Home Cultura POPO

POPO

4
0
SHARE
- Advertisement -

Nos a drenta e dianan di Calypso y Roadmarch Contest, sinembargo awe nochi caba ta di tres anochi y nos lo bay conoce e finalistanan pa diasabra awor. E prome anochi caba por a scucha algun bon prospecto pa gana e corona of cay den premiacion mescos cu posibilidadnan pa clasificacion di varios di nan.

 

BMW

E agrupacion hoben BMW a habri cu un concierto di 8 cancion y te ainda POPO no por haya e sonido BMW cu POPO ta sperando. Mester bisa si cu e areglista hoben Claudius Philips Jr. ta progresando y lo no dura mucho cu e lo tin The BMW Sound. POPO a gusta Mighty CN cu su “We are born arubans” pero si e lo clasifica POPO ta laga pa hurado.

Francia Falconi tambe a haci un debut aceptable. Loke si POPO no ta gusta cu e tipo di roadmarchnan aki ta e mezcla di Papiamento cu ingles. Leu bo no ta yega cu esakinan si e cancion no ta un pisa pa ta un ganador.

Joe rock tambe a presenta un bon calypso pero no un ganador. Esey ta no un pa termina na di prome te 5 lugar. E cantante 101 a haci su best un biaha mas pero no cu roadmarch ganador. Daddy Bass tabata basta bon y e tambe ta keda den man di hurado pa su clasificacion.

 

ZETA

 

TSUNAMI

 

POPO no a gusta e zonido di Zeta Band. E zonido aki tabata debil y no locual Tattoo a merece pa su caliber di cancionnan di participacion. Pero e ritmo calypso estilo Le Groove a cay bon y por a nota esaki na e areglo di Antoni Gario. E roadmarch tabata basta bon pero “not the thing”.

Tsunami POPO lo kier scucha atrobe, principalmente e calypso “Zoya den mi stoel” cu su tokenan di calypso di humor. E roadmarch di Ofo a zona bon y lo por haci algo pa Champagne riba caya. BG, Bobby Gibbs a bin resulta e cantante cu mester gana te na e momento ey. BG tabata tin e mihor roadmarch di e prome 13 cancionnan presenta. Su “Like we out a jail” tabata tin tambe e toke Gario cu a haci areglo y yuda cu composicion. POPO a gusta e “salvahe” di Sasha mas cu e Sexy cu a scucha dialuna anochi. Hey…. esey ta POPO su gusto no mezcla esey cu e opinion general di otronan.

 

LE GROOVE

 

Le Groove tambe a baha dialuna anochi cu un concierto completo di roadmarch. Aki ta unda e competencianan pa BG a cuminza cay aden. POPO a haya e roadmarch di Casual poco debil y despues Big Vibes  a sufri di nervio den su cuerdanan di voz pasobra na varios ocasion el a bay for di tono te cu el a lastra e coro cu ne na dado momento. Pero ora cu pia a pega riba suela, e cancion a mehora ta tanto cantante como coro a cuminza saca loke nan tin aden  y e ritmo dushi di lastra pia a contribui hopi na esaki.  Mescos a pasa tambe cu Locura di Zim zim, pero Dumbo a trece cambio y a cuminza move e publico mas cu su Boom-C burning in the Savannah. El a hiba nos na palacio di roadmarch, calypso y steelband di Trinidad mes ora. Dumbo a pega pa clasificacion.

Mack Atack tambe a haci un cos cu su “bo cuenta om” y e anochi aki e tambe a conta. POPO a gusta e Woot woot di Stoute jongen. Ta stout mes el a baha riba escenario. Otro cu POPO ta mira den clasificacion ta e comeback di Ezee B. “Bradley tabata su “old self” y hasta por bisa “den su sjeito”. El a sali pa duna BG tambe dolor di cabez y midi cu Dumbo. POPO a haya Diamond chip di aña pasa mas fuerte cu e aña aki, pero si e clasifica…… spera un salida cu tur forza. T-Money si POPO a mira den clasificacion. T-Money un biaha mas a bini cu un roadmarch cu tur ingrediente di ta un ganador.

 

DUSHI

 

BAND

 

Dushi Band a cera e anochi cu  medio concierto compara cu BMW y Le Groove. Pero e medio concierto aki a resulta un di hopi peso y hopi prospecto pa clasificacion y un cancion cu tin toke di ganador maximo ta colga riba su cabez, pero mester spera e dos otro anochinan prome. POPO tabata contento di mira King George back riba escenario. King George a mustra di a progresa basta. E no ta un ganador, sinembargo e ta un figura cu nos kier mira.

Esun cu a sali cu tur cos aden tabata Antony Gar…..cia, Menjoe. E cantante aki a “Clap e” hopi duro y a laga sa cu e ta conta cu clasificacion e manera cu el a presenta su cancion.  Otro cu a mustra di ta cla pa diasabra awor ta Mighty Mike cu su “D’belly Groove”. Esun cu un sabor di ganador maximo riba e prome anochi caba, tabata Caiso Teddy cu “Jam Frenzy”. Di e seis cancionnan mihor resona e anochi aki esun di Teddy tabata esun maximo.

