POPO

Publication: Friday, 14 January 2011. Categoria: Cultura

CORSOU

 PROME

Awe POPO ta habri cu Corsou prome y despues ta sigui cu informacionnan relaciona cu Aruba . Diaranzon na Corsou AMAK a tene un conferencia di prensa relaciona cu festival di tumba 2011. Tin informacionnan cu a bin dilanti cu POPO ta kere cu lo ta di interes pa amantenan di tumba di carnaval di Aruba ta na altura di nan .

 

RECORD

Dia 8 di Januari AMAK, e asociacion di musica y artistanan di Corsou a cuminza cu un “gimick” atrobe y  a logra bende 500 carchi na 50 florin den tempo record. Na momento di presenta nan “gimick” ya nan tin un idea mes ora despues die interes cuposiblemente lo tin e anochinan di festival.

 

IMPORTANCIA

 

AMAK a mustra cu Festival di tumba ta un festival di Cancion y locual ta mas importante ta e composicion.

E aspectonan mas importante di esaki ta letra y melodia y un parti integral ta entonacion.

Den e festival di tumba, aspectonan cu ta importante ta: letra y melodia cu tin e peso mas grandi; ritmo y areglo; tambe e ambient den caya. E parti di entonacion ta forma parti di e seccion mas importante cu ta Letra y Melodia.

 

LETRA

 

BUNITA

 

A splica bon cla tambe cu hopi biaha  ta pensa cu si un hende gana den letra, ta e mester tin e tumba ganador. Si rasona di e forma aki, ta elimina tur e aspectonan manera melodia, entonacion, ritmo y areglo. Pues si tin un letra masha bunita cu por sali ganador den cualquier competencia di poesia, no necesariamente e mester gana den un competencia di musica, caminda ta importante pa e letranan bon aki ta sostene pa bon melodia, bon areglo y bon entonacion.

 

400 ARTISTA

 

E festival di tumba di Corsou ta e evento musical mas grandi di Corsou, pero ademas e festival musical mas grandi di e region aki cu 4 anochi di competencia cu participacion di mas cu 400 artista.

Un festival cu ta conta cu participacion di 400 artista cu ta competi pa gana premionan balioso, di sumanan efectivo , pero tambe esnan premio ta gana puestonan di honor durante actividad grandi di carnaval na Corsou

 

FECHANAN

 

CLAVE

 

Inscripcion pa Festival di tumba ta dia 23 di e luna aki y ta entrega tambe letranan.

Esnan cu inscribi sin letra tin te dia 27 pa entrega letranan. Dia 29 ta ta publica listanan oficial y saca orden di aparicion di cantantenan. E anochinan preliminar di e festival di tumba di Corsow ta dialuna dia 31 di januari, diamars dia 1 di februari y diaranzon dia 2 di februari. Diaranzon dia 2 di februari na final hurado ta retira y lo tin musica mientras ta warda decision di hurado.

Bispo di gran final cu ta diahuebs dia 3 di februari durante un conferencia di prensa  ta saca orden di aparicion di agrupacionnan musical (pa e final). Secuencia di cantante ta ser duna sino por e momento ey, nan tin te diabierna dia 4 di februari pa 7 or  anochi duna esaki durante conferencia di prensa “Den Clave”.

 

 

FINAL

 

Riba e anochi final cu ta Diabierna dia 4 di februari e prome agrupacion ta cuminza toca un cuarto pa ocho y no ta desvia di esaki.. Tur otro grupo tin 2 minuut di warm-up. Exactamente 8 or ta habri e anochi..

Na final ta anuncia e 10 finalistanan cu mayor puntuacion. Tambe ta anuncia premiacion pa  mihor areglonan, premio “Beti Doran,”  premio tumba original y premio pa tumba chistoso.

For di e 10 finalistanan ta anuncia e 5 nan cu mayor puntuacion, djey ta anuncia secuencia di 5-4-3-2 y 1 y ta corona e Rey of Reina di Tumba cu ta bolbe canta su tumba.

 

HURADO

 

Tin aspectonan importante di e festival manera hurado, loke ta huzga y con, reglamento pa cantantenan etc. POPO lo riba esaki mañan of un di e dianan nos dilanti. POPO ta publica esakinan pa asina lectornan na Aruba por tin un idea con e organizacion ta trahando na Corsow y kico e Festival di tumba di Corsow ta encera.

 

ARUBA

 

AWOR

 

Ayera a tuma lugar e seyamento di e buzonan pa kavelnan di Carnaval pa loke trata Carnaval 57 den presencia di Notario mr. H. Rodriguez-Taekema y su asistentenan na DIP, cu ta e departamento cu ta encarga cu otorgamento di kavelnan pa nos carnaval.

