Home Editorial E TUMULTO DEN MEP Y E EXITONAN DI AVP

E TUMULTO DEN MEP Y E EXITONAN DI AVP

1
1
SHARE
- Advertisement -

jossy_mansur_pic         Nos a pasa hopi dia lesando y scuchando e debate entre e resto di e liderazgo di MEP y e duo Marisol-Mervin, den cual palabranan fuerte a cay di ambos banda y ningun solucion por a ser logra pa un transicion cu por a scapa e unidad di MEP. E dos damanan a declara nan mes independiente y e resto di MEP a sigui conforma un partido cu 6 asiento y un lider di partido nobo den e persona di Candelario “Booshi” Wever. Apesar di e condena cu e tin colga riba su cabez, regalo di Rudy Lampe via Corte, e ta papiando como e lider natural di MEP. Y e no ta haciendo e malo tampoco! E tono a cambia di uno violento, amenazador, pa uno mas inteligente y apaciguador. Di palabranan condenatorio a pasa pa deseonan di exito, na cual Evelyn tambe a uni su mes. Mi ta spera cu ta te ey tambe nos lo sigui mira e desaroyonan negativo cu a surgi despues cu e dos damanan  parlamentario a inicia un tanda nobo den e ramo complica di politica, mistica di partido, lealtad incondicional y e derecho di tin un opinion propio y di exprese libremente.

        Mientras tur esey tabata sosodiendo, Mike Eman, e dinamico lider di AVP y actual Prome Ministro di Aruba, y su formidabile ekipo a sigui traha incansablemente pa logra e solucionnan cu por yuda solventa e problemanan hereda di un Gobierno egoista y falto di vision, cu a tene Aruba den su garanan destructor durante 8 aña sigui. No ta un misterio, ni un secreto pa ningun hende cu ta biba na Aruba y tin dos dede di frente pa huzga pa nan mes, cu e tarea cu Mike y su ekipo a hereda como paso primordial pa pone Aruba back riba e bon caminda, ta uno titanico, cu tin mester di delaster ons di atencion disponible. E exitonan te awor tey pa tur hende mira, y esnan cu no kier mira nan lo mester keda usa nan brilnan di palo pa un  periodo mas largo. Pero, y a pesar di nan, e trabao pa sigui recupera pa Aruba e tendencia di logra e mayor bon pa e mayor cantidad di hende, cu a bay perdi durante un gobernacion di “nos pa nos”, ta sigui cu paso acelera. Mi ta sigur cu e mayor bon pa logra ainda tey, na buelta di skina, pero cu un ekipo comprometi y energico lo sa di localiza y converti den otro hermoso realidad pa Aruba.

           E pilar mayor di nos economia, o sea Turismo, ta den bon man. Un hoben energico, nombra pa su meritonan como Man of the Year 2010, a tuma e rienda over y ta haciendo un maraviyoso trabao di recuperacion y adelanto pa loke mester ta pa  nos economia, e enfoke number 1 di e actual gobierno: turismo. Den e mannan di Otmar e no por ta den mihor man! Ta existi un confianza grandi generaliza den nos poblacion den kende ta conduciendo nos prome pilar economico den e direccion corecto.

            Banda di dje nos ta haya un Ministro di Husticia y alavez di Enseñanza cu no ta laga e situacionnan existente, y resultado di un Gobierno negligente y permisivo, pa nan cuenta. E ta confrontando nan cu un energia grandi, buscando e solucionnan practico pa cumpli cu su compromiso cu Pueblo. E criminalidad cu a aumenta durante fin di aña, consono cu añanan anterior, ya tin su debido atencion y den coordinacion cu nos formidabile Cuerpo Policial, ta enfocando riba e solucionnan practico y severo cu mester tuma pa debolbe e ciudadania Arubiano e trankilidad cu cual e tabata custumbra di biba y lanta su yiunan. Nos no por sigui biba cera tras di tralinan dilanti di porta y bentananan di nos casnan, mientras e malandronan ta apodera di nos cayanan y nos paz mental. Mi a bise for di e inicio di e gobierno actual: Arthur ta e persona apropiado pa dirigi Husticia, pasobra e lo hacie cu Ley den su mannan  y sin contemplacion o suavidad pa esnan cu ta empeña di viola nos leynan en busca di placa facil riba custiya di otronan.

             E dinamico Ministro di Financien tambe a pone man na obra y ta restableciendo confianza den e mundo financiero di Gobierno y sector priva. Cu e apertura di Valero, speranzanan nobo a lanta cabez y ta indicativo caba di un futuro stabil y prometedor.E resto di Ministronan ta cumpli cu nan misionnan na cabez di nan Ministerionan. Pa loke ta trata Parlamento, AVP ta sumamente bon representa pa hendenan dedica na nan debernan cu e Pueblo cu a elegi nan pa represente.

              Pa loke ta trata e dictadorcito di Ponton, o sea e politico diminuto Nelson Orlando Oduber, ainda e ta bao e impresion cu e ta un regalo di Dios pa e Pueblo Arubiano y ta laga bay cada biaha cu nan pone un microfon su dilanti. Su problema ta cu ta e so ta mira su mes sinta riba un trono pa proclama su importancia. E pensamento eroneo ey ta bay linea recta contra e hecho cu Pueblo a kita su partido e mayoria di voto den ultimo eleccion, loke ta un sentencia popular cu su vigencia den politica a caduca. Ta e so ta sigui nenga di compronde e mandato ey di Pueblo.

- Advertisement -

1 COMMENT

  1. Jossy ta berdad,si ta bon pa anusia e gerensia cu a laga atras pa e pueblo orienta nan mes i habri wowo pa cosnan asina no pasa mas.O Jossy o halla bo por comenta ariba hospital na aruba que disastre;comenta ariba dje o pone esun engarga pa hasie correction pa mehora e hospital prome cu ta laat.Ami lo traha un nobo face 2 einan mes , i sera e bieuw pa renobacion.Facil bende un hotel pa hanja cents.

DUNA COMENTARIO

Please enter your comment!
Please enter your name here