 

AWE

 

ANOCHI

 

Awe nochi tin hopi trabuco tambe pa presenta. Di NBO por spera loke The Baron ta bin cune, tambe kico lady V tin como reina di calypso pa defende su corona y su roadmarch cu semper t fuerte. Hammer, ex rey tambe no por keda sin menciona, ni Dr. Hook, Charles Hooker cu semper tin calypso atractivo y ta fuerte den roadmarch.

Di Eruption Band tin cu tene bista riba Mighty burr, Samir. Despues ta haya Songgo cu por resulta den e sorpresa grandi.

 

SONGGO

 

Den Songgo Band nos ta haya Queen Hortence and the DB’S. Rita Werleman como Queen Hortence ta keda un participante cu e publico kier mira y scucha ki “berdad” e lo expresa y dede di kende e lo trapa. Nan ta papia di Sarita’s Ting. POPO no ta si ta pa motibo cu Queen Hortence a bishita Sara. POPO si a haya un t-shirt masha bunita di dje relaciona cu e potpouri “Sarita’s Ting”. Danki su Majestad.

Den e banda aki POPO ta pusta riba Kampi. Raymond Kamperveen pa su nivel di canto y tambe pa e areglista cu e tin pa “Whip Whap”, e hoben studiando na Hulanda, Stefan Bartels Daal cu den futuro lo conta na grandi. Cancerman semper a haci bon papel y awe nochi e lo tin un calypso “Shame” y un roadmarch “Fire. E mes a aregla su cancionnan.

 

IMPAK

 

Di Impak POPO por bisa di no ta spera mucho. Sinembargo, mirando con nan a crece den ultimo 12 luna, mester tene cuenta cu nan awor si. “Mighty Breaka” ta keda e diamante di e grupo aki y lo sali cu calypso y roadmarch. E roadmarch “Wak bo bumper cha cun cha” tin POPO curioso caba. Lady L POPO tin cu mira mas tanto riba escenario pa huzga. El a haci bon papel caba pero no a impresiona POPO manera mester ta. Kizas Lilly lo percura pa esey e biaha aki cu “Lagu’e”. Un cu POPO lo por pusta ariba den calypso ta Mighy Jaoul. Jaoul semper ta sali fuerte y den mayoria di festival ta termina den clasificacion tambe y de vez en cuando cu premiacion. E POPO lo pusta riba sigur pa clasifica den calypso. Jay ta keda cu interogativo pa POPO. Ta su roadmarch so a lanta curiosidad cerca POO pasobra POPO kier sa ta con Tecla ta balia. Esey ta si ta e forma di baile di Tecla e kiermeen of si ta e estilo di baile ta carga e nomber di Tecla dance..

 

DOBLE E-RE

 

E di cinco banda cu ta subi ta cu e dos R nan. “Doble E-re” cu ta Robert y Robert Jeandor cu Robert Maduro ta combina atrobe pa mr. Culture. E ta canta calypso “It takes a man” y un roadmarch “Hop e”. Robet Maduro a aregla tur dos cancion tambe.

 

PRIVE

 

Prive ta bini cu Mr U-nique cu calypso y cu roadmarch. Ban spera di haya un otro ritmo di calypso di Prive y no e imitacion di ritmo estilo Claudius. Mr. U-nique ta presenta cu “It’s all about respect” y tambe componi y aregla pa Ronwayne Kock, e ta presenta roadmarch. Aña pasa su voz a lague un banda cu griep y hees. Den tumba el a canta casi sin voz di griep y hees. Awe POPO kier goza di Ronwayne cu mester demostra cu e ta U-nique. Mr.Salomon, Jurick Salomon ta presenta roadmarch “Inside is sweeter”. Jurick semper a atrae.

 

CLIMAX

 

Climax cu a bira agrupacion di yuda y colabora cu otronan, sin cantante Rusty, ta acompaña a ex rey veterano di calypso y roadmarch cu a bini di Hulanda pa celebra su 40 aña den e genero aki cantando su calypso y roadmarch pa publico, David Hodge, Young Quicksilver. Young Quicksilver ta keda cantante pa sorprende, y lo mira si e ta keda pa diasabra awor.. Killer, Austis Gibbs ta canta roadmarch “Moppen”. Ta parce cu nos lo mire pasobra e tin custumber di aparece riba papel y bira invisible despues. E pregunta ta: “Kico e ta bisti e biaha aki?” Cu Climax ta haya tambe Mr. Publico, King Bottle cu e biaha aki ta canta calypso y roadmarch. Su calypso ta Criticize me” y su roadmarch “Jamming with Balashi.” Asina e lo Chill pasobra el a prepara su roadmarch prome cu Chill a subi mercado sino lo tabata tin otro titulo.

 

PRINCE

 

CHRIS

 

Perfect Sound cu Prince Chris ta cera e anochi y cera e pre-clasificacionnan. Christopher Vrolijk ta canta calypso “Canibalismo” y roadmarch “Chip and Wip”.

Cuidao e no termina den clasificacion como e batacazo sorprendiendo tur hende.

- Advertisement -

DUNA COMENTARIO

Please enter your comment!
Please enter your name here