Home Cultura POPO

POPO

2
0
SHARE
- Advertisement -

PABIEN

Awe POPO ta cuminza na felicita nos prins y panchonan cu a keda eligi diadomingo como dirigentenan di paradanan di carnaval di nos isla den nan categoria. POPO ta felicita tambe tur e participantenan den tur e categorianan pa e curashi di a participa y trata di trece un bida pa e publico goza di dje. Nan siquiera a pasa den un experiencia mas den nan bida, un experiencia cu tin caminda habri pa mehoracion den futuro.

 

KI BO SA?

 

Di otro banda, POPO tin miedo di skirbi e BERDAD cu nos no kier lesa ni tende. Esey ta cu segun un calculacion PERSONAL di POPO, si tin 100 % pa duna pa e actividad, POPO ta keda pega na 40 % pa no bay mas abao. Esaki ta loke famianan, conocirnan, gruponan cu nan ta representa, patrocinadornan, organizadornan no kier tende. Ta bini dilanti e ora ey e pregunta di custumber: “ta kico bo sa?”  Mihor POPO keda keto pa no contesta “onsportief” manera ta su tradicion.

 

CHISTE

 

POPO a busca chistenan den tur skina di Entertainment Center pa por a hari, y no por a haya chiste ningun caminda. E tabata bon scondi. POPO a busca instructor tur caminda y no por a logra tampoco. POPO a busca e reglanan publica den cada hoki y no por a haya nan scondi den hoki tampoco.

 

HURADO

 

Lesando y publicando siman pasa e lista di locual hurado mester tene cuenta cune, POPO a puntra su mes caba: “ta cual miembro di hurado ta imprimi e biblia carnavalesco aki den su mente?” Ningun di nan! Lo huzga sigur esun cu a sali poco mihor cu e otro(nan) y esey ta tur. POPO no ta bay decifra e testamento di regla un pa un, pero lo skirbi algo riba e participantenan. Manera POPO sa bisa: Si gusta of no!

 

BIENTO FINI

 

E duo Taki Beerda den infantil no a pone POPO hari, a pesar cu a saca un sonrisa cu e “biento saca fini fini y esun ultimo di “gasoline a caba cerca e pushi”. POPO a mira den e duo aki prospectonan cu por traha riba pa futuro. Manera casi tur cu a sigui tambe, parce cu e “mensahe” tabata tin mas balor cu tur otro aspecto di e eleccion. Esaki a kita basta di e gozo di e eleccion y contamento di chiste cerca casi tur.

 

NOMBER Y FAM

 

E duo Ritmo y Alegria a pone un sonrisa na cara di POO cu e parti di “landakunde”. E chiste riba bo a perde mitar di bo bida y si bo no tin landakunde, bo a perde ful bo bida. Un hari chiki chiki, mas cu un sonrisa, POPO a saca cu esun final di nombrer y fam, burico kens. POPO a haya nan mihor cu e prome duo di Noord y a keda spera kico Arepita con Queso lo bin cune pasobra e nombernan tabata mustra di tin algo aden.

 

MUCHO LEON

 

Arepita Con Queso no a impresiona POPO  y no por a haya un sonrisa ningun caminda, corda un bon hari. El a draai rond tambe mucho riba e buscamento di Compa Leon. POPO su sentimento despues di e duo aki tabata cu Ritmo y Alegria casi sigur lo ta loke hurado lo escoge ( sin pensa mes riba e enciclopedia di reglamento y consideracionnan).

 

BORING

 

Tirando un bista riba e hubenilnan, POPO ta menciona di a gusta e salida di e duo Magia Negra. Pero a duro mucho largo prome cu e cambio y nan a zak aki. Error cu tabata tin tambe cu ta papia di Sr. president, despues e ta bira Sr. Minister, bolbe bira president. Tabata mescos cu e prome duo di infantil cu na dado momento na lugar di tende “Taki” a bin tende Sachil, nomber di e prins. Na dado momento e duo a cay den un palabra cu nan mes a usa, cual ta “boring” y no por lubida cu Arepita tabata tin mucho gritamento manera mayoria.

 

MAGIA BLANCO

 

POPO kier a scucha kico e duo Shon Bati  y Compa Buli tabata tin aden pa kibra e Magia Negra su forza. Nan Shi Preke y Tica Basha Abao tabata bon pero por tabata mihor. El a yuda hopi pasobra nan chistenan tabata debil. POPO ta kere cu ta nan mensahe lo a duna e forza cu huradonan a cay ariba y ta nan tambe a kibra e forza di Magia Negra cu nan Magia Blanco. Pa a gana den e categoria aki.

 

SUPER (SPP)

 

Ora cu e grandinan, e adultonan mester a presenta, POPO a kere cu aki si e cos ta cuminza. Manera el a cuminza el a caba pa POPO.  E “Spaar pa bo dans” no a pega pero POPO a gusta e imitacion di Antonio di Sparkling Dance. E drumimento pafo tambe a causa un sonrisa chikito y e uso di e nr. Di top 100 por a hasi algo mihor cune pa logra punto. El a keda mucho na e cancion y e nomber. E SPP no a pega manera mester tabata.

