UN DISCURSO Y SU ALCANCENAN

Publication: Monday, 31 January 2011. Categoria: Editorial

jossy_mansur_pic           Tin biaha bo ta haya den politica, un o mas persona cu ta kibra cu e molde di loke ta actuacionnan estrictamente partidista, pa asumi posturanan cu ta traspasa e fronteranan di loke ta netamente politica partidista. Mi no tin ningun idea pakico Prome Ministro a hacie  durante e conmemoracion di e fecha natalicio di Betico, ni con leu e kier a bay den su enfoke di e figura di kende ta, pa mi, e mas sobresaliente di e ultimo decadanan den e mundo politico di Aruba.

           Nos tabata custumbra cu esnan di su partido cu ta canta su glorianan y ta eleva su status, no solamente pa mantene su labornan y su logronan bibo, sino pasobra nan ta sirbi nan tambe como un refleho positivo di nan partido. E dirigentenan di MEP a percura pa mantene e figura y recuerdo di Betico bibo, no solamente pa rindi e debido homenahe na dje, sino pa purba mantene e seguidornan di Betico dentro di e campamento di MEP.

           Mike, net lo contrario, y bayendo linea recta contra e normanan estableci den pasado, o sea pa cada lider di cada partido elogia loke ta di nan y trata e otronan cu menos consideracion, a enfoca e figura di Betico como uno di henter Aruba y henter su Pueblo. El a demistifica Betico como un figura di un partido particular, y a convirtie den un figura nacional, cantando su glorianan den terminonan realistico, y elogiando su logronan pa Aruba.

           El a rekeri un gran curashi di parti di Mike, pasobra mi ta sigur cu dentro di su mesun partido no ta tur a keda conforme cu e contenido di su presentacion, y a prefera di laga Betico keda como un figura di MEP, pa asina su mesun hendenan ocupa nan mes cu e labor di mantene su obtencionnan como parti di su partido. Sinembargo, Mike a logra mishi cu e sentimentonan di hopi hende cu a keda conforme cu e Prome Ministro di Aruba a papia manera un estadista y a reconoce e meritonan di un politico cu no ta pertenece na su partido.

           Pa prome biaha Betico a ser reconoci door di un politico prominente cu no ta di su partido, como un “libertador”, termino cu cual diferente persona ta sinti nan mes un poco incomodo, por ta pasobra nan ta basa nan mes mas riba e definicion propio di e palabra y no su simple relacion cu un of otro hazaña o logro. Betico ta keda e constructor di nos Status Aparte. Su lucha a conduci nos na e logro ey, y no ta importa cuanto declaracionnan contrario surgi,  e ta keda, den mi buki, e berdadero autor di nos Status Aparte.

 

               

 

Leave a Reply