Reaccion
ORANJESTAD (AAN) Pa Loke ta trata reaccionnan cu redaccion a haya riba e caso di maltrato di nos colega Maria y pa cual hopi sosten a bin for di comunidad nos ta manda palabra di gradicimento y awe nos ta publica reaccion number 2 di analistanan cu ta investigando e caso aki, di cual a wordo bisa cu e lo bay haya un rabo mahos.
Reaccion number 2; ‘Na momento cu un huez di Hof ta bisa un victima di maltrato fisico pisa, cu ta e mes lo a provoca e maltrato, esaki ta haci un impacto desastroso riba e victima y riba cualkier persona cu den pasado a yega di pasa den casonan similar.
Pa loke ta trata e tema ey, lo bin un reaccion separa riba dje pero si mester remarca cu tanto organizacionnan y hendenan cu ta wordo considera como personanan publico cu normalmente tin tanto boca yen di proteccion di hende muher na Aruba; NINGUN DI NAN A MUSTRA CARA.
Ta cu ki cara nan lo bay acerca prensa pa nan mesun actividadnan den futuro?
Pasobra con bo ta bay splica pueblo cu bo ta midi cu dos midi y ta depende kende a wordo maltrata pa bo of boso sali na vanguardia y ta bay den publicidad pa cuestiona casonan asina?
Of ta pa haya atencion personal so boso ta haci tipo di trabao asina?
Loke a resalta den e caso unda cu huez a haci declaracionnan straño y descabeya y pa tur esnan cu a yega di bira victima di maltrato fisico, e declaracion di provocacion propio tabata uno inacceptabel.
Un di e declaracionnan cu a hala masha hopi atencion di esnan cu a sigui e caso aki di cerca y sigur esnan cu ta sigui investiga e caso y tambe riba e posibel consecuencianan cu esaki lo por bay tin pa husticia en general na Aruba y den Reino Hulandes, tabata e declaracion di huez unda cu e lo a cuestiona e hecho cu tabata tin hopi miembro di prensa den sala di corte.
Shon huez, dia cu dos periodista di un corant na Hulanda a wordo deteni pasobra nan no kier a divulga nan fuentenan di informacion y cual detencion tabata inhusto y pa cual despues nan a gana nan caso tambe; ta un batayon di prensa hulandes a bay den protesta publico y na corte na Hulanda pa simannan largo anto na Aruba periodistanan no por ni mustra interes pa un caso unda cu un colega di medio di comunicacion a wordo maltrata y e aparato di husticia a laga e malechor bay cu un boet di algun 100 florin?
Awe nos ta bay refresca memoria di corte na Aruba pasobra hueznan ta bin y ta bay pero corte ta keda como instancia cu mester ta imparcial.
Tempo cu Nel Oduber a lanta caso contra DIARIO y contra director di DIARIO tabata tin un batayon di Mepista cu a yena tribuna di corte y cuanto no a bin desmostrativamente cu nan T shirt geel bisti pa mustra nan poder politico?
Cuanto parlamentario di MEP no tabata sinta den sala di corte e tempo ey?
E tempo ey no tabata gobierno di MEP tabata na mando y no tabata integrantenan di gobierno di MEP tabata esnan cu a bay sinta demostrativamente den sala di corte pa mustra huez nan poder politico y den un forma indirecto intimida of trata di influencia corte?
Hunto cu nan radio emisora nan a bin cu un grupo grandi di hende pafor di Corte unda cu te hasta menasanan a wordo lansa den direccion di trahadornan di DIARIO.
Tabata tin simpatisante cu tabata cana cu pamfleta riba cual tabata tin copia di informacion di belasting di director di DIARIO y te hasta tabata tin copia di un peticion cu trahador di DIARIO a haci pa un tereno di cas riba tereno erfpacht anto tur esaki no ta for di departamento di gobierno nan a wordo saca mientras esnan di MEP tabata sinta demostrativamente dilanti huez den Corte?
Tur esakinan no tabata muestra di poder y trata na influencia husticia?
Anto awor un huez di Hof ta bin bisa un periodista cu a wordo malamente maltrata door di un persona cu a “get away” cu esaki, cu ta e victima mes lo a provoca e caso y cu e victima kizas kier a bin haci sensacion cu coleganan di prensa na sala di Corte?
Aki ta unda cu pueblo mester cuminsa habri wowo y tambe tur esnan cu ta traha como abogado pasobra manera ta custumber, atrobe tipo di asuntonan asina cuestionable por tuma lugar den husticia na Aruba sin cu abogadonan of Orden di abogado ta reacciona…., pero laga si tabata algo cu ta toca nan porta anto ora ey si mundo ta bin abao!
“Last but not least”; dia cu trahadornan di Corte mes a probecha un ocasion publico pa mustra nan malcontento pa loke ta trata nan posicion huridico y di trabao na gobierno; no tabata tin un of mas magistrado cu lo a duna nan razon prome cu gobierno mes a trata nan caso of a traha riba nan caso?
Y si e caso a bay corte, ta cu ki cara hueznan cu mes a duna e trahadornan di antemano razon of a medio para banda di nan (nada contra e trahadornan cu ta lucha pa nan derecho!) ta con boso lo por a dicta husticia na un forma imparcial?
Keda pendiente pasobra tin hopi mas pa bin y un danki di antemano na redaccion di DIARIO pa publica e reacionnan aki pa asina pueblo wak kico ta pasando den nos sistema hudicial’.
Juez a hasi masha bon,10000000000000000000000% pa e juez,respeta prive di hende pa nan respetabo
Si un hende no kier bo saca su pic.,no saca su pic.
Loke a pasa cu Maria ta lamentabel pero e manera cu periodismo sensionalista (analistanan di awa dushi)ta pone e pueblo contra nos systema huridico cual ta muestra di falta di vision y objetividad di un analista.Cu Ministerio Publico a handle e caso cu un TOM zitting ta nan derecho. Maria tambe tin derecho pa pidi HOF obliga MP pa persigi e acusado. Tus esakinan ta regla den ley. E ehempelnan duna NO ta refleha den NINGUN manera e situacion di Maria a pasa aden. Esaki ta sensionalista dus nada objetivo. Cu e “analista(nan)” ta usa e parti di un hues a duna “apoyo” na e trahadornan di corte no ta kita su imparcialidad di su funcion. Ta un lastima cu DIARIO no a publica e reaccion di pueblo tocant enombernan di hues. Ami lo reacciona e ora ey cu dicon no ta pone e nombernan di e periodistanan bou di tur articulonan den medio scirbi? Saludos