Home Cultura POPO

POPO

0
0
SHARE
- Advertisement -

Pabien carnavalistanan! Boso a duna e pueblo un fakkeloptocht di kita sombre. Ta bon cu Digicel, Grupo Champagne y OPC tabata tin e sombrenan cu por a yuda saluda e publico cune.  Ki bunita cada un di e gruponan tabata y e bomboshi pega na otro den e gruponan grandi, no a molestia otro ningun momento y ta gozo so tabata tin.

 

DIGICEL

Si Digicel tabata na cora cu blanco of cora cu “scur” so, esaki lo a duna un uniformidad masha bunita pa e grupo aki. Pero e comentario aki no ta kita nada di e bunita cu e grupo a presenta den parada tras di Superdancers cu tabata bunita di custumber y celebrando nan di 3 lustro como Openingshow.

POPO a gusta masha hopi e grupo di nos hendenan special y di Imsam cu a forma parti di e grupo aki.

 

TOB ON FIRE

 

TOB on Fire tabata na candela di berdad, pero e vlamnan tabata e mas di mil participante cu nan tabata tin. Hasta ministro a kita su sombre di ministro pa bisti headpiece di candela.

 

CHAMPAGNE

 

POPO por imagina con Lientjie di Champagne a mula curpa ultimo dos dia tratando pa satisface tur esnan cu a acerke pa por forma parti di Champagne. Manera ta magia nan a logra pa tur hende a haya acesorio y T-shirt pa por a pone algun cien hende mas den e grupo. POPO a ripara cu e preocupacion tabata si e bar lo wanta te final y el a logra. Tabata tin suficiente pa tur hende. POPO a gusta e musica y sonido di Tsunami. Nan a varia bunita y nan ritmo ta keda ritmo Tsunami aunke kico nan toca.

 

OPC

 

POPO a sinta wak OPC bon y POPO a ripara cu e sombre blanco cu participantenan tabata tin  cu e shirt lombrante y nan glow in the dark tabata mustra e tipico OPC. E manera di bisti di e grupo aki tin su toque. Nan sonido tambe tabata hopi bon y a logra cubri mas cu ta necesario y cla.

 

MAJESTIC

 

POPO a gusta e disciplina cu Majestic su participantenan tabata,. Nan tabata goza sin fin y cu hopi energia, pero cu un disciplina cu ta dunabo e sentimento cu esaki ta un grupo “netchi”. Musica di Impak tabata net suficiente pa e grupo aki pasobra si tabata pa mas participante, nan lo no a logra e nivel cu nan a presenta door di aumenta volumen.

 

DUSHI C.G.

 

POPO a goza tambe e animacion cu tabata tin den participantenan di Dushi Carnival Group. POPO a yega di critica e “House” di Dushi Band pero scuchando cu hopi atencion y mirando e participantenan e aña aki, POPO lo por bisa cu e participantenan a pasa bon cu e musica cu tabata agradable pa animacion di e parada y e grupo. POPO a haya poco duele ora cu sonido a dal abao. Duele pa e participantenan cu a paga pa goza y awor ta pega. POPO a experiencia e sentimento aki cerca varios grupo den pasado. Ta bon cu e tecniconan a traha rapido y cu e distancia sin musica tabata masha chiquito cu casi no tabata notable. E baranan di Neon di e participantenan tabata hopi bunita.

 

PLEASERS

 

Pleaser and Teasers tambe tabata un grupo cu a goza un mundo. Por a ripara riba e caranan con contento nan tabata cu nan musica di le Groove. Na dos caminda riba ruta POPO a topa nan cu “Kaboom” y  por a nota con loco e participantenan ta bira cu e cancion aki. E movecion di e bailadornan tambe tabata masha atractivo.

 

GRUPO MAS

 

GRANDI

 

E grupo mas grandi di anochi tabata Last lap cu musica di NBO. For di Cas di gobernador caba por a nota cu ta centenares di hende lo join patras di e parada pa balia den last lap y NBO a percura pa e animacion necesario pa e carnavalistanan por a goza riba caya tras di e parada.

 

 

ESNAN

 

LUBIDA

 

Esnan lubida hopi biaha ta e trahadornan di Serlimar. E aña aki atrobe manera e parada tabata pasando nan a haci nan trabao di kita baricada y hacimento limpi ya laga e ruta limpi limpi. Ayera mainta POPO a haya varios comentario riba e trabao magnifico aki indicando cu turistanan no por bisa cu Aruba a keda sushi. Sres. Danki!!

 

FASTIOSO

 

POPO a logra sali na ora pa por a yega cas prome cu 11 or pasobra no por a sigui te final pa falta di lugar pa staciona auto. Pero ora a tira bista riba Tele Aruba, e cos di mas fastioso di tur aña den e transmision POPO a bin topa cune y a cambia canal pa mira futbol americano. Esey tabata: “mi ta cuminda mi mama na cas”. “Mi ta cuminda mi famia cu ta riba caya”. Mi ta cuminda Betjie cu Tjebo”.  Y na gritamento: “Mi ta saluda Jantje cu Pietje na Hulanda”, saludos pa Mary y John y Merca, pa “Nikita y Marisolava na Rusia”. E cos ey ta traha riba stoma di POPO tur aña. Nan no por keda sin grita. Si ta: “Nos ta gosando un mundo y mas cu aña pasa, of menos cu aña pasa”; “ E publico canto di ruta ta colaborando hopi cu nos”;  “e caya ta mucho sushi cu cups y boter di plastic”, etc. e televidente lo sa kico ta biba entre e carnavalistanan.

 

MOLESTOSO

 

Algo cu tur aña ta traha riba ulcera den stoma di POPO ta e canamento di participantenan mey mey di gruponan, principalmente ora nan yega laat. Si bo ta yega laat, calcula unda bo grupo lo por ta na e momento ey y busca manera di yega mas cerca. No bay cana mey mey di e parada y e gruponan buscando bo grupo. Dianan di parada grandi, e prome ora di parada ta ripara esey. Ta parce cu nan ta cuminza cana for di ex-DOW pa yega Entertainment Center mientras parada ta riba caya moviendo caba.

 

TRADICION

 

POPO a nota atrobe cu participantenan no por saca portret sin show nan glas of boter di bebida. Ta como sifuera cu e potret lo daña si nan no mustra ki clase di bebida nan tin den man. Tin participante cu glas di biña na boca, pero den e otro man por a mira 3 bleki di cervez como reserva. Si el a termina riba pia mi no sa.

 

TE MAÑAN

 

Te aki cu POPO awe. Sigui manda bo mail na : jubynaar @ hotmail. com of yama 566-2367 pa duna bo informacionnan pa POPO, prome cu 5 or atardi.

- Advertisement -

DUNA COMENTARIO

Please enter your comment!
Please enter your name here