Home General Pueblo kier sa: ken ta asumi responsabilidad pa black out atrobe?

Pueblo kier sa: ken ta asumi responsabilidad pa black out atrobe?

0
0
SHARE
- Advertisement -

Atencion Ing. Oslin Boekhoudt (WEB), Ing. Rob Henriquez (Elmar) y Drs. Frankling Hoevertsz (Utilities) Un averahe di por lo menos 1 bes pa luna coriente ta bayendo pa ultimo temponan ORANJESTAD(AAN): E momento ta yegando cu pasenshi di pueblo ta alcansando su limite di tolerancia y sea Gobierno ta asumi su responsabilidad of pueblo mester acudi na otro instancianan (manera Corte) pa busca su derechonan. Pero e cuenta cu tur luna coriente ta bay mester yega na un final pronto. Ta mustra manera un “joke” cu tur luna coriente ta bayendo pa e ultimo temponan aki, sea ta pa culpa di WEB Aruba NV of NV Elmar no ta haci diferencia pasobra ta pueblo ta sufriendo toch.
Si ta cos cu e cuenta di awa y coriente ta abou lo por tabata un otro situacion, pero pago na cuentanan di utilidad hopi bes ta pisa masha hopi mes riba e presupuesto di tur famia. Riba dje, e empleadonan di ambos compania ta esunnan di miho paga na Aruba, cu tur tipo di bonus halto y beneficionan secundario cu casi ningun otro compania tin. Si ta paga nan bon y nan ta brinda un bon servicio no ta problema, pero net lo contrario! Coriente ta bay y bin sin cu ningun hende ta ni bisa nada, no ta duna motibo ni nada. E ultimo “Black Out” a papia di un investigacion independiente pero te awe e director di WEB no a sali pa splica e doñonan di WEB, esta Pueblo di Aruba, kico a pasa realmente y con e tin pensa di regla e asunto aki pa evita ripiticion.

Desde e tempo ey, TUR SANTO LUNA coriente ta bayendo sin cu ningun hende ta haciendo algo. Den esaki no por keda sin atende cu e propio Minister di Utilidad, Ing. Mike de Meza cu a yega di sali duro riba e directornan di WEB y Elmar pero nunca mas a haci algo serio pa corigi nan maneho.

Ta duna e impresion cu Gobierno tin miedo di mishi cu e dos companianan aki. A spera un Mike de Meza mucho mas fuerte den su maneho di utilidad. Den oposicion el a papia henteramente un otro idioma, manera cu lo instrui pa haci un investigacion detaya di e procesonan den e companianan. Den esaki e “detailed audit” lo mester a saca afo si e cobranzanan ta cuadra cu realidad y si e forma con ta conta e “brandstof clausule” ta bon. Pero desde cu el a bira Minister di Utilidad, ta parce cu e companianan a sa di “convence” y te dia di awe nada!

Ta bini acerca cu Utilities Aruba N.V., maneha pa Drs. Franklin Hoevertsz lo mester a bira un compania cu mucho mas autoridad y supervision riba tanto WEB como Elmar. E impresion cu tin awor no ta cu esaki ta sosodiendo suficiente. Utilities Aruba N.V. como tal ta keda di ta un compania riba papel pero sin ningun autoridad.

Esaki ta lamentable pasobra tempo cu a crea Utilities Aruba N.V. tabata precisamente pa mantene politica leu di e companianan, pero e no tabata pa ta un compania na soño y pa permiti coriente bay tur luna sin cu ningun hende ta asumi responsabilidad.

Pueblo pagado di cuenta di awa y coriente no tin pensa di sigui permiti e maneho aki, tolera tambe pa Gabinete Mike Eman, esta cu pueblo ta paga prijs di oro pa haya servicio di koper. Un hende(nan) mester para responsabel y si mester, cabesnan mester lora, pa por corigi un tendencia negativo. Y si e dos directornan no por, anto manda busca Jossy Lacle y Freddy Rafine back, pasobra tempo di nan tempo e cosnan aki no tabata sosode!

Riba e foto por aprecia d.r.p.d. Drs. Frank Hoevertsz di Utilities Aruba N.V, Ing. Rob Henriquez di Elmar y Ing. Oslin Boekhoudt di WEB. E tres directornan aki awe debe nos pueblo un splicacion convincente di con tur luna coriente ta bayendo, strobando calidad di bida di e clientenan y economia en general. Sea nan ta mehora e situacion y evita ripiticion of nan mester busca un otro trabao. Pero asina aki e lo no por sigui mas!

- Advertisement -

DUNA COMENTARIO

Please enter your comment!
Please enter your name here