Sanicolas.

Un trabao cu mester a keda cla dentro di algun dia pa no perhudica e negoshinan cu ta estableci ariba e caminda aki a dura lunanan largo. Un daño grandi a worde haci na e negoshinan aki.

Nos a mira un entusiasmo grandi di e hefenan di DOW ora cu MEP a dicidi di duna parti grandi di centro di Oranjestad na un capitalista ricisimo pa manca henter centro di playa. Nunca nos por a mira un dedicasion asina cerca DOW pa coopera cu e plannan diabolico di e tempo ey.

Apenas e gobierno nobo a sinta cu cosnan a cambia. Gobierno a dicidi di cuminza enbeyeza e entrada di Caya Grandi di banda di Zuid. Un pida caminda di un paar di meter mester a worde reconstrui.

Atrobe e paar di meter cu casi por a worde caba den un par di anochi lagando entrada pa Caya Grandi habri pa e negoshinan no worde perhudica di  mas a dura  lunanan largo. Atrobe e pregunta ta surgi mescos cu hopi aña pasa si ta asina atraza e architectonan di DOW ta of ta mala fe y cu ta intencionalmente nan ta haci esaki pa pone e gobierno di AVP haya un mal imagen.

E mesun tipo di actuacion nos a mira ariba e caminda di Sasaki y awo na Noord tin un parti di caminda cu ta un berguenza pa hende pasa. Nos ta conciente cu e ministronan di AVP ta hendenan cu ta pensa lo mehor semper di otro hende y no por kere cu hefenan por ta asina partidista cu nan ta haci e dañonan menciona solamente pa kibra e imagen di e gobierno nobo.

Sinembargo tin mucho ehempel cu daño grandi ta worde causa na nos conciudadanonan na tur sorto di manera cu ora investiga un poco mas ta DOW ta tras di tur esaki.

Pesey ta bon pa corda nos ministronan con e hefenan di DOW tabata presente na fiesta ariba e brug di Marisol dia cu esaki a keda cla. Si tin hende cu mester sa con robez e brug aki tabata ta e hefenan di DOW. Nan lo mester ta leu di un fiesta di un brug asina.

E hecho cu nan tabata claba eynan den gloria completo ta papia pa su mes. Pesey mester bisa nos ministronan pa nan wowo keda hopi habri ariba e proyectonan cu ta bin awo. No mester bira asina atrobe cu construiendo algo hopi positivo ta worde haci di tal manera cu e ta causa hopi daño na hendenan cu no por haci nada contra esaki manera a sosode tanto biaha.

Cada biaha cu nos tende un splicacion pakico DOW a haci un trabao asina malo nos ta bira mas convenci cu no ta un falta di conocimento technico pero ta un placer pa nan causa daño nan e gobernantenan di AVP.

Hendenan cu por cera entrada pa Caya Grandi pa lunanan largo pa pone un paar di klenker ariba caminda perhudicando tur tienda di Caya Grandi  y cu ta e mesun hendenan di fiesta ariba e brug di Marisol mester pone cu nos ministronan lo ta mas alerto awo. Si no paga tino e fiesta di DOW ta sigui y e daño lo ta hopi grandi.

- Advertisement -

DUNA COMENTARIO

Please enter your comment!
Please enter your name here