 

PRIJS ABAO

 

Kwenta Ohmm tambe a usa e Leon. Nan a pasa pa alfabet baha pa atraco y atrobe e leon y keda pega aki. Locual si POPO a goza di nan tabata cu e mensahe tabata “kort en krachtig” manera e macambeznan ta bisa. Esey sigur a pisa den punto. Nada di intercambia cu musica cada vez pa bin cu otro chiste y nada di bini cada vez cu un mensahe kibrando esencia di e actividad. Sonrisa grandi nan a logra cerca POPO cu e chiste di”prijs di mas abao”. POPO a haya nan mihor cu e prome y a keda spera di 3.

 

PIN MI

 

E duo Pin Mi tabata tin un bon salida y cla pa domina nan publico, pero no a probecha di esaki. E piscina bashi no a dal manera mester ta.  E luz di frigidaire tampoco pasobra tur dos tabata cosnan conoci gasta caba, Marilou tampoco tabata tin smaak. POPO tin cu bisa cu e prins por a haci e show atractivo si e no a sconde su cara (cabez abao) durante casi henter su actuacion di manera cu bo no por a mira su cara ni reconoce.  POPO a keda aki riba Kwenta Ohmm pa gana y e resultado a bira asina tambe.

 

PREPARACION

 

Pa prins y pancho, tin henter un aña pa busca un pareha cu pr ta atractivo y energetico y dinamico riba escenario. Un henter aña pa busca un set di chiste pa for di nan escoge loke kier usa. Un aña pa por ensaya hasta cu microfon pa evita gritamento. E gritamento no ta bin pasobra e muchanan kier grita. E gritamento ta bin pasobra nan no tin experiencia cu microfon y ta kere cu e publico no ta scucha nan suficiente y nan ta halza voz (por nada). Mester siña ensaya cu un microfon prome cu presenta.

 

 

CHISTENAN

 

Durante henter aña por scucha chistenan original cu ta ser conta of cu ta bin dilanti den tur sorto di forma. Anota esakinan y adapta nan pa e show. Tin ademas miles di chiste cu por haya riba Internet. Busca kico ta atractivo pa eleccion y su publico,. Traduci nan , adapta nan pa e actividad y bo ta mas fuerte. Trata na bin cu cosnan nobo y no ripiti chistenan cu ta gasta caba den tur sorto di forma.

 

 

SCHETS

 

POPO semper tabata contra di schetsnan den eleccion di Prins y Pancho. Por usa schetsnan si henter e show ta draai rond di esaki pero na un manera cu publico por scucha y sigui tur dialogo riba escenario. E escenario di Prins y Pancho no ta escenario di Teatro y no tin microfonnan special pa capta cada palabra sin cu tin cu usa microfon den man. Esaki ta kita hopi di e actuacion.

 

CANTIDAD

 

Nos mester yega bek na e anochi(nan) caminda tabata 5 pa 10 pareha infantil y hubenil ademas 10 of mas pareha adulto pa un eleccion di prins y pancho. Si cuminza traha for di awe, ta logre. Cuminza awe y lo ripara tambe con lihe e fecha ta bo dilanti. Pero ora presenta ta algo bon hinca den otro a prepara dunando e publico balor pa nan placa.

 

SPECIALISTA

 

DI WOWO

 

POPO lo kier sa cuanto hende no a bishita docter di wowo ayera debi na e escenario di ciega hende cu a ser usa . Dos screen di Nightclub cu parce un “psychedelic show” di añanan 70. pa publico den sala e tabata fastioso, corda pa esnan na cas cu a mire durante e transmision di “saludos for di Africa y Mongolia” cu tabata tin.

 

KEN NAN TA

 

POPO ta keda aki na e pregunta cu a lamenta POPO di puntra aña den aña afo ultimo 10 pa 20 aña. Kendenan a participa pa Prins y Pancho ? Dos dia prome cu eleccion a bin haya nomber di participantenan. E dia prome cu eleccion por a mira potretnan den corantnan. Pero kende cada un ta? Con nan a prepara? Nan a yega di subi escenario? Ta nan debut ? Di cual bario nan ta? Kico nan ta pensa di brinda e publico? Kendenan ta tras di nan? Tur e preguntanan aki ta perdi mescos cu 10 di e personahenan  cu tabata riba escenario. Seis ta e ganadornan cu nos lo mira durante e temporada aki y for di awe e otro 10 nan ta desaparece. Kende otro mañan sa kendenan a trata di brinda nos placer diadomingo? Hobennan cu a sacrifica pa tene e tradicion di carnaval na bida. Muchanan cu a demostra un corahe hopi grandi pa presenta dilanti algun cien hende y cu pianan temblando, stoma gruñando di nervio, cu miedo di lubida nan linea di expresion. POPO ta kita sombre saluda cada un di boso. Ganador of no logrador di suficiente punto, boso a tene nos contento.

 

OTRO TEMA

- Advertisement -

DUNA COMENTARIO

Please enter your comment!
Please enter your name here