Publico carnavalesco por cumpra su peticionnan pa kavel na DIP entrante dialuna 17 di januari 2011 te cu diabierna 21 di januari 2011 y lo tin 4 buzon pa entrega y deposita e peticionnan. Un buzon pa kavel pa trailer, stellage of auto pa parada grandi na Oranjestad, un buzon pa kavel pa bende cuminda y bebida pa Carnaval na San  Nicolas, un buzon pa bende cuminda y bebida pa Carnaval na Noord y un buzon pa bende cuminda y bebida pa Carnaval na Oranjestad. Cada peticion ta costa Af. 4,= na stampia, segun e Zegelverordening (AB 1998 no. GT 1), art. 34.

 

POS CHIQUITO

 

O.B.S. BRASS

 

Awe nochi den TGIF por goza di e brass band OBS cu ta e asina yama “otro brassband’ pasobra nos ta pensa riba un pero ta lubida cu tin mas brassband. Na Pos Chiquito POPO a scucha e hobennan aki toca y nan ta zona formidable. Nan ta mas omenos 18 tocador cu ta encera varios veterano y tin tambe grabacion di nancancionnan. Awe nochi por scucha nan na Paseo Herencia y si POPO no ta kiboca nan lo ta cu Ivo Yanez den su programa di carnaval.

Por tuma contacto cu OBS via Chencho  cu ta nan lider na 565-6104 of cu Neomar Maduro na 594-0112. POPO a goza e banda aki y ta mire como un atraccion grandi den paradanan. Unda e gruponan di carnaval ta? Aki tin un opening act masha bunita pa boso presentacion den paradanan.

 

 

NOORD

 

TA MOVE

 

Comision di Centro di Bario Noord ta sigui move y tin mas informacion awe.

POPO  ta skirbi awe riba e actividad importante pa Centro di Bario Noord.

Masquerade Volleyball Tournament combina cu un anochi di Wega di Domino.

Eleccion Reina Infantil di Noord y cu  Noord tin dos participante pa prins y pancho y nan yama combina Taki Berde.  

 

VOLLEY

 

Y DOMINO

 

Dia 4 di februari 2011, scol di Chikitin Bin Bin ta organisa un Masquerade Volleyball tournament combina cu un anochi di Wega di Domino na Centro di Bario Noord. Ban pasa un rato dushi y deportivo. E anochi ta cuminsa for 7 or di anochi te cu 12 or di anochi E ta bai ta un warm up pa Calypso & Roadmarch contest.

Lo tin un premio especial pa e grupo di volleyball mihor disfrasa. Despues di e torneo por baila riba ritmo di SONGGO band… Pa mas informacion pa inscribi pa hunga volleyball por tuma contacto cu :         Salimah Tromp-Luidens 594-0688  of Sharisma Tromp-Farro   594-8208

 

ELECCION DI

 

REINA NOORD

 

Dia 5 februari 2011 e Eleccion di Reina Infantil di Noord lo tuma lugar na Centro di Bario Noord cuminsando for di 7 or di anochi. Entrada ta Afl. 3.= pa mucha y Afl. 5.= pa adulto. Aña pasa e tema di e eleccion di Reina Infantil di Noord tabata materialnan recicla. E aña aki tin un tema nobo.

E muchanan di edad entre 5 y 8 aña cu ta desea di participa na e eleccion por laga nan mayor(nan) tuma contacto cu Marlin Ignacio na cel# 5658712 pa haña mas informacion. Durante e anochi aki lo bai tin coronacion di Reina, Prins y Pancho di Chikitin Bin Bin. Riba e anochi aki tambe, gruponan di carnaval ta presenta nan trahenan carnavalesco.  E meta di e eleccion ta pa parada di Noord tin su Reina Infantil pa habri e Parada di Noord # 46 dia 26 di februari 2011.

 

TAKI BERDE

 

Noord tin dos representante pa Prins y Pancho Infantil dia 16 di Januari 2011. Nan ta Prins “Taki” y Pancho “Berde”. E Prins ta Sachiël Tromp

Naci dia 07 januari  2003, ta biba na Noord. E ta alumno di Felipe B. Tromp

Klas 2 A.  E ta tambe welp den Grupo San Dominico di scouting.

E Pancho ta Gerald Maduro naci dia 16 juni 2000 ta biba na Noord y tambe ta Welp di Grupo San Dominico.

Prins y Pancho, “Taki Berde” ta den ful preparacion pa eleccion di Prins y Pancho Infantil 2011, asina contribui na mantene nos cultura de carnaval y nan lo pone bo  Hari di Berdad. Centro di Bario Noord ta invita henter famia, amigo y conocirnan di Sachiël y Gerald  Pueblo Carnavalesco di Noord, Colegio Felipe B. Tromp, Grupo Traimerdia Washington pa bin Entertainment Center pa asina apoya nan pa nan por trece e corona di Prins y Pancho pa districto di Noord.

Loke ta hasi e presentacion di e Prins y Pancho “Taki Berde” unico ta: con nan a scohe nan nomber y hopi mas.

Pa mas informacion por tuma contacto cu nan mayornan: Sharlyn Tromp-Farro na cel# 5930834 y/of Geraldine Maduro na cel# 5931633.

 

 

 

 

 

One Response to 'POPO'

  1. March 6, 2012 at 12:25 pm
    maya

Leave a Reply