Home Politica Parlamentarionan Na Aruba Mester Por Actua Cu Mas Independencia!

Parlamentarionan Na Aruba Mester Por Actua Cu Mas Independencia!

1
0
SHARE
- Advertisement -

Lider di PDR ta cuestiona:

ORANJESTAD (AAN) – Den conferencia semanal di prensa, mr. Andin Bikker, lider di fraccion di Partido Democracia Real, a menciona cu den Parlamento tin dos aspecto ta hungando un rol, cu PDR kier a trece dilanti.

E prome aspecto ta cu Parlamento ta controla Ministernan, pero ora nan ta haya na nan discrecion cu ta bon pa nan biaha bay un pais, bishita un conferencia of atende un of otro evento nan ta liber pa haci esaki, sin cu Staten ta haya ningun carta di notificacion.

Sinembargo, pa Parlamento tin un tradicion cu nan tin cierto viahenan pre-programa, mayoria di nan ta pa Parlatino, pero por lo demas, si un Parlamentario ta tuma nota di un of otro conferencia cu por ta interesante den cuadro di nan trabao, e ta algo fuera di lo usual, y nan mester haci cierto tramitenan pa nan por bay y convence otro parlamentarionan cu e ta necesario.

PDR a yega di bisa esaki varios biaha, y nunca nan a participa den Parlatino, no obstante, mr. Bikker a señala cu Staten mester tin mas discrecion unda e parlamentario por dicidi cual ta e conferencianan y otro eventonan cu e ta haya den cuadro di su programa di parti, y e interes general di pueblo, cu e mester atende, y cu por aloca e fondonan cu ta worde uza pa Parlatino, pa atende e otro eventonan cu e ta haya ta mas necesario.

Bikker a señala cu pa e fin di luna di Januari awor, tin un conferencia na Miami encuanto uso di energia den cual Caribe completo ta participa den dje, incluso e Minister di Jamaica entre diferente entidad, por ehemplo di Hulanda cu lo atende e asunto di financiamento. Tur esaki ta sumamente interesante pa sa kico e paisnan bisiña ta haciendo riba tereno di energia, con nan ta atende cu e problematica di fuel oil, etc.

Tin cablenan y lineanan di coriente cu ta worde conecta aworaki entre e islanan Caricom, y nan ta bezig cu proyectonan pa interconecta otro y tene cuenta cu otro.

Bikker ta haya cu un conferencia asina ta sumamente valioso pa miembronan di Parlamento atende, y en todo caso, Staten ta bezig ta sondea e posibilidad pa manda un delegacion chikito pa e conferencia aki cu ta pas den e filosofia di mira un tiki mas leu cu solamente Parlatino, y cu por sirbi pueblo mehor.

E otro aspecto ta cu Bikker a ripara cu den Parlamento a bira un tradicion cu si nan kier manda un carta pafo di Parlamento, mester haci esaki via Presidente di Staten.

E ta haya cu otro senadornan, por ehemplo na Merca, entre otro, nan ta hopi mas independiente y tin mucho mas libertad di sirbi nan pueblo, door di manda cartanan directamente. Pesey e no ta compronde e formalismo tradicional cu a nace den Parlamento di Aruba, cu tur cos mester bay via Presidente di Staten y hopi biaha nan sa con pa soluciona e problema cu un persona a bin cune, pero pa via di e formalismo aki, nan no por atende cu  e hecho directamente.

Den otro paisnan Parlamentarionan ta atende y sirbi directamente esnan cu ta bin cerca nan, cu ta for di e pueblo votador, y Bikker ta kere cu na Aruba mester bay evalua den Parlamento tambe si nan no ta mucho rigido cu e tradicion y formalismo aki cu a crece door di añanan.

- Advertisement -

DUNA COMENTARIO

Please enter your comment!
Please enter your name here