Home Deporte Pre-seleccion di 20 Basketbolista pa Weganan di Reino a drenta training

Pre-seleccion di 20 Basketbolista pa Weganan di Reino a drenta training

1
0
SHARE
- Advertisement -

deport1ORANJESTAD (AAN)- E organismo di Weganan di Reino a re incorpora basketball entre e disciplina nan di competencia pa e proximo weganan despues di un ausencia di varios aña. Arubasket a gara e oportunidad aki cu ambos man y aunke cu e invitacion a yega hopi laat pa prepara pa e weganan na Juli na Corsou, nan a hinca un proyecto solido den otro. A cuminsa pa invita 20 atleta di edad te cu 16 aña pa un pre-seleccion cu a start nan training dialuna ultimo.

 Sintiendo e necesidad pa esaki por ta un compromiso cu un base amplio, Arubasket a invita e atletanan y nan mayornan pa un reunion den e aula di EPI, caminda presidente Luis Tromp, despues di e introduccion di secretario Rudy Croes a splica e concepto di e weganan y con a yega na forma un programa di preparacion.

El a introduci e coaching staff consistiendo di Tom Pietersz, Danchi Boekhouder y Saskia Thomson y loke a cualifica nan pa carga tal responsabilidad. Cu e periodo corto cu tin pa train tabata necesario pa ta mas agresivo y a yega na un total di 96 sesion, incluyendo e weganan di fogueo.

Presente na e anochi aki tabata tambe Andy Gomes y Juvenal Navas di e comision di Weganan di Reino. Nan lo ta encarga pa supervisa e entrenamentonan.

CONCEPTO NOBO
Head-coach Tom Pietersz, kende tabata head-coach caba na aña 1997 di e seleccion cu a haci masha bon papel den e weganan na Corsou a ilustra e concepto nobo. Pa saca mas probecho cu simplemente pone un bon seleccion den otro, a traha un plan cu e mision pa duna algo bek na popularisa e deporte y crea un status nobo pa e atleta.

A crea un plan di mercadeo y publicidad pa e seleccion cu sosten di Tera Group como partner. Tom Pietersz a sigui elabora cu publicidad rond di cada hungado ta hopi importante, ya cu esey lo duna e atleta e reconocimento mereci, pero alabes lo pone presion riba e atleta pa por duna e maximo esfuerso y rendimento.

E rason cu a invita mayornan pa bin hunto ta pa pidi nan ayudo pa haci e proyecto aki un compromiso di henter e famia. Gobierno lo haci un inversion financiero den preparacion di un seleccion y logicamente ta spera un bon resultado. A menos cu tur atleta y tur gremio rond di e atleta coopera pa pusha e proyecto dilanti, e seleccion hamas por yega na utilisa tur e cualidadnan di e hungado. Aki ta papia di un compromiso serio.

ROL DI MAYOR
E mayornan ta hunga un rol central, pero tambe e docentenan di scol y henter e comunidad. P’esey tambe e coachnan kier sostene contacto cu e scolnan pa fortifica e compromiso educativo y guia e hoben den e bon caminda. Cu cooperacion y disciplina por logra masha hopi.
Cu e mayornan e coachnan lo kier comunica via medionan di electronica moderno, pa tene nan na haltura di cada progreso, pero tambe riba un base personal.

Tom Pietersz a sigui splica e mayornan cu e seleccion gradualmente lo ser reduci pa 15 y finalmente pa 12 hungado. Den e proceso di preparacion lo tin un camp durante un fin di siman, un biahe pa exterior pa realisa weganan di fogueo y finalmente e participacion na e weganan na Corsou. Tambe el a solicita e federacion pa e hungadonan por haya uniform pa train pa accentua e seriedad y standard di e seleccion.

Fuera di lo midi e hungadonan segun nan produccion, e plan lo produci testnan regular di e atleta, cu lo ta publico, caminda un por mira cuanto e ta score. Na final Andy Gomes a felicita e atleta scogi y a splica e presente nan ki rol nan lo hunga den e supervision. Esaki ta e prome biaha cu e weganan lo cay bao di supervision di Comite Olimpico y como tal nan lo dispone tambe di e psicologo di COA Edmundo Josiah.

E SELECCIONADONAN
E hungadonan fortuna cu a wordo selecciona ta: di YMCA San Nicolas Jonathan John, Jamahl Heemstadt, Kahlil Serrant, Christer Pantophlet, di Club Estrella Leonardo Alvarado, Gio Geerman, Michael Havertong, di RCA Gregory Haynes y Garrick Celaire, di RBTT Aruba Juniors Elijah Whitfield, Justin Every y Shaquille Bennett, di La Estrella Aruba Juniors Jondereth Flores y Argyn Mathilda, di Radio Shack Aruba Juniors Juan Hernandez, Christopher Placencio, Oswaldo Guerra, Abimael Ortiz, Rafeek Karmoeddien y Chesron Elgin.

E seleccion a cuminsa pa train 3 biaha pa siman, cu ta Dialuna y Diaranson pa 7or di anochi na Aruba Juniors y Diasabra pa 12or di merdia den e gymzaal di Colegio Arubano riba Vondellaan, pero na Maart lo aumenta e training nan pa 4 y na April pa 5 biaha pa siman.

- Advertisement -

DUNA COMENTARIO

Please enter your comment!
Please enter your name here