Home Editorial UNDA GOBIERNO KIER HIBA NOS?

UNDA GOBIERNO KIER HIBA NOS?

0
0
SHARE
- Advertisement -

jossy_mansur_picTin biaha e deseo ta grandi pa kere den un Gobierno cu te awor a demostra hopi talento pa saca potret den exterior cu personahenan importante; pa anuncia proyecto tras di proyecto sin fechanan di ehecucion o disponibilidad financiero; ostentando alavez un actitud complaciente contra esnan cu durante eleccion cu a pasa nan tabata ataca sin misericordia.
Danki Dios cu mi no a tende nada mas di e asunto di tram, y cu e declaracionnan defensivo tocante Ritz Carlton a mengua te casi nada. Loke mi ta sigui sin compronde ta e expresionnan cu “no por paga malo cu malo”, y “mi no tey pa persegui ningun hende” (refiriendo na e investigacionnan cu mester a tuma lugar contra esnan cu a malversa fondonan grandi di Pueblo, y a comete otro actonan castigable pa Ley).


Hecho ta cu maldadnan a ser cometi a la grandi cu e propiedadnan publico, y esnan cu a participa y contra kendenan tin evidencianan incuestionable, mester responde pa nan abusonan den Cortenan di Husticia (mi sa cu e Cortenan tey, pero Husticia ta existi ainda na Aruba?).

Nos isla no por avanza riba anuncionan so di proyectonan, sin e subsiguiente confirmacion di e fechanan di nan ehecucion, y e disponibilidad financiero pa hacie.

Bo por ordena cuanto estudio cu ta di loke bo ta consiera importante pa nos isla, pero pone nan den publicidad comosifuera nan ta un hecho, o ta bay bira un hecho pronto, sin e evidencianan corespondiente, no ta pas den e manera corecto di goberna un pais. Mi no sa si e hendenan eyriba ta mira nos tur pa bobo, o ingenuo, o creyentenan di fabula, pero den mi caso mi ta suplica nan encarecidamente pa no comete e eror di pensamento ey!

Di repente tur e acusacionnan contra e Ministronan di MEP durante nan Gobierno, a parce di a perde importancia pa esnan cu a asumi e mando di nos pais. Ya nan no tin tempo mas pa ripiti te cansancio, manera cu nan a haci durante eleccion, cu tal Ministro ta ladron, y e otro ta nepotista, y e otro a comercia cu e propiedadnan di Pueblo, enfin, cu tabata trata di un banda di malandronan cu mester ser castiga pa e malo cu nan a comete. Mi ta supone cu te ainda e concepto di bon y malo no a perde su significacion, y cu e conviccion cu uno merece castigo y e otro recompensa, ta sigui vigente.

Ta na nomber di ki pensamento e Gobierno actual a adopta su politica cu tin un parecido na e solucion di un avestruz? Mi ta spera cu nan no ta bao e impresion cu e fuertenan mester predica, pa nan comodidad y excusa, cu combati contra maldadnan cometi contra Pueblo ta indigno di hendenan civiliza! Vaya eror di apreciacion!

Mientras nos no dicidi di lucha contra e abominable vicionan publico, y aremete contra nan unda cu nan ser constata, nos lo ta fayando na nos debernan y faltando na nos compromiso cu e honor hacional.

- Advertisement -

DUNA COMENTARIO

Please enter your comment!
Please enter your name here