Home Cultura Universidad Di Aruba Ta Organiza Charla Tocante Fotografia Documental

Universidad Di Aruba Ta Organiza Charla Tocante Fotografia Documental

1
0
SHARE
- Advertisement -

ORANJESTAD (AAN): Despues di e tayer “Expedicion Rescate”, cu a tuma luga aña pasa na Universidad di Aruba, e aña aki lo sigui cu algun tayer den cuadro di investigacion y documentacion di nos historia y cultura.

   E Centro di Investigacion (CRD) hunto cu e Centro di Lifelong Learning (CLL) di Universidad di Aruba lo prepara y organiza den 2011 diferente curso pa asina prepara participantenan pa salvaguardia dato historico di nos herencia cultural.

  Tambe lo organiza charla pa duna informacion y conscientisa publico riba importancia y e aporte cu investigacion ta duna na desaroyo di un pais.

   Den cuadro di esaki lo tene un charla“Fotografia Documental”riba uso di fotografia como un medio di documentacion y alavez como medio di expresion y concientisacion social.

   Orador di e anochi aki ta Alexis Perez Luna, fotografo famoso riba nivel internacional procedente di Venezuela. Sr. Perez Luna tin experiencia di trabao amplio y varia na diferente pais di mundo y tin varios publicacion riba su nomber. Alavez, Sr. Perez Luna ta duna regularmente tayer y curso tocante fotografia documental y fotografia como medio di expresion y concientisacion social na universidadnan y na organizacion di reportero y fotografonan na Venezuela y den nos region. E tin alavez un conocimiento amplio di fotografonan di nos region cu a duna un ehempel di e manera con por usa fotografia den e proceso pa fortifica e memoria cultural y social di un pais.

   E charla di Sr. Perez Luna ta cuadra cu e afan di Aruba, cu ta celebrando su 25 aña di Status Aparte, pa enfoca riba mantencion y fortificacion di e cultura y tradicionnan nacional. Alavez, e charla lo acentua e importancia di fotografia documental pa traha conscientemente na e imagen y cara di Aruba, como pais

den desaroyo.

  Pesey, Universidad di Aruba ta invita un y tur: pueblo en general, y studiante, docente y experto riba tereno di estudio social y cultural en particular, pa acudi na e charla interesante aki. E charla ta tuma luga diahuebs 13 di januari venidero, pa 7.30 di anochi, na L.G. Smith Blvd. 158, e edificio APEX.

- Advertisement -

DUNA COMENTARIO

Please enter your comment!
Please enter your name here