Home Cultura POPO

POPO

3
0
SHARE
- Advertisement -

Prome cu POPO bin riba comentarionan di fin di siman , principalmente e Fakkeloptocht y tur su puntonan negativo y positivo cu por a tende, laga POPO cuminza na duna algun informacion cu ta importante pa grupo of pa SAC.

 

CHAMPAGNE

Grupo Champagne ta haci un suplica na su fiel participantenan pa pasa schrijf in e siman aki ya cu e grupo di massa lo cera cu 300 participante. Ya tin te cu ayera 180 registra y Champagne no kier pa participantenan cu semper ta fiel keda afo pasobra no tin mas headpiece. Inscribi e siman aki mes pa bo ta un di e 300 nan. E aña aki atrobe Champagne ta mantene su mes na e frase di “Op is op” pues pasa na “Bee Ware” y percura bo ta registra.

 

TUMBERITO

 

POPO a ricibi e lista di participantenan, titulo, compositor y areglista di tumberito di e aña aki E lista di tanto infantilnan como hubenilnan a cera cu 7 cantante pa infantil y 10 pa hubenil. Infantil ta pa Robert, Danny y Eddy y Hubenil ta di Robert Danny y Ronwayne como areglistanan.

 

INFANTIL

 

Pa ionfantil tin Maryjean Vrolijk cu ainda no tin titulo, compositor ni areglista. Ashtanee Martus  tin e tumba “E man di e carnaval” componi pa Alex Martus y Robert Jeanor y aregla pa Robert Jeandor. Robert Maduro jr. ta participa cu “Carnaval a bati homerun” di su tata Robert Maduro y areglistanan ta Robert Thiel y Robert Maduro. Jurvienny Koolman ta canta e tumba “Ambiente di trompet” di Danny Koolman y Elia Isenia y aregla pa Danny Koolman y Eddy Ras. Luelgy Arends ta canta composicion di Edseline Figaroa, cual no tin titulo ainda ni areglista. Kaythleen Semerel ta canta “ Manera un bom den carnaval” di Giovanny Boekhoudt y aregla pa Danny Koolman. Finalmente nos tin Tahirah Wever cu no tin titulo pa su tumba cu ta di Susan Kelly y aregla pa Eddy Ras.

 

HUBENILNAN

 

Den hubenilnan Marigin Rafael ta canta e tumba “awasero di ritmo” di Papito Rafael y aregla pa Robert Jeandor. Darwin Gomez no tin titulo ni compositor ni areglista menciona. Pricilla Semeleer ta canta e tumba “Ban mustra mundo”  cu ta composicion y aregla pa Ronwayne Kock.

Gilane Wester tampoco tin titulo ni compositor ni areglista. Eunice albertsz ta presenta “Un pueblo orguyoso” di Eugene Albertsz y aregla pa Danny Koolman.

 JeanChris Jair Versprey tin tumba “Bai wak’e” di Elia Isenia y Janiro Eisden, aregla pa Danny Koolman.  Kimberly Tromp no tin titulo pero si compositor cu ta Ronwayne Kock cu tambe ta e areglista.  Danny Loefstop ta presenta e tumba “cu mi baho” componi y aregla pa Ronwayne Kock.

Jonathan Croes ta bin pa mantene su corona cu “E ta nos cos, e ta di nos” di Danilo Vrolijk y aregla pa Robert Jeandor y Chantall Quant ta bin pa e corona cu “Dunami un man pa bolter e” di Richard Tattoo Quant y aregla pa Danny Koolman.

 

 

NI PAN BIEU

 

E fin di siman ta tras di lomba y e kehonan a drenta di tur banda relaciona cu e Fakkeloptocht y varios grupo. Un grupo sigur a haya golpi di critica. Ta manera tres di su participantenan cu tabata hunto a conta POPO: “ Ni pan bieu nos no a haya pa kauw ariba corda un pida pan boyo pa come durante parada”.

 

NUNCA MAS

 

POPO a tende di otronan cu den e mes grupo excusa relaciona cu “Premium Bar” y “Snacks” (cu no tabata tin) tabata: No tin ijs; refresco a caba; no tin ijs; biaña y cervez a caba” y asina mester a pasa casi ¾ di e parada den e grupo aki. Un cos POPO a tende cu lo por tuma lugar sigur: “Nunca mas nos ta bay cu e grupo aki”. Pero conociendo nos hendenan, mas malo nan pasa, toch otro aña nan ta den e mes grupo atrobe.

 

GUY TOF

 

Loke POPO a ripara durante parada tabata e guy nan tof cu tabata cana rond, kita caminda y bula mey mey di gruponan. Tanto cero tolerancia y nada a wordo haci, ni dilanti polisnan. Pa colmo ta net nan a busca bringamento y sali bay manera nada a pasa.  POPO a goza con den un grupo un lider femenino si a saca e fulannan for di nan grupo den cual nan a bula.

 

DI BO TA DI MI

 

Tabata tin un grupo cu a haya problema di sonido y despues por a mira su participantenan bulando mey mey di otro grupo y pa falta di bebida den nan bar, nan a bay goza di bar di otro grupo tambe. POPO a haya reclamonan aki, y a bisa pa pone Bibi na altura di kico ta pasando pa nan por reuni ariba. Pero despues a bin resulta cu tabata un equivocacion di bar cu tabata patras di otro grupo y no dilanti di nan propio grupo. Pa colmo e t-shirtnan tabata parce otro tambe debi na color preto.

 

 

2 DAMA

 

Loke POPO a admira ayera ta dos di e damanan lider di grupo. Sinta den auto, POPO a tende un splicacion di Swinda di Majestic y pa ora cu POPO a yega Playa a bin tende Guisette di Dushi Band riba e problema di bar. Tur dos a actua manera dos dama relaciona cu e mal entendimento cu tabata tin y cu Guisette hasta pidiendo disculpa publicamente. Esaki ta deportivismo y esaki ta di admira, na lugar di bay zunda of keha of critica. Tur dos a actua manera UN DAMA.

 

PIRATERIA

 

Ata POPO a haya tende tambe di pirateria di cancion cu a cuminza tuma lugar caba. POPO no tin Face-book y no a busca tampoco pa sa, pero si a tende di e pirateria di cancion di un grupo cu ta wordo toca caba y pa otro grupo musical. Prome tabata shirtnan di Dushi Carnival Group awor ta musica di otro banda ta wordo piratea.

POPO kier aclarea cu POPO no ta publica ni reacciona riba mailnan cu no tin nomber di esun cu ta manda, y ta sconde tras di un “pseudonimo” of  “apodo”. E mail por tin e apodo pero bao di e mensahe siquiera nomber (y direccion of celular pa yama bek etc.). POPO no ta usa mailnan cu remitente scondi.

 

 

NEGATIVO

 

Locual si POPO a nota ultimo añanan ta cu tin cancionnan “negativo” cu ta wordo toca y graba y participa den concursonan. Cancionnan cu ta “yama” violencia, terorismo, criminalidad, y e aña aki cancionnan cu ta promove bebemento etc. E cos nan aki no mester wordo permiti. No ta pasobra ta carnaval mester abusa, ni den forma di doble sentido. E musica mes ta birando mas extremo aña tras aña.

 

DESMENTI

 

Ningun lider di grupo lo admiti fayonan di nan organizacion durante paradanan. Ni maske cuanto participantenan keho di e falta di servicio na bar y falta di haya snacks of algo di come. E cantidad di hende ta pone hendenan primi riba otro, nan no por move manera nan ta desea, y si bay na barnan ta ripara e cantidad di hende rond di bar y bo no ta yega dilanti sin perde por lo menos 15 minuut di por goza di e parada. Ta varios grupo a haya critica pisa di falta di bebida y falta di snacks, y ta paga e participantenan a paga. Den carnaval tin leynan di desmenti”, esta cuanto bo reclama, keha of critica, “nunca bo ta gana” pasobra no tin lider di grupo cu lo admiti, y ademas bo ta haya participantenan mes cu kier “come bo bibo”.

 

 

MI TA BOLBE

 

Pero tur e keho y critica aki ta resulta envano pasobra mes ora despues di e actividad hopi hende ta keha, critica y yora nan placa. Sinembargo, e aña venidero tur di nan lo ta den e mes grupo atrobe manera nada a pasa pasobra ta anualmente e kehonan aki ta bin dilanti. Otro aña nos ta tende: “Nos ta bolbe cu boso!”

 

KEN NO ?

 

Di tur e criticanan cu tabata tin, POPO tin cu bisa cu casi nada POPO a haya riba Grupo Champagne. Participantenan tabata masha contento cu tur cos di Champagne, especialmente e musica y e servicio di bar etc. E unico keho ta cu nan mester a cana pa bay bar na dado momento pasobra ni e garoshinan no por a yega cerca, pero esaki sin keha. POPO tin cu duna un pabien si na e T-shirtnan di Champagne cu tabata esun cu POPO a gusta mas di e anochi di fakkel.

 

CONTROL

 

Esun cu a pasa den cayente tabata Ivo 4 Life. E anochi aki tabata tin Pink 4Life, Majestic 4 life y Ivo 4 life. Hasta control tabata tin riba Ivo ora cu su señora a yama pa averigua cu si en berdad e tabata unda el a bisa e tabata. Ta bon cu el a haya contacto via cu cel na ora cu cas.

 

DRAGON

 

Pa cambia topico finalmente POPO tin cu bisa cu Los laga Bay tabata mey mey di Digicel. Tur preparacion tabata riba e Dragon Dancernan di los Laga Bay.  Un hende a puntra POPO  ken por traha su headpiece, decora su costuum y fura susapato pe pa Dragon dancers. POPO a dirigi nan mes ora pa Maroeschka cu ta un trahador y  decoradora di headpiece, shoulder y body piece, tambe decora costuum, fura y decora sapato, sandalia boots. Pa resto di temporada pa e trabaonan aki tuma contacto cu Maroeschka. POPO ta spera di haya su number di cel awe pa duna e interesadonan.

- Advertisement -

DUNA COMENTARIO

Please enter your comment!
Please enter your name here