Home Cultura POPO TA INFORMA

POPO TA INFORMA

0
0
SHARE
- Advertisement -

 

ROBERT

Pa Fakkeloptocht, Digicel ta preparando pa ranca sali na grandi y nan tin contrata pa toca pa nan ningun otro cu Robert Jean d’Or y su solo banda show. Robert manera ta conoci ta toca tur aña pa los Laga Bay pero pa Fakkeloptocht, ta Digicel ta ranca e cabuya musical.

 

INSCRIPCION

 

Ayera tambe Digicel a habri pa inscripcion y esaki lo ta te cu diabierna awor na nan sede den Marisol Building y ta keda habri te cu 8 or anochi pa tur hende cu ta interesa  pa join e grupo bin iscribi. Solamente 65 florin ta paga y ta inclui T-shirt y headpiece.

E MECHA

 

Varios hende a puntra POPO ultimo tempo di cierto actividadnan. POPO ta referi nan tur na SAC pasobra  POPO ta mes leu cu nan pa locual ta informacion riba e actividadnan.

E warm up concert diabierna awor na San Nicolas mes POPO no tabata sa kico e ta encera y kendenan lo duna concierto, ni unda e ta tuma lugar na San Nicolas pasobra e programa no ta menciona esaki.

Pero despues POPO a logra sa cu e Concierto ta bay Noord na Stadion Frans Figaroa cu diferente banda musical y un sorpresa cu SAC ta trahando ariba.

E anochi aki lo ta e “Ban Cende mecha” manera tabata aña pasa.

 

DESCONOCI

 

E siman siguiente dia 14 cu tin e Carnival Happy hour y tampoco  ta conoci kico e ta encera y unda e lo tuma lugar, ni e Salsa Dance Contest pa hubentud diasabra dia 15 d juni. Esey ta djis pa keda riba e prome dos simannan di e luna aki.

 

RUTA Y KAVEL

 

E aña aki sigur lo mantene e rutanan di carnaval manera e ta ultimo añanan. Tabata tin papia di lo cambia ruta, pero ta conoci cu e pueblo carnavalista no kier mira e cambio y cu eliminacion di e kavelnan. POPO ta contento cu a deshaci di e idea di cambia e aña y cu lo mantene tur cos manera e ta sin cambio. E unico cambionan cu lo por bini ta lugarnan unda construccion di e linear park ta tumando lugar durante e periodo aki.

 

MUSICA

 

Por a ripara caba cu bandanan ta estrenando nan musica di carnaval. Dushi Band tin su tema cu el a lanza, tambe BMW tin un tema cu nan a lanza caba, y Youth Extreme. Youth Extreme tambe tin su tema cla y e dianan aki tambe e lo zona, principalmente pa e Candela cu por spera riba caya diasabra awor cu TOB cu nan ta compaña y den parada grandi cu e tema di “I love Calypso”. Por spera di Youth Extreme cu nan “man ariba pomp e” di 13 aña pasa den version moderno. “Rise Pop” a wordo estrena ayera despues di varios ensayo special prome cu grabacion cu Ron cantando. Impak tambe ta pisa caba cu su tema di promocion pa carnaval 57 y “Breaker” no ta haci wega y lo ta pisa cu Majestic hunto cu banda Song Go como di 2 banda..

 

VONDELLAAN

 

Pa Diasabra awor lo ta bon pa por tin e vigilancia extra na final di e parada principalmente na yegada na tereno di cricket pa cruzada pariba di Banco di Caribe. Nos ta corda ainda con aña pasa e lugar aki a bira e “Hotzone” cambiando di vecindario di Royal Plaza pa Vondellaan.

 

TURISTANAN

 

Turistanan si ta pasa den un anochi agradable pasobra cu e cambio di pabao bin pariba, nan ta para for di DOW te na Wilhelminapark tranquil di nan y den e prome ora y mey ta haya e parada nan dilanti y asina no tin cu spera te casi mey anochi.  Cu e ruta bieu, ora 10 or bati ya mayoria di e turistanan a tuma caminda pa hotel, fada di warda asina tanto. Aña pasa masha bon comentario tabata tin di bishitantenan pa e fakkeloptocht cu nan a goza masha hopi di dje.

 

MAJESTIC

 

POPO a mira e t-shirt y acesorionan di Majestic pa diasabra awor. A ser bisa na POPO cu e aña aki ta mescos cu den pasado, calidad ta bin na prome lugar pa locual ta bistimento di miembronan di Majestic. E t-shirt di Lustrum Celebration di e grupo ta hopi bunita y ilumina tambe. Solamente 75 florin pa participa den e grupo. Ayera POO a menciona caba cu nan sede a muda y ta Bodylocker na Morgenster 43 G. Pa e paradanan di anochi Majestic tin un trahe y pa paradanan den dia lo tin otro trahe. Esnan di anochi ta conoci caba pero locual ta e trahe pa paradanan den dia, mester spera te dia di parada grandi na San Nicolas. Aki tur evento di carnaval lo wordo ilustra den e tema di “Aruba’s Carnival Events” como homenage na Carnaval di Aruba y celebrando 5 aña di existencia di e grupo cu dos aña a conquista tambe titulo di Grupo di Aña.

 

 

CHAMPAGNE

 

Di Grupo Champagne POPO no a tende mucho ainda. E dianan aki nan ta sali sigur cu nan macuto di informacion. E trahe si di Champagne lo ta un beyeza e aña aki y di esaki tambe por spera hopi informacion e dianan venidero.

 

PROHIBICION

 

POPO a wordo acerca  tocante prohibicion di toca cancionnan cu ta participa den calypso y roadmarch. E prohibicion tey. Cancionnan cu ta wordo toca den calypso y roadmarch no mag wordo toca na ningun emisora of publicamente prome cu e anochi di concurso. POPO a haya comentarionan riba esaki di tur banda. Esnan pro y esnan contra e medida aki, y esaki lo por bira un di e topiconan di discusion e dianan aki tambe. Pero e prohibicion aki ta nada nobo. Pa añanan largo esaki tabata un di e reglanan y el a funciona tambe. Awendia tin reclamo cu e reglamento ta stroba produccion di e bandanan.

 

ELIMINACION

 

Locual si mester elimina durante e concursonan di calypso y roadmarch ta e voz cu ta zona mey mey di e canticanan den sentido di : Aruba’s roadmarch contest 2011”. Esaki ta daña e cancion y despues di esey, e ta mata e cancion pa por bay internacionalmente tambe. Ademas e ta trapamento di creatividad di e compositor y areglista, un falta di respet pa nan. Si ta pa strobe hende di graba e cancion, esaki no ta conta mas. Tin tur sorto di manera tecnico awendia pa haci grabacion toch. Ta hasta conoci cu seis ora despues di e concurso ya e grabacionnan ta riba caya bendi na Hulanda cu of sin e voz di interupcion aki.

 

 

INFO SAC

S.A.C. ta extende un coordial invitacion na tur lider di grupo di Carnaval  sea di mucha of adulto pa asisti na un reunion di sumo importancia awe nochi 7:30pm na oficina di S.A.C. na Dakota/

Topico cu lo wordo trata ta e proposicion cu a bini di parti di Gobierno di Aruba pa medio di Minister di Turismo y Cultura durante e reunion di dia 9 di november 2010. Den e reunion a wordo trata e punto di sosten financiero di parti di Gobierno di Aruba pa gruponan di Carnaval.

Pues S.A.C. ta spera cu tur lider di grupo of 1 di nan representante por ta presente pa asina dialoga riba e punto aki y pa asina esnan presente por haya un resumen di e ultimo desaroyo pa loke ta trata Aruba su carnaval.

ORA TA CONTA

S.A.C. ta hasi un suplica pa tur persopa ta presente na tempo pa e reunion di awe nochi pa asina cuminsa y termina e reunion den e tempo stipula y caminda cu lo por sali cu un proposicion satisfactorio pa tur esnan cu ta contribui grandemente na e celebracion cultural cu Pais Aruba ta celebra anualmente.

REGLANAN

Alabez S.A.C. ta informa cu tur su formulario y reglanan ta riba e website  www. Carnavalaruba. net  .  Pues S.A.C. ta spera cu tur grupo di carnaval por download e formulario y yena tur nan informacion pa asina  S.A.C. na su turno por suministra esaki na tur esnan cu ta interesa pa sa mas informacion di cada grupo.

 

- Advertisement -

DUNA COMENTARIO

Please enter your comment!
Please enter your name here