Home Politica PDR cu amienda pa evita cu Hulanda purba duna su mes mas...

PDR cu amienda pa evita cu Hulanda purba duna su mes mas poder cu Statuut ta prescribi

1
0
SHARE
- Advertisement -

ORANJESTAD (AAN)* Ta un hecho cu den Reino Hulandes tin un deficit democratico pa cu leynan di Reino: practicamente ta e Gobierno Hulandes ta traha ley y e Parlamento di Hulanda ta aproba nan. Parlamento di Aruba hopi biaha practicamente no tin suficiente instrumento pa cu e leynan aki, vooral si ta trata di leynan cu bin bow un “bachi” cu nan no lo ta ensera cambio di Statuut (articulo 55 di Statuut ta duna Parlamento e derecho pa desaproba un cambio di Statuut, via un ordenansa).
Pa basta tempo caba lider di PDR, mr. Andin Bikker, a bin ta remarca cu Hulanda poco poco ta bezig ta purba touch e autonomia di Aruba via porta di cushina: un ehempel hopi reciente ta cu den e acuerdo di Gobernacion pa e Gabinete nobo di Hulanda ta ancra cu ta bay bin cu un Rijkswet Personenverkeer, no obstante cu e admicion di personanan na Aruba ta algo cu ta cay bow di autoridad di Aruba, no di Hulanda!
Recientemente tambe a bin resulta cu Gobierno di Reino (Hulanda) ta persisti pa regla ken por worde admiti cu of sin visa na Aruba. Riba argumentonan funda di colegionan di advies cu no tin suficiente base legal pa esaki paso ta algo cu grandemente ta regarda e paisnan mes, Gobierno di Reino a djies contesta sin ningun argumento of splicacion cu no ta wak motibo pa cambia di su punto di bista!
E ironia ta cu Hulanda no por dicidi mas pa su mes encuanto visa pa su teritorio, paso e autoridad ey nan a pasa pa Union Europeo. Awor e kier bin dicidi algo cu e no por dicidi pa su mes mas, pa Aruba!
PDR ta di opinion cu e ley di Gobierno di Reino pa trece dunamento di visa bow di Reino (=Hulanda) y e Rijkswet Personenverkeer ta indirectamente cambionan di Statuut, paso nan ta cambia e reparticion di autoridad actual cu ta ancra den e Statuut via “interpretacion” na fabor di Hulanda. E ora den opinion di PDR mester aplica e procedura mas pisa similar na esun pa cambia Statuut: Parlamento di Aruba mester tin derecho di desaproba esakinan via ordenansa (articulo 55 di Statuut). Sin embargo, den e concepto di Rijkswet pa cu visa no tin ningun procedura similar na articulo 55 di Statuut. Pesey den un reporte reciente di Staten (“verslag”) cu a sali pa Hulanda siman pasa PDR a duna di conoce cu den su opinion mester sea anula e concepto di ley pa cu visa (“Rijksvisumwet”) of PDR lo bin cu un amienda den e ley caminda e procedura similar na articulo 55 mester worde sigui: Parlamento di Aruba mester haya e derecho di desaproba esaki. Un amienda asina ta importante paso e lo evita cu Gobierno Hulandes usa su poder cu e tin pa traha leynan di Reino “normal”, cu e intencion pa re-aloca podernan cu pa Statuut no ta di Reino (y asina de facto cambia Statuut sin cu Parlamento di Aruba por eherce su derecho di “veto”). PDR no por imagina cu Tweede Kamer lo bay ta contra un amienda asina paso Tweede Kamer mes tin varios concepto di leynan andando pa purba frena e minamento door di Union Europeo di nan poder representativo, wak por ehempel e ley cu volgnummer TK 30874.

- Advertisement -

DUNA COMENTARIO

Please enter your comment!
Please enter your name here