Home Politica Refleccion Riba Dia Di Betico

Refleccion Riba Dia Di Betico

10
0
SHARE
- Advertisement -

Evelyn Wever-Croes

“Si nos mester cai na caminda hamas boso laga e causa un banda, pero gara e bandera Arubano y sigi lucha pa realisa y preserva e libertad di nos pueblo”

ORANJESTAD(AAN)– Dia 25 di januari nos ta celebra e fecha natalicio di Gilberto François “Betico Croes”. Betico a nace na Santa Cruz riba 25 di januari 1938. Despues di su estudio secundario na Aruba, el a bai Hulanda pa continua cu su estudio na Academia Pedagogico na Hilversum. Na 1959 ela logra su “hoofdakte” como docente. Ora el a bolbe Aruba el a bai duna les na Colegio San Hose y Colegio San Antonio na Santa Cruz..

Na 1967 su carera político a cuminsa, prome como miembro di partido AVP. Ora Betico a wordo nenga e posibilidad pa bira líder di partido AVP, el a separa di AVP y na aña 1971 ela funda partido Movimento Electoral di Pueblo (MEP). Desde fundación di e partido te na su fayecimento, Betico tabata líder y presidente di e partido. E mes nunca a ocupa posición di diputado of minister, pero como “Consehero General” Betico semper tabata tin un influencia grandi riba e coalicionnan cu MEP a forma parti di dje.

LUCHA PA STATUS APARTE

Betico Croes a distingui su mes pa e derecho di autodeterminación di e pueblo Arubiano. Pa logra esaki, Betico a busca simbolonan cu a uni nos pueblo y asina na 1976 Aruba a conoce su propio bandera y himno, danki na insistencia di Betico Croes. Betico y MEP tabata lucha pa un status aparte pa Aruba dentro di Reino Hulandes, los di Antiyas Hulandes. Riba 25 di maart 1977 el a organisa un referendum, cu a conduci na nos  Status Aparte.

Na 1977, ora gobierno central kier a tene MEP (e partido mas grandi)  for di gobierno, Betico Croes a lanta e pueblo di Aruba pa manifesta contra e poder di Curacao. E situacion a escala y Curacao a manda ‘riot commando’ riba e manifestantenan. Algun manifestante a keda herida cu bala di carabina. Gobierno Hulandes na e momento ey a realisa cu e mester tuma e exigencianan di Aruba na serio y e gobierno Hulandes a invita un delegación di Aruba pa bai Den Haag pa delibera. Eynan Betico Croes a bringa pa Status Aparte.

Betico Croes a guia e delegaciOn Arubiano durante e “Ronde Tafel Conferentie”  decisivo na februari 1981 y maart 1983, caminda el a logra e Status Aparte entrante 1 di januari 1986. Un condicion di parti di Hulanda tabata cu Aruba lo ta independiente entrante 1 di januari 1996. Betico Croes no tabata kier e independencia na e momento ey, pero toch a bai di acuerdo, cu e speranza cu e lo por a pospone of elimina  e independencia. Berdad na aña 1999, bao liderazgo di Nel Oduber, e condicion di independencia entrante 1 di januari 1996 a wordo elimina.

Den su discursonan elocuente Betico Croes a enfatisa cu e no tin miedo di ta un mártir pa e causa sagrado di Aruba. Betico te asta a wordo encarcela, despues   cu nan a haya un arma den su auto, algo cu segun esnan cerca di dje tabata un complot contra dje. Durante un parada durante elección na 1983, el a wordo herida pa bala door di un polis. Riba 31 di december 1985, apenas algun ora prome cu Aruba lo a drenta su Status Aparte, Betico Croes a keda seriamente herida den un accidente di auto, cu te awe a keda un misterio. Casi 11 luna después, riba 26 november 1986, el a fayese.

Betico Croes ta wordo considera e ‘Tata di nos país’, y merecidamente ta carga e titulo di ‘E libertador di Aruba’.

Betico Croes a bisa “Si un dia nan pone nos Status Aparte na peliger, esey kiermeen guera” y “Si nos mester cai na caminda hamas boso laga e causa un banda, pero gara e bandera Arubano y sigui lucha pa realisa y preserva e libertad di nos pueblo”. Esaki ta hustamente e motibo pakico mi a drenta política. Pa defende nos autonomía.

E frase di Betico cu mas mi ta sintimi identifica cune  ta “e felicidad cu ami ta desea pa mi yiunan, ta e felicidad cu mi ta desea pa henter mi pueblo”.

Laga nos celebra Dia di Betico manera e tabata kier semper, den union cu otro y pa amor pa nos país.

- Advertisement -

DUNA COMENTARIO

Please enter your comment!
Please enter